នៅលើបណ្តាញសង្គមទិកតុកមានការចែករំលែកជាច្រើនពីតារាចម្រៀងរ៉េប វណ្ណដា និងទទួលបានការសរសើរពីហ្វេនៗបន្ទាប់ពីចូលទៅចាប់ដៃមិត្តចាស់រាក់ទាក់គ្នាសិនមុននឹងឡើងឆាកសម្តែង។ សកម្មភាពនេះបានធ្វើឱ្យទស្សនិកជនលើកឡើងថា ល្បីប៉ុណ្ណា វណ្ណដា ក៏មិនភ្លេចមិត្តចាស់ដែរ។
វីដេអូដែលបានចែករំលែកព្រោងព្រាតក្នុងកម្មវិធីកាលពីយប់ថ្ងៃទី២៥ ខែតុលា គឺគេបានឃើញវត្តមានរបស់ វណ្ណដា សម្តែងនៅក្លិបកម្សាន្តមួយនៅខេត្តព្រះសីហនុមានអ្នកគាំទ្រចោមរោមជិត បុគ្គលិក នៅទីនោះក៏ពេញចិត្តលោកចូលមកសុំថតរូបជាមួយ វណ្ណដា ខណៈ ស្រីស្អាត ឡូរីន គូស្នេហ៍ វណ្ណដា ក៏បានទៅចូលរួមនៅទីនោះដូចគ្នា។
អ្វីដែលធ្វើឱ្យអ្នកលេងបណ្តាញសង្គមជាច្រើនកើតសរសើរតារាចម្រៀងរូបនេះគឺថា វណ្ណដា ទោះបីជាល្បីកប់ពពកយ៉ាងណានៅតែរាប់អានមិត្តចាស់ មិនប្រកាន់ឬកទោះបីជាខ្លួនជាតារាចម្រៀងល្បីប្រចាំប្រទេសក៏ដោយ។ ក្នុងវីដេអូដែលបង្ហាញគេបានឃើញ វណ្ណដា ដើរសម្តៅទៅឆាកច្រៀងប៉ុន្តែបកត្រឡប់មកវិញដោយការភ្ញាក់ផ្អើលហើយដើរមកស្វាគមន៍ចាប់ដៃឱបជាមួយមិត្តចាស់របស់លោក។ នៅក្នុងវីដេអូគេបានឮសំឡេងរបស់ វណ្ណដា សួរសុខទុក្ខគ្នា។ សកម្មភាពនេះ វណ្ណដា និងមិត្តចាស់បានជួបហើយមិនភ្លេចគ្នានេះបានធ្វើឱ្យទស្សនិកជនជាច្រើនមានការរំភើបចិត្តជំនួស។
គួរបញ្ជាក់ផងដែរថា វណ្ណដា និងមិត្តរួមទ្រនំផ្សេងទៀតនឹងមានវត្តមានចូលរួមសម្តែងនៅ ពិធីបើក ការប្រកួតកីឡាជាតិលើកទី ៤ និងកីឡាជាតិជនពិការលើកទី ២ នៅថ្ងៃទី ៣០ ខែតុលា ឆ្នាំ២០២៤ ចាប់ពីម៉ោង ១៧:០០ តទៅ នៅពហុកីឡដ្ឋានជាតិអូឡាំពិក៕
