(ភ្នំពេញ)៖ ក្រសួងការពារជាតិកម្ពុជា បានបញ្ចាក់នាព្រឹកថ្ងៃទី៣១ ខែកក្កដា នេះថា មកទល់ពេលនេះ កម្ពុជាទទួលបានស.ពកងកម្លាំងចំនួន១រូប និងនៅសល់២០រូបទៀត កម្ពុជាកំពុងបន្តចរចាឱ្យថៃបញ្ចូនត្រឡប់មកវិញ។
អ្នកនាំពាក្យក្រសួងការពារជាតិកម្ពុជា លោកជំទាវ ម៉ាលី សុជាតា បានថ្លែងនៅក្នុងសេចក្តីសង្ខេបព័ត៌មាន ស្តីពី «លទ្ធផលនៃការអនុវត្តបទឈប់បាញ់រវាងកម្ពុជា-ថៃ» ជុំវិញហេតុការណ៍កាលពីថ្ងៃទី២៩ ខែកក្កដា នាវេលាម៉ោង 7:50នាទីព្រឹក ដែលកងកម្លាំងកម្ពុជាចំនួន២១រូបស្ថិតក្រោមការគ្រប់គ្រងរបស់ភាគីថៃ មកទល់ពេលនេះ កម្ពុជាបានទទួលស.ពចំនួនមួយរូប និងនៅសល់ ២០ រូបផ្សេងទៀត កម្ពុជាកំពុងបន្តចរចាឱ្យថៃបញ្ចូនត្រឡប់មកវិញ។
លោកជំទាវ បានបន្តថា៖ អ្វីដែលជាគោលដៅសំខាន់បំផុតរបស់យើង គឺនៅតែបន្តការពារទឹកដី ការពារអាយុជីវិតរបស់ប្រជាពលរដ្ឋរបស់យើង និងការពារសន្តិភាព ដោយមិនអនុញ្ញាតឲ្យមានសង្រ្កា.មកើតឡើងទៀតនោះទេ។
ក្រសួងការពារជាតិបានបញ្ជាក់ថា៖ កម្ពុជាយើងនឹងបន្តចរចាឲ្យអស់លទ្ធភាព ដើម្បីយកបងប្អូនទាំងអស់ត្រឡប់មកវិញឲ្យបានឆាប់បំផុតដោយសុខសុវត្ថិភាព។ ក្នុងន័យនេះ យើងសូមអំពាវនាវឲ្យភាគីថៃ ដើម្បីធ្វើយ៉ាងណាបញ្ជូនកងកម្លាំងរបស់យើងទាំង២០រូប ឲ្យត្រឡប់មកវិញឲ្យបានឆាប់ រួមទាំងកម្លាំងផ្សរងទៀត ប្រសើនបើមាននៅក្នុងការគ្រប់គ្រងរបស់ថៃ។
ជាមួយគ្នានេះ ក្រសួងការពារជាតិកម្ពុជា ក៏សូមអំពាវនាវឲ្យភាគីថៃមើលថែរក្សាកងកម្លាំងកម្ពុជាដែលស្ថិតនៅក្រោមការគ្រប់គ្រងរបស់ខ្លួនឲ្យបានល្អ និងឆាប់ដោះលែងពួកគាត់វិញឲ្យបានឆាប់រហ័សបំផុត ស្របតាមច្បាប់មនុស្សធម៌អន្តរជាតិ។ 
លើសពីនេះ ក្រសួងស្នើសុំឲ្យបងប្អូនប្រជាពលរដ្ឋ និងកងកម្លាំងរបស់យើង មានលំនឹងចិត្តថា រាជរដ្ឋាភិបាល ដ្នាក់ដឹកនាំ ក្រសួងការពារជាតិ និងកងយោធពលខេមរភូមិន្ទរបស់យើង មិនដែលលះបង់កងទ័ពណាម្នាក់ឡើយទោះក្នុងកាលៈទេសៈណាក៏ដោយ។ សូមពលរដ្ឋមានការជឿទុកចិត្តលើរាជរដ្ឋាភិបាល និងកងកម្លាំងរបស់យើង ដែលកំពុងឈរជើងការពារទឹកដីយ៉ាងមុះមត់ ក្លាហាន ប្រកបដោយស្មារតីស្នេហាជាតិជ្រាលជ្រៅបំផុត៕
