បន្ទាប់ពីរងនូវភាពចម្រូងចម្រាសនិងទទួលបានមតិរិះគន់ចាស់ដៃពីអ្នកលេងបណ្តាញសង្គមកម្ពុជាទីបំផុត ពេជ្រ វត្តីសារ៉ាវឌ្ឍី បានសម្រេចចិត្តលុប Title ជាលំដាប់រងទី៥ កម្មវិធី Miss Grand International 2022 គ្រប់បណ្តាញសង្គមហើយ។
អស់រយៈពេលជាច្រើនខែមកហើយពោលគឺចាប់តាំងពីអតីតអ្នករៀបចំកម្មវីធី Miss Grand Cambodia គឺលោកស្រី អ៊ឹម សុគន្ធា មានបញ្ហាចម្រូងចម្រាសជាមួយនឹងតាណាវ៉ាត់ រួមទាំងមានបញ្ហាជាច្រើនទៀតកើតឡើងនៅរយៈពេលចុងក្រោយនេះពេជ្រ វត្តីសារ៉ាវឌ្ឍី គឺតែងតែត្រូវបានមហាជនរិះគន់ចំពោះការដាក់ Title របស់នាងនៅក្នុងកម្មវិធីមួយនេះទាំងដែលម្ចាស់កម្មវិធីនេះធ្លាប់បានប្រើពាក្យប្រមាថមកកាន់ថ្នាក់ដឹកនាំកម្ពុជា។
ចំណែកឯរឿងថ្មីៗនេះទៀតសោតគឺមានអ្នកឌីហ្សាញជនជាតិថៃម្នាក់បានបញ្ចេញសារបង្ហាញពីបវរកញ្ញាកម្ពុជាម្នាក់ឆាតទៅរូបគេព្រមទាំងបដិសេធមិនរួមការងារជាមួយខ្មែរជាដាច់ខាតទោះស្ថិតនៅក្នុងកាលៈទេសៈណាក៏ដោយ។ ការទម្លាយឆាតនិងសម្តីរបស់អ្នកឌីហ្សាញជនជាតិថៃរូបនេះបានធ្វើឱ្យមហាជនផ្ទុះប្រតិកម្មម្តងទៀតជាពិសេសមនុស្សជាច្រើនបានសង្ស័យថាអ្នកដែលឆាតទៅគឺជាពេជ្រ វត្តីសារ៉ាវឌ្ឍី។ ស្របពេលស្ថានការណ៍តានតឹងខ្លាំងកំពុងមានសង្គ្រាមបែបនេះ ពេជ្រ វត្តីសារ៉ាវឌ្ឍី គឺទទួលរងនូវការរិះគន់ខ្លាំងតែម្តង។
យ៉ាងណាមិញ បន្ទាប់ពីមានរឿងចម្រូងចម្រាសពេញបណ្តាញសង្គម ពេលនេះ ពេជ្រ វត្តីសារ៉ាវឌ្ឍី បានលុប Title លំដាប់រងទី៥ កម្មវិធី Miss Grand International 2022 គ្រប់បណ្តាញសង្គមហើយទាំងនៅលើផេក គណនីហ្វេកប៊ុក រួមទាំងគណនី IG ។
គួរឱ្យដឹងថា ពេលនេះ ពេជ្រ វត្តីសារ៉ាវឌ្ឍី ក៏កំពុងប្រកួតយក Title ថ្មីពីកម្មវិធីបវរកញ្ញាចក្រវាលកម្ពុជាឆ្នាំ២០២៥ ផងដែរ។ វគ្គផ្តាច់ព្រ័ត្រកម្មវិធី Miss Universe Cambodia 2025 នឹងប្រពឹត្តទៅនៅថ្ងៃទី ២៦ ខែកក្កដា ឆ្នាំ២០២៥ ដែលមានទីតាំងនៅសាលវិមាន ពហុកីឡាដ្ឋានជាតិអូឡាំពិក៕
