ហ្សាណា និង យូហៃ ពួតដៃគ្នាដង្ហើយឱ្យថៃដោះលែងទាហានខ្មែរទាំង១៨នាក់មកកម្ពុជាវិញ

ក្រោយពីជួបផ្ទាល់ជាមួយភរិយាទាហានម្នាក់ក្នុងចំណោមទាហាន១៨នាក់ដែលថៃចាប់ខ្លួនយកទៅក្រោយបទឈប់បាញ់នៅមិនទាន់មានការដោះលែងតារាចម្រៀង រ៉េត ស៊ូហ្សាណា និង យូហៃ បានពួតដៃគ្នាចេញចម្រៀងមួយបង្កប់ដោយអត្ថន័យដែលភរិយាកំពុងទន្ទឹងរង់ចាំប្តីវិលវិញ។ សារផ្តាំផ្ញើទៅកាន់ពិភពលោកចង់បញ្ជាក់ថាថៃនៅមិនទាន់ដោះលែងទាហានខ្មែរ ហើយក្រុមគ្រួសារកំពុងរង់ចាំនោះ ហ្សាណា បកស្រាយចម្រៀងទាំងសំឡេងខ្សឹកខ្សួល។

នៅថ្ងៃទី១៥ ខែសីហា រ៉េត ស៊ូហ្សាណា បានសហការជាមួយ យូហៃ ម្តងទៀតដោយបានទម្លាក់បទ «Come Back Home» ដែលអត្ថន័យនៃបទនេះគឺសម្តៅទៅលើទាហានខ្មែរទាំង១៨នាក់ដែលកងកម្លាំងថៃចាប់ទាហានខ្មែរយកទៅនៅមិនទាន់មានការដោះលែងនៅឡើយ។ បទចម្រៀងនេះគឺចង់បង្ហាញពីគូស្នេហ៍មួយគូដែលភរិយារង់ចាំផ្លូវស្វាមីត្រឡប់មកវិញទាំងក្តីបារម្ភនិងឈឺចាប់ ដោយមិនដឹងថាពេលណាអាចត្រឡប់មកជួបគ្រួសារវិញនោះទេ។

មិនត្រឹមតែលើកឡើងពីជីវិតគូរវាងប្តីប្រពន្ធមួយគូនោះទេប៉ុន្តែក៏ឆ្លុះបញ្ចាំងពីរឿងរ៉ាវផ្សេងទៀតក្នុងនាមជាឈាមខ្មែរតែមួយដែលមានក្តីឈឺចាប់ បារម្ភ និងការដឹងគុណចំពោះទាហានដែលបានការពារទឹកដី ហើយមានក្តីបារម្ភនិងចង់ឱ្យមានការដោះលែងទាហានទាំង១៨នាក់វិលត្រឡប់មកកាន់មាតុភូមិនិវត្តន៍វិញឆាប់រហ័ស។

បទចម្រៀងដែលបង្កប់ដោយអត្ថន័យនេះប្រិយមិត្តនឹងបានឮសំឡេងដែល រ៉េត ស៊ូហ្សាណា បកស្រាយចម្រៀងទាំងអារម្មណ៍ខ្សឹកខ្សួលព្រោះដឹងពីភាពឈឺចាប់និងក្តីបារម្ភដែលគ្រួសារទាហានកំពុងទន្ទឹងរង់ចាំផ្លូវទាំងយប់ទាំងថៃ មិនដឹងថាថៃដោះលែងនៅពេលណា។

នៅផ្នែកដែល យូហៃ រ៉េបវិញគឺបានបង្ហាញពីទំហំចិត្តរបស់ទាហានខ្មែរគឺមានការនឹកផ្ទះនឹកប្រពន្ធកូនដូចគ្នា ហើយប្រសិនជាអាចវិលវិញនឹងជូនប្រពន្ធកូនទៅលេងភ្នំពេញប៉ុន្តែបើសិនជាមិនអាចវិលវិញគឺបានផ្តាំផ្ញើឱ្យប្រពន្ធខាំមាត់សង្កត់ធ្មេញ ហើយគ្រប់យ៉ាងធ្វើគឺដើម្បីទាំងអស់គ្នា ដើម្បីប្រទេសជាតិទោះបីជាបូជាសាច់ឈាមក៏មិនឱ្យខ្មាំងប្តូរផែនទីឡើយ។

«Come Back Home» របស់ ហ្សាណា និង យូហៃ បានធ្វើឱ្យទស្សនិកជនជាច្រើនបង្ហាញក្តីឈឺចាប់ដូចគ្នា។ បទនេះក៏មានជនបរទេសបានធ្វើការ Reaction ផងដែរហើយពួកគេបានបង្ហាញក្តីបារម្ភនិងចង់ឱ្យមានការដោះលែងទាហានខ្មែរមកវិញផងដែរ។ គិតត្រឹមថ្ងៃទី១៩ ខែសីហានេះវាមានរយៈពេល ២១ថ្ងៃ ដែលកងកម្លាំងកម្ពុជាត្រូវបានទាហានថៃចាប់ខ្លួនដោយខុសច្បាប់ នៅមិនទាន់មានការដោះលែងនៅឡើយ៕