បំពាក់ឆៀងជាផ្លូវការ ហុក សារិតុលា បង្កឱ្យមានការវែកញែកលើរឿងនេះ

ហុក សារិតុលា Miss Supranational Cambodia 2026 បានទទួលឆៀង Cambodia ជាផ្លូវការហើយក្នុងការប្រកួតនៅប្រទេសប៉ូឡូញដែលត្រូវនឹងព្រឹកថ្ងៃទី១៥ ខែកក្កដា ឆ្នាំ២០២៦នេះ។ ទោះយ៉ាងណា បន្ទាប់ពីវីដេអូរបស់ តុលា ទទួលឆៀងជាផ្លូវការបង្ហោះនៅលើបណ្តាញសង្គមហ្វេកប៊ុកស្រាប់តែមានមតិវែកញែកលើរឿងនាងមិនលើកដៃ «សំពះ»។

អ្នកតាមដានវិស័យបវរកញ្ញាជ្រាបមកហើយថា ហុក សារិតុលា បានតំណាងប្រទេសកម្ពុជាចេញទៅប្រកួតនៅលើឆាកអន្តរជាតិនៅឯប្រទេសប៉ូឡូញហើយបន្ទាប់ពីស្នើសុំ Visa បានសម្រេច។ តាំងពីចេញដំណើរទៅប្រកួត Miss Supranational Cambodia 2026 បានធ្វើឱ្យសាធារណៈមានការចាប់អារម្មណ៍ចំពោះការផ្លាស់ប្តូរសំលៀកបំពាក់ជាច្រើនឈុតក្នុងពេលផ្លាស់ប្តូរជើងយន្តហោះទម្រាំនឹងទៅដល់កងប្រកួត។ ហុក សារិតុលា ក៏បានភ្ជាប់ទំនាក់ទំនងល្អជាមួយនឹងបវរកញ្ញាផ្សេងទៀតផងដែរខណៈមិត្តរួមបន្ទប់របស់នាងគឺបវរកញ្ញាវៀតណាម។

នាព្រឹកព្រលឹមថ្ងៃទី១៥ ខែកក្កដា ស្ថាប័ន Miss Supranational Cambodia បានបង្ហោះវីដេអូរបស់ ហុក សារិតុលា ក្នុងការបំពាក់ឆៀងតំណាងឱ្យប្រទេសកម្ពុជាជាមួយនឹងការនិយាយភាសាអង់គ្លេសប្រកបដោយភាពជឿជាក់របស់នាង។ យ៉ាងណាមិញ វីដេអូទទួលឆៀងនេះបានជំរុញឱ្យអ្នកលេងបណ្តាញសង្គមបានបញ្ចេញមតិវែកញែកដោយសារឃើញ ហុក សារិតុលា មិនលើកដៃសំពះនៅពេល Miss Supranational 2025 បំពាក់ឆៀងឱ្យ។

មតិខ្លះបានបង្ហាញពីភាពងឿងឆ្ងល់របស់ខ្លួនថាហេតុអ្វី ហុក សារិតុលា មិនលើកដៃសំពះដែលជាទំនៀមទម្លាប់របស់ខ្មែរ ខណៈអ្នកខ្លះស្មានថា Miss Supranational Cambodia 2026 អាចភ្លេចសំពះលើកនេះ ប៉ុន្តែលើកក្រោយគួរមានការសំពះជាដើម។

យ៉ាងណាក៏ដោយទាក់ទងនឹងមតិវែកញែកទាំងនេះ ផេកគាំទ្រវិស័យបវរកញ្ញាមួយឈ្មោះថា « Review តាមអារម្មណ៍ » បានលើកឡើងថា «រឿងសំពះរឿងអីហ្នឹងឈប់ទើសខ្លះទៅ ទុកវគ្គឈុតតំណាងជាតិទៅ វគ្គទទួលឆៀង ឆៀងអក្សរ Cambodia ប៉ុណ្ណាណីហើយ កុំខ្លាចគេអត់ដឹងថាខ្មែរ រៀនយល់ពី Global citizens ខ្លះផង»៕