ថ្មីៗកន្លងមកនេះម្ចាស់ពានប្រលងចម្រៀងរ៉េបថ្មីថ្មោង អូជី ហ្គូលឌិន បានទម្លាយពីម្តាយរបស់ខ្លួនជាប់ពន្ធនាគារហើយកំពុងទន្ទឹងចាំម្តាយត្រឡប់មកវិញទាំងមិនទាល់ដឹងពីពេលវេលាជាក់លាក់។ មិនត្រឹមតែ អូជី ប៉ុណ្ណោះទេដែលហ៊ានទម្លាយបែបនេះគេចាំបានថាតារាចម្រៀង ណាន វីសារ ក៏ធ្លាប់បានទម្លាយប្រាប់ទស្សនិកជននូវការពិតថាម្តាយរបស់លោកក៏ធ្លាប់ជាប់ពន្ធ.នាគារ ដូចគ្មានរយៈពេល៥ឆ្នាំហើយលោកក៏ធ្លាប់ចំណាកស្រុកធ្វើជាកម្មករសំណង់។
ក្នុងកម្មវិធីសម្ភាសន៍ អ្នកជិតខាង ពីតារាកិត្តិយស អូជី ហ្គូលឌិន ម្ចាស់ពានក្នុងកម្មវិធី The Rapper Fighter បានបង្កឱ្យទស្សនិកជនមានការចាប់អារម្មណ៍យ៉ាងខ្លាំងនិងមានការអាណិតអាសូរចំពោះម្ចាស់ពានរូបនេះបន្ទាប់ពី អូជី រងនូវការរិះគន់ក្នុងរយៈពេលចុងក្រោយនេះ។ ក្នុងកម្មវិធី អូជី បានរៀបរាប់ពីការតស៊ូរបស់ខ្លួនរួមទាំងរឿងរ៉ាវនៅក្នុងរង្វង់គ្រួសារដែលបែកបាក់គ្នាចំណែកឯម្តាយរបស់លោកគឺជាប់ពន្ធនាគារពីដើមឆ្នាំ២០២៣ រហូតមកដល់ឥឡូវ។ អូជី បានបន្ថែមដែរថា ប្អូនៗរបស់ខ្លួនរស់នៅជាមួយឪពុក ហើយព្រមទទួលស្គាល់ថារស់នៅគ្មានភាពកក់ក្តៅហើយនៅពេលគ្រួសារបែកបាក់លោកចេញមករស់នៅខាងក្រៅ។
ជុំវិញម្តាយកំពុងជាប់ពន្ធនាគារ អូជី ថាម្តាយរបស់ខ្លួនកុហកថាចេញមកពេលនេះប៉ុន្តែមិនឃើញដដែលហើយក៏ប្រាប់ថាពីរខែទៀតនឹងមានសេរីភាពប៉ុន្តែមិនដឹងថាម្តាយរបស់ខ្លួនកុហកទៀតឬអត់ទេ។ ទទួលបានភាពជោគជ័យក្នុងជំហ៊ានដំបូងក្នុងនាមជាម្ចាស់ពាន អូជី ក៏បានបង្ហាញដែរថាម្តាយរបស់ខ្លួនក៏បានដឹងរឿងនេះដូចគ្នា។
ការទម្លាយពីរឿងម្តាយកំពុងជាប់ពន្ធនាគារនេះបានធ្វើឱ្យមនុស្សជាច្រើនបញ្ចេញមតិថា អូជី ហ៊ានទទួលស្គាល់ការពិតមិនលាក់បាំងមហាជនឡើយ។
មិនត្រឹមតែ អូជី ប៉ុណ្ណោះទេដែលហ៊ានទម្លាយថាម្តាយរបស់ខ្លួនជាប់ពន្ធនាគារ គេចាំបានថាកាលពីឆ្នាំ២០២២ តារាចម្រៀង ណាន វីសារ ក៏ធ្លាប់ទម្លាយប្រាប់ទស្សនិកជនដូចគ្នាក្នុងពេលលោកកំពុងប្រលងកម្មវិធី Cambodian idol រដូវកាលទី៤។ នាគ្រានោះ ណាន វីសារ បានបង្ហាញថា ឪពុកម្តាយរបស់លោកបានបែកបាក់គ្នាតាំងពីលោកមានអាយុ៣ឆ្នាំ ជាកូនកំព្រាគ្មានភាពកក់ក្តៅ។ ក្នុងនោះលោកក៏បង្ហាញថា នៅឆ្នាំ ២០១០ ម្តាយរបស់លោក ត្រូវជាប់ពន្ធនាគាររយៈពេល៥ឆ្នាំ ជាហេតុលោកត្រូវទៅរស់នៅជាមួយលោកយាយ។ ដោយសារតែជីវភាពខ្វះខាតខ្លាំងនៅក្នុងឆ្នាំ២០១៥ លោកបានសម្រេចចិត្តបោះបង់ចោលការសិក្សា ដោយងាកមរកការងារធ្វើជាកម្មករសំណង់នៅប្រទេសថៃ។
ក្រោយពីធ្វើជាកម្មករចំណាកស្រុក លោកមានក្តីស្រមៃចង់ក្លាយជាតារាចម្រៀងមួយរូបហើយសម្រេចចិត្តវិលមកមាតុភូមិវិញហើយក៏ជាតារាចម្រៀងនៅក្នុងសណ្ឋាគារមួយនៅទីក្រុងភ្នំពេញផងដែរ។ ក្រោយមកលោកក៏សម្រេចចិត្តដាក់ពាក្យប្រកួតក្នុងកម្មវិធី Cambodian Idol រដូវកាលទី៤ ។
ក្នុងការប្រកួត ណាន វីសារ បានឈានដល់វគ្គពាក់កណ្តាលផ្តាច់ព្រ័ត្រ ត្រូវធ្លាក់ចេញកម្មវិធីជាមួយនឹង មាស នីតា ហើយការប្រកួតប្រជែងមួយនេះបានធ្វើឱ្យទស្សនិកជនមានការស្គាល់ ណាន វីសារ បានកាន់តែច្រើន៕
