បន្ទាប់ពីរងនូវការរិះគន់យ៉ាងខ្លាំងក្លាពីសំណាកមហាជន អូជី ហ្គូលឌិន បានបង្ហោះសារសូមទោសមហាជនជាសាធារណៈខណៈពេលនេះអ្នកចម្រៀងរ៉េបរូបនេះប៉ះទង្គិចផ្លូវចិត្តខ្លាំង។ អូជី ថានៅពេលរូបគេប្រឹងធ្វើអ្វីមួយមិនមានកំហុសអ្នកមួយចំនួនមិនចាប់អារម្មណ៍នោះទេប៉ុន្តែនៅពេលខុសមួយចុងក្រចកបែរជាតាមចាប់កំហុសទាំងរឿងខ្លះរំលងជិត២ឆ្នាំមកហើយ។
ចាប់តាំងពីក្លាយជាម្ចាស់ពានមកដំណើរអាជីពសិល្បៈរបស់ អូជី ហ្គូលឌិន មិនសូវរលូននោះទេដោយសារតែរងនូវមតិរិះគន់ជាច្រើនទាក់ទងនឹងអាកប្បករិយា ទំនាក់ទំនងស្នេហា និងរឿងជាច្រើនទៀត។ នាពេលថ្មីៗនេះ អូជី ក៏រងនូវមតិរិះគន់ដោយចោទថាចម្លង Flow ទេព ពិសិដ្ឋ ប្រើ N-word នៅក្នុងឃ្លាចម្រៀង។ ប្រឈមនឹងការរិះគន់រាប់មិនអស់ អូជី បានបង្ហោះសំណេរទាំងយប់សូមទោសទៅកាន់មហាជនដោយសន្យាថានឹងកែប្រែកំហុសរបស់ខ្លួនកុំឱ្យកើតឡើងម្តងទៀត។.png)
នាយប់ថ្ងៃទី១៤ ខែកក្កដា អូជី បានបង្ហោះសារយ៉ាងវែងអន្លាយដោយរៀបរាប់ថា រូបគេមានកំហុសអ្វីនឹងកែប្រែកំហុសឆ្គងទាំងនោះប៉ុន្តែរឿងខ្លះកន្លងផុតមកជិត២ឆ្នាំហើយបានបំភ្លេចចោលពីខួរក្បាលទៅហើយប៉ុន្តែនៅតែមានអ្នកជីកកាយ។ អូជី ថារូបគេខំព្យាយាមធ្វើគ្រប់យ៉ាងឱ្យមហាជនសប្បាយទោះបីជាមិនចេញចម្រៀងតែនៅពេលធ្វើអ្វីមួយដោយមិនមានកំហុសអ្នកមួយចំនួនមិនចាប់អារម្មណ៍គ្រាន់តែខុសមួយចុងក្រចកចាប់កំហុសរូបគេខ្លាំង។ .png)
មិនថាកំហុសពីមុនឬឥឡូវៗនោះទេ អូជី បានលើកម្រាមដៃ១០សូមទោសមហាជនម្តងហើយម្តងទៀត ប្រសិនជា១០ឆ្នាំក្រោយគេលើកយករឿង២០ឆ្នាំមុនមកនិយាយដើម្បីទាញចំណាប់អារម្មណ៍លោកក៏មិនដឹងដែរ។ ម្ចាស់ពាន Rapper Fighter រដូវកាលទី១ បានបង្ហាញថាពេលនេះរូបគេប៉ះទង្គិចផ្លូវចិត្តយ៉ាងខ្លាំង សឹងតែមិនហ៊ានបើកហ្វេកប៊ុកឬទិកតុកឡើយដោយសារតែមានអារម្មណ៍ថាណែនទ្រូងប្រៀបដូចជាមាននរណាម្នាក់ដេញសម្លាប់។
អូជី ស្នើឱ្យអ្នកមួយចំនួនឈប់ជេរ ឈប់ដៀលខ្លួនទៀតពីព្រោះរូបគេក៏មិនចង់ឱ្យមានកំហុសដែរគ្រាន់តែពេលខ្លះពិបាកគ្មានអ្នកជួយផ្តល់យោបល់ រៀនសូត្របានត្រឹមថ្នាក់ទី៨ ពេលខ្លះគិតលឿននឹកឃើញធ្វើយកតែម្តង។ ជាងនេះទៅទៀត អូជី ថែមទាំងបញ្ជាក់ទៀតថាបើសិនជាដឹងមុនថាមានរឿងបែបនេះរូបគេមិនចង់ធ្វើជា Rapper មិនចង់បានជ័យជម្នះលេខ១ហ្នឹងដែរ៕
