តារាសម្ដែង Tian Xuning ត្រូវបានកម្មវិធីល្បីមួយកាត់លោកចេញ

តារាសម្តែង Tian Xuning ដែលសាងភាពល្បីល្បាញខ្លាំងតាមរយៈរឿង BL កំពុងប្រឈមនឹងវិបត្តិជួបឧបសគ្គក្នុងអាជីពសិល្បៈ។ ដោយសារតែមានរឿងអាស្រូវជាច្រើន តារាសម្ដែង Tian Xuning ត្រូវបានគេកាត់ចេញនៅក្នុងកម្មវិធី «Hello Saturday»។

កន្លងមករូបភាពដែលបានថតរបស់ Tian Xuning បានបាត់ពីការផ្សាយជាផ្លូវការ។ សូម្បីតែនៅក្នុង vlog នៅពីក្រោយឆាករបស់តារាចម្រៀងម្នាក់ក៏ដោយក៏មុខរបស់ Tian Xuning ត្រូវបានបង្ហាញព្រិលៗ ខណៈដែលមុខរបស់សិល្បករផ្សេងទៀតនៅតែរក្សាដដែល។ ទោះជាយ៉ាងណាក៏ដោយ «ការហាមឃាត់» របស់ Tian Xuning គឺមកពីហេតុផលពីរ។ ក្នុងឆ្នាំ ២០១៧ Tian Xuning បានជាប់ពាក់ព័ន្ធនឹងពាក្យចចាមអារ៉ាមបន្ទាប់ពីបែកធ្លាយសារឯកជនដែលបណ្តាលឱ្យរូបភាពរបស់លោកធ្លាក់ចុះ។ បន្ទាប់មកលោកបានស្ងាត់ស្ងៀមមួយរយៈមុនវិលមកវិញជាមួយនឹងគម្រោងភាពយន្តតាមអ៊ីនធឺណិត។ រហូតមកដល់ពេលនេះ ទស្សនិកជនបាន«ជីកកកាយអតីតកាលរបស់លោកដើម្បីរិះគន់។

កំហុសមួយទៀតអាចថាមកពីតារាប្រុសរូបនេះ គឺការចូលរួមក្នុងខ្សែភាពយន្តប្រភេទហាមឃាត់ (ភាពយន្តស្រលាញ់ភេទដូចគ្នា)។ កត្តានេះបានធ្វើឱ្យ Tian Xuning ធ្លាក់ក្នុងស្ថានភាពមួយដែលលោកមិនមានសកម្មភាពសិល្បៈលេចធ្លោ ហើយឥឡូវនេះលោកត្រូវបានកាត់ចេញពីកម្មវិធីធំមួយទាំងស្រុង។
រដ្ឋបាលវិទ្យុ ភាពយន្ត និងទូរទស្សន៍ជាតិ (NRTA) ធ្លាប់ចេញបទប្បញ្ញត្តិហាមមិនឱ្យផលិតភាពយន្តដែលមានខ្លឹមសារទាក់ទងនឹងស្នេហាភេទដូចគ្នា។ ដូច្នេះអាជីពរបស់ Tian Xuning ត្រូវបានរារាំង។

ទោះជាយ៉ាងណាក៏ដោយ យោងតាមប្រព័ន្ធផ្សព្វផ្សាយរបស់ចិន វាអាចទៅរួចដែលថា Tian Xuning និងសិល្បករមួយចំនួនទៀតត្រូវបានហាមឃាត់បណ្តោះអាសន្នមិនឱ្យបង្ហាញមុខក្នុងកម្មវិធីទូរទស្សន៍សំខាន់ៗ ខណៈដែលសកម្មភាពផ្សេងទៀតដូចជារឿងភាគតាមអ៊ីនធឺណិត និងព្រឹត្តិការណ៍ប្រព័ន្ធផ្សព្វផ្សាយសង្គមនៅតែមិនប៉ះពាល់។ ទោះជាយ៉ាងណាក៏ដោយ ការត្រូវបាន «ហាមឃាត់» ពីទូរទស្សន៍ មានន័យថា មាគ៌ាអភិវឌ្ឍន៍របស់ Tian Xuning នឹងជួបប្រទះនូវឧបសគ្គជាច្រើន ព្រោះនេះជាប៉ុស្តិ៍ដ៏សំខាន់មួយ ដើម្បីរក្សាមុខមាត់ និងផ្សព្វផ្សាយឈ្មោះរបស់តារាប្រុសកើតឆ្នាំ១៩៩៧រូបនេះ។

មែនទែនទៅបន្ទាប់ពីសាងភាពល្បីល្បាញតាមរយៈរឿង «Revenged Love» តារាប្រុសរូបនេះប្រឈមនឹងរឿងអាស្រូវជីវិតឯកជនយ៉ាងច្រើន ទោះបីជាលោកចេញបកស្រាយយ៉ាងណា Tian Xuning នៅតែក្លាយជាប្រធានបទក្តៅគគុក។ បច្ចុប្បន្ន Tian Xuning មិនបានផ្តល់ការឆ្លើយតបណាមួយអំពីការកាត់ចេញពីកម្មវិធីនោះទេ។ យ៉ាងណាក៏ដោយ សកម្មភាពយ៉ាងចាស់ដៃពីក្រុមផលិតកម្មកម្មវិធី «Hello Saturday» បង្ហាញថាស្ថានភាពរបស់តារារូបនេះមិនសូវជាវិជ្ជមាននោះទេដូច្នេះហើយមាគ៌ារបស់ Tian Xuning ក្នុងការដណ្ដើមតំណែងរបស់ខ្លួនឡើងវិញក្នុងឧស្សាហកម្មកម្សាន្តរបស់ចិន គឺកាន់តែលំបាកជាងពេលណាៗទាំងអស់៕