ទេព បូព្រឹក្ស ទិញឡានថ្មីតម្លៃ៣០ម៉ឺនដុល្លារស្របពេលកំពុងមានរឿងចម្រូងចម្រាស

តារាចម្រៀង ទេព បូព្រឹក្ស ទើបទិញឡានថ្មីស៊េរីទំនើបតម្លៃ៣០ម៉ឺនដុល្លារស្របពេលដែលកំពុងប្រឈមនឹងភាពចម្រូងចម្រាសនៅលើបណ្តាញសង្គមបន្ទាប់ពីមានការបង្ហោះសំណេរព្យែរឡាននិងដី។

ដូចប្រិយមិត្តជ្រាបមកហើយ ជី ដេវីត និង ជា សុជាតិ បានបង្ហោះសាររៀងខ្លួនយ៉ាងក្តៅគគុក ខណៈ ទេព បូព្រឹក្ស ក៏បានចេញមកតបតនឹងវាយបកទៅកាន់ ឌីជេ ក្តិប ដូចគ្នាបន្ទាប់ពីបង្ហោះសារមួយដោយសំណេរនោះចាត់ទុកថាហាក់ដូចជាកំពុងដៀមដាមមកកាន់ស្វាមីខ្លួន។ ទន្ទឹមនឹងមានភាពចម្រូងចម្រាសដីមួយប្លង់បានឡាន១០ស្រាប់តែ ទេព បូព្រឹក្ស ទិញឡានថ្មីតែម្តង។

តារាចម្រៀង ទេព បូព្រឹក្ស បានបង្ហោះវីដេអូមួយនៅយប់ថ្ងៃទី៣០ មិថុនា ដោយបានដាក់ចំណងជើងថា «ជីវិតប្រពន្ធពេលខ្លះក៏បញ្ជាក់ពីសមត្ថភាពប្តីដែរ ត្រឹមតែមួយដែកល្អមិនចាំបាច់ទៅជួញដូរធរណីធ្វើអី? ប្រហែលជាត្រូវស្គាល់ប្តីខ្ញុំឱ្យបានជ្រៅបន្តិចវាប្រសើរដែរព្រោះបុគ្គលដែលមានគំនិតអវិជ្ជមានខ្លះអាចយកគំរូតាមគាត់»។

Lamborghini Urus ដែល ទេព បូព្រឹក្ស ទើបតែទិញនេះត្រូវបាន ចំប៉ីខ្មៅ បង្ហាញនៅលើបណ្តាញសង្គមថាមានតម្លៃ៣០ម៉ឺនដុល្លារ។ តារាចម្រៀង ទេព បូព្រឹក្ស បាននិយាយថាការទិញឡាននេះគឺពាក់កណ្តាលបានមកពីការធ្វើ BA និងមួយផ្នែកទៀតជាលុយដែលនាងមានគម្រោងយកទៅទិញដី។ បន្ទាប់ពីឃើញ ទេព បូព្រឹក្ស ទិញឡានស៊េរីទំនើបនេះមានអ្នកគាំទ្រជាច្រើនបានបង្ហាញការអបអរមកកាន់តារាចម្រៀងរូបនេះ។ ការចាប់អារម្មណ៍កាន់តែខ្លាំងឡើងគឺនៅពេលដែលម្ចាស់បទ «ទេវរាជ» ទិញ Lamborghini Urus ដែលមានតម្លៃ៣០ម៉ឺនដុល្លារគឺស្របពេលកំពុងមានរឿងចម្រូងចម្រាសនៅលើបណ្តាញសង្គម។

ស្របពេល ជី ដេវីត ជាស្វាមីកំពុងមានរឿង ទេព បូព្រឹក្ស ក៏មិនអាចនៅស្ងៀមបានឡើយខណៈគេក៏បានឃើញតារាចម្រៀងរូបនេះចេញមកតបតក្រោយពីឃើញឌីជេ ក្តិប បង្ហោះសំណេរមួយដែលស្របនឹងស្ថានការកំពុងកើតឡើងដោយសង្ស័យថាសំណេរនោះចង់ដៀមដាមឱ្យ ជី ដេវីត៕