តើសំឡេងតុកកែយំប្រាប់ដំណឹងអ្វីខ្លះដល់ម្ចាស់ផ្ទះ?

តើដឹងឬអត់ថា ពេលសត្វតុកកែយំម្តងៗប្រាប់ដំណឹងអ្វីខ្លះដល់ម្ចាស់ផ្ទះ? ការយំរបស់តុកកែអាចប្រាប់ពីដំណឹងល្អ ឬអាក្រក់ លាភសំណាង លុយកាក់ និងទ្រព្យសម្បត្តិហូរចូលផ្ទះ ។ វាអាចយំចំនួន២លើក ឬ៣លើក ឬច្រើនជាងនេះ ហើយការប្រាប់ដំណឹង ក៏អាស្រ័យតាមពេលវេលាផងដែរ ដូចជា ៖ យំពេលព្រឹក ឬពេលយប់ ប៉ុន្តែពេលខ្លះ វាក៏យំតាមធម្មជាតិ ។

តុកកែ គឺជាសត្វរស់នៅតំបន់ក្តៅក្នុងទ្វីបអាស៊ី ហើយតុកកែភាគច្រើនមានពណ៌ចម្រុះលើដងខ្លួនរបស់វា ។ បើតាមផ្នែកវិទ្យាសាស្ត្រ គឺតុកកែយំដោយសារវាចង់ប្រកាសពីទីតាំងរស់នៅ និងដើម្បីបញ្ចេញខ្យល់ពីក្នុងសួតតាមរយៈបំពង់កដ៏តូច ហើយវាយំប៉ុន្មានលើក អាស្រ័យលើបរិមាណខ្យល់ដែលស្ទះក្នុងសួត ។

ប៉ុន្តែបើតាមជំនឿរបស់ចាស់ៗវិញ គឺតុកកែជាសត្វមានព្រលឹងវិញ្ញាណបុព្វបុរសរបស់យើងដែលបានចែកឋានហើយ ហើយពេលបុព្វបុរសចង់ដាស់តឿនអ្វីមួយដែលកូនចៅ តែងតែដាស់តឿនតាមរយៈសំឡេងតុកកែយំ ។ ហេតុនេះ សំឡេងតុកកែយំ គឺជាការប្រាប់ពីដំណឹងល្អ ដំណឹងអាក្រក់ ឬប្រាប់ពីលាភសំណាង ដោយផ្អែកតាមការយំរបស់វាមានចំនួនប៉ុន្មានលើក ។

តើការយំរបស់តុកកែក្នុង១លើកៗប្រាប់ដំណឹងអ្វីខ្លះដល់ម្ចាស់ផ្ទះ?

-យំ ១លើក ៖ មានន័យថា នឹងបាត់បង់របស់របរដ៏មានតម្លៃក្នុងផ្ទះ
-យំ ៣លើក ៖ គឺសមាជិកក្រុមគ្រួសារនឹងជួបតែសេចក្តីសុខ ភាពរុងរឿង និងសុខសប្បាយទាំងផ្លូវកាយ និងផ្លូវចិត្ត
-យំ ៤លើក ៖ នឹងមានហេតុការណ៍មិនល្អកើតឡើងលើសមាជិកក្រុមគ្រួសារ ដូចជា ៖ ឈឺថ្កាត់ ឬឈ្លោះប្រកែក
-យំ ៥លើក ៖ គឺជាការប្រាប់ពីហេតុការណ៍អាក្រក់
-យំ ៦លើក ៖ ម្ចាស់ផ្ទះនឹងជួបរឿងក្តៅក្រហាយ
-យំ ៧លើក ៖ បើយំចាប់ពីម៉ោង៦ព្រឹក ដល់ម៉ោង១២ថ្ងៃត្រង់ គឺនឹងមានដំណឹងល្អ បើវាយំផ្ទួនៗ មានន័យថា នឹងមានលាភសំណាង
-យំ ៨លើក ៖ ម្ចាស់ផ្ទះនឹងទទួលបានលាភសំណាង
-យំ ៩លើក ៖ នឹងមានសំណាងយ៉ាងខ្លាំង និងសម្បូរទ្រព្យសម្បត្តិ
-យំ ១០លើក ៖ នឹងជួបភាពរុងរឿង ជួបគូគ្រងមានគុណសម្បត្តិល្អឥតខ្ចោះ មានលុយកាក់ និងរបស់របរប្រើប្រាស់មិនខ្វះ
-យំ ១១លើក ៖ នឹងទទួលបានលាភសំណាងដ៏ធំ ។

បើតាមជំនឿចាស់ៗ គឺការយំរបស់តុកកែ អាស្រ័យលើពេលវេលា រួមមាន ៖

-ចាប់ពីម៉ោង៦ព្រឹក ដល់ម៉ោង១២ថ្ងៃត្រង់ ៖ គឺជាការប្រាប់ពីដំណឹងល្អ
-ចាប់ពីម៉ោង១២ថ្ងៃត្រង់ ដល់ម៉ោង៦ល្ងាច ៖ គឺប្រាប់ពីដំណឹងអាក្រក់
-ចាប់ពីម៉ោង៦ល្ងាច ដល់ម៉ោង១២យប់ ៖ ប្រាប់ទាំងដំណឹងល្អ និងដំណឹងអាក្រក់
-ចាប់ពីម៉ោង១២យប់ ដល់ម៉ោង៦ព្រឹក ៖ គឺជាការយំតាមធម្មជាតិរបស់តុកកែ ៕