FBI អាមេរិកកោតសរសើកម្ពុជា ចំពោះលទ្ធផលជាក់ស្ដែងក្នុងការបង្ក្រាបបណ្ដាញ Online Scam

រាជធានីភ្នំពេញ ៖ មន្ត្រីជាន់ខ្ពស់មកពីការិយាល័យស៊ើបអង្កេតសហព័ន្ធសហរដ្ឋអាមេរិក (FBI) បានសម្ដែងការកោតសរសើរយុទ្ធនាការកាន់តែខ្លាំងឡើងរបស់រដ្ឋាភិបាលកម្ពុជាប្រឆាំងនឹងការឆបោ.កតាមអ៊ីនធឺណិត និងបានបង្ហាគពីការប្តេជ្ញាចិត្តក្នុងការបង្កើនកិច្ចសហប្រតិបត្តិការបច្ចេកទេសជាមួយកម្ពុជាឲ្យបានខ្លាំងក្លាបំផុត។

យោងតាមសេចក្ដីប្រកាសព័ត៌មានក្រោយកិច្ចប្រជុំកម្រិតខ្ពស់មួយកាលពីថ្ងៃពុធ លោក Scott Schelble អនុប្រធានរងនៃផ្នែកប្រតិបត្តិការអន្តរជាតិរបស់ FBI បានជួបជាមួយឯកឧត្តម ឆាយ ស៊ីណារិទ្ធ ទេសរដ្ឋមន្ត្រីទទួលបន្ទុកបេសកកម្មពិសេស និងជាប្រធានលេខាធិការដ្ឋានគណៈកម្មការប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា (គ.ប.ឆ.ប.) ។

ការពិភាក្សាបានផ្តោតលើ «លទ្ធផលជាក់ស្តែង» ដែលសម្រេចបានក្រោមយន្តការ គ.ប.ឆ.ប គឺជាស្ថាប័នឯកទេសមួយដែលមានសម្តេចនាយករដ្ឋមន្ត្រី មហាបវរ ធីបតី ហ៊ុន ម៉ាណែត ជាប្រធាន។ ក្នុងពេលដំណាលគ្នានោះ លោក Schelble បានបង្ហាញការកត់សម្គាល់ថា សកម្មភាពអនុវត្តច្បាប់ថ្មីៗនេះបម្រើជាសញ្ញាច្បាស់លាស់ថា កម្ពុជាមិនមែនជាជម្រកសម្រាប់ក្រុមឧក្រិដ្ឋជនតាមអ៊ីនធឺណិតទេ។

លោក Schelble បានទទួលស្គាល់ថា “ការក្លែងបន្លំតាមអ៊ីនធឺណិតគឺជាវិបត្តិសកលដ៏ស្មុគស្មាញមួយដែលប៉ះពាល់ដល់ប្រទេសជាច្រើន។ វាមិនមែនជាបញ្ហាប្រឈមតែមួយគត់សម្រាប់ប្រទេសកម្ពុជានោះទេ”។ លោកបានសង្កត់ធ្ងន់ថា ទំហំនៃឧក្រិដ្ឋកម្មទាំងនេះតម្រូវឱ្យមានកិច្ចសហប្រតិបត្តិការអន្តរជាតិដ៏រឹងមាំ ដោយបញ្ជាក់ជាថ្មីនូវការប្តេជ្ញាចិត្តរបស់ FBI ក្នុងការពង្រឹងភាពជាដៃគូរបស់ខ្លួនជាមួយ CCOS។

ដោយឡែកចំពោះលោកទេសរដ្ឋមន្ត្រី ឆាយ ស៊ីណារិទ្ធ បានគូសបញ្ជាក់ថា រដ្ឋាភិបាលកម្ពុជាបានប្រកាសជំហរក្នុងការប្រយុទ្ធប្រឆាំង និងបោសសម្អាតការឆបោកតាមប្រព័ន្ធបច្ចេកវិទ្យា ដោយដាក់ចេញវិធានការជំនាញ និងច្បាប់យ៉ាងម៉ឺងម៉ាត់។

តាមរយៈយន្តការ គ.ប.ឆ.ប. សមត្ថកិច្ចកម្ពុជានឹងបន្តបង្កើនកិច្ចសហប្រតិបត្តិការជាមួយដៃគូអន្តរជាតិ ទាំងទ្វេភាគី និងពហុភាគី ដើម្បីស្រាវជ្រាវឱ្យដល់ឫសគល់នៃបណ្តាញ និងហិរញ្ញវត្ថុរបស់បណ្តាញឧក្រិដ្ឋជន។

ជាចុងក្រោយ កិច្ចប្រជុំខាងលើត្រូវបានបញ្ចប់ដោយការប្តេជ្ញាចិត្តក្នុងការបង្កើនកិច្ចសហប្រតិបត្តិការបច្ចេកទេស។ ហើយភាគីទាំងពីរបានពិភាក្សាអំពីផែនទីបង្ហាញផ្លូវសម្រាប់កិច្ចសហការនាពេលអនាគត ជាពិសេសផ្តោតលើការពង្រឹងសមត្ថភាពរបស់ការអនុវត្តច្បាប់កម្ពុជា ដោយលោក Schelble បានបង្ហាញឆន្ទៈច្បាស់លាស់ក្នុងការបន្ត និងពង្រឹងកិច្ចសហប្រតិបត្តិការរវាង FBI និង គ.ប.ឆ.ប.៕