យកកុងត្រាឬមនោសញ្ចេតនាមកធ្វើការ ខាត់ ស្រីច័ន្ទ លើកឡើងបែបនេះ

ថ្មីៗនេះអ្នកតាមដានវិស័យបវរកញ្ញាជ្រាបមកហើយពីការបង្ហោះសារយ៉ាងក្តៅគគុករបស់លោកស្រី អ៊ឹម សុគន្ធា ខណៈមានការសង្ស័យថាចង់សម្តៅទៅកាន់ ប៊ី សុធារី ដាក់ពាក្យចូលរួមប្រកួតកម្មវិធីបវរកញ្ញាមួយ។ ជុំវិញរឿងនេះមានការជជែកវែកញែកច្រើនពីរឿងជ្រើសយកកុងត្រាឬមនោសញ្ចេតនា កញ្ញា ខាត់ ស្រីច័ន្ទ បានចេញមកបង្ហាញការយល់ឃើញបែបនេះ។

ខាត់ ស្រីច័ន្ទ បានសរសេរនៅលើបណ្តាញសង្គមនៅថ្ងៃទី១១ មីនា នេះថា «ក្នុងនាមជាអ្នកកាន់កម្មវិធីមួយរូបពិតជាពិបាកនៅក្នុងការប្រើមនោសញ្ចេតនាមកធ្វើការព្រោះថានឹងធ្វើឱ្យយើងឈឺចាប់បំផុត។ ក្នុងការគោរពមនុស្សម្នាក់ៗ មិនសំដៅទៅលើឋានៈ លុយកាក់នោះទេ ប៉ុន្តែវាសំខាន់ខ្លាំងបំផុតនៅក្នុងការ គោរពចំពោះខ្លួនឯង និង មនុស្សជុំវិញខ្លួន ពេលវេលាបានបង្រៀនឱ្យខ្ញុំបានឃើញថាធ្វើការ ដោយមិនប្រើមនោសញ្ចេតនាគឺល្អ និង professional បំផុត បើមិនដូចនេះទេគឺវិស័យនេះមិនអាចទៅមុខរួចទេព្រោះទំនួលខុសត្រូវរបស់មនុស្សម្នាក់ៗគឺសំខាន់ និងអាចមិនដូចគ្នាទេ»។

ND Miss Mera Cambodia បានបន្តទៀតថា «រឿងដែលខ្ញុំបានរៀនគឺការដោះលែងបុគ្គល ដែលខ្ញុំគិតថាគ្មានតំលៃ អ្វីសោះក្នុងជីវិតខ្ញុំ គឺបានត្រឹមតែបង្ករភាពអវិជ្ជមាន និងរឿង toxic ប៉ុណ្ណោះ មិនថាយើមាន កុងត្រាចងជើងគេយ៉ាងណា បើសិនបុគ្គលនោះមិនយល់ពីតម្លៃ និង តុល្យភាពនៃការលះបង់ក្នុងកាងារនោះទេគឺស្មើនឹង០»។

ជាមួយនឹងការលើកឡើងខាងលើនេះ ខាត់ ស្រីច័ន្ទ ក៏បានបង្ហោះសំណេរមួយទៀតថាក្នុងនាមជាអ្នកគ្រប់គ្រងស្លូតពេក អត់ឱនពេក គេមិនគោរពឱ្យតម្លៃ។ យប់ថ្ងៃទី១០ មីនា ខាត់ ស្រីច័ន្ទ បានរៀបរាប់យ៉ាងដូច្នេះថា «ក្នុងនាម ជាអ្នកគ្រប់គ្រង និងកាន់ស្ថាប័នកម្មវិធីមួយរូប ស្លូតពេកអត់ អោនពេក គេមិនគោរពឱ្យតម្លៃ ស្រួលពេកគេមើលរំលង មើលងាយ ហើយប្រសិនកាចពេកគេថាយើងពិបាក មានសម្ពាធ ខំឱ្យកិត្តិយសគេពេករហូតគេគិតថា យើងខ្វះគេមិនបាន អ៊ីចឹងទើបបានជាខ្ញុំត្រូវ ធ្វើចិត្តឱ្យដូចជាកញ្ចក់មួយផ្ទាំង ធ្វើអ្វីមើលឃើញរឿងហ្នឹងនៅនឹងមុខតែម្ដង ជាសំណាងរបស់ខ្ញុំគឺជ្រើសរើស មនុស្សត្រូវ និងមិនដែលធ្វឱ្យត្រូវមានជំងឺផ្លូវអារម្មណ៍ ប៉ុន្តែការពិតក៏ពិបាកថា ព្រោះជួនកាលគេអាក្រក់នឹងអ្នក តែក៏មិនប្រាកកដថាគេមិនល្អនឹងខ្ញុំ ពេលខ្លះអាចមកពីបរិយាកាសជុំវិញក៏ថាបាន»។

គួរបញ្ជាក់ថាកាលពីយប់ថ្ងៃទី១០ លោកស្រី អ៊ឹម សុគន្ធា បានបង្ហោះសារយ៉ាងក្តៅគគុកមានអ្នកថ្លើមធំទៅប្រកួតមើលរំលងខ្លួន ជាមនុស្សអាត្មានិយម ក្មេងឈ្លើយ។ ការបង្ហោះនេះត្រូវបានទស្សនិកជនសង្ស័យថាចង់សម្តៅទៅកាន់ ប៊ី សុធារី ខណៈនាងចូលរួមប្រកួតហើយបានប្រកាសជាសាធារណៈសូមក្ដីស្រលាញ់ ជំនឿចិត្ត ឱកាស ពីពលរដ្ឋខ្មែរគ្រប់រូបជឿជាក់លើខ្លួនម្ដងទៀតដើម្បីឱ្យនាងបន្តដំណើរទៅមុខដោយយកសមត្ថភាពរបស់ខ្លួនទៅប្រកួតដណ្តើមមកុដក្នុងការតំណាងប្រទេសកម្ពុជាម្តងទៀត៕