ជី ដេវីត និង ទេព បូព្រឹក្ស គ្រោងធ្វើរឿងដ៏អស្ចារ្យសម្រាប់ជាតិជាមួយនឹងការស្វាគមន៍អ្នកទស្សនា៥ម៉ឺននាក់

តារាចម្រៀង ជី ដេវីត និង ទេព បូព្រឹក្ស បានប្រកាសដំណឹងយ៉ាងអស្ចារ្យដោយអ្នកទាំងពីរគ្រោងនាំសិល្បៈកម្ពុជាឆ្ពោះទៅកាន់តំណែងមួយនៃជាតិសាសន៍អាស៊ី។ កម្មវិធីដែលអ្នកទាំងពីរគ្រោងធ្វើនេះគឺនៅពហុកីឡដ្ឋាមរតកតេជោដែលអាចផ្ទុកមនុស្សបានចំនួន៥ម៉ឺននាក់។ នេះមានន័យថាប្រសិនជាព្រឹត្តិការណ៍នេះប្រព្រឹត្តទៅ ជី ដេវីត និង ទេព បូព្រឹក្ស នឹងក្លាយជាសិល្បករដំបូងគេដែលរៀបចំកម្មវិធីយ៉ាងធំសម្បើមនៅទីនេះ។

នៅរសៀលថ្ងៃទី២២ កក្កដា តារាចម្រៀង ទេព បូព្រឹក្ស បានប្រកាសនៅលើផេកផ្លូវការថានៅថ្ងៃទី២៦ ខាងមុខនេះនាងនឹងមានដំណឹងល្អលើសពីមួយដោយឱ្យអ្នកគាំទ្រត្រៀមចិត្តត្រៀមខ្លួនចូលរួមជាសរសៃឈាមបង្កើតជាកម្លាំងជួយរុញបន្ថែមនាំសិល្បៈខ្មែរឆ្ពោះទៅកាន់តំណែងមួយជាតិសាសន៍អាស៊ី។ តារាចម្រៀងរូបនេះលើកឡើងទៀតថាទោះបីជាពេលខ្លះមាត់ថាទេ ចង់ដកថយប៉ុន្តែនាងមិនអាចក្បត់បេះដូងខ្លួនឯងបានដោយចង់ជួយជ្រោមជ្រែងសិល្បៈវប្បធម៌ក្នុងទម្រង់បុរាណលាយសម័យ។

តារាចម្រៀងទាំងពីររូបបានរំលេចពីព្រឹត្តិការណ៍ «ខ្លឹមនៃព្រះនគរ» ដោយមានផ្ទាំងទស្សនីយភាពក្នុងទម្រង់សហសម័យក្នុងទម្រង់មធ្យមតែម្តងនេះនឹងលេចរូបរាងឡើងម្តងទៀតជា ប្រវត្តិសាស្ត្រនៃការប្រគំតន្រ្តីដើម្បីបើកគេហទំព័រថ្មីនៃសិល្បៈកម្ពុជាទៅកាន់ពិភពលោក តាមរយៈការប្រគំតន្រ្តីខ្នាតអន្តរជាតិ។ ទេព បូព្រឹក្ស បញ្ជាក់ថាអ្វីដែលនឹងកើតឡើងនាពេលខាងមុខនេះគឺស្ថិតនៅស្លាកសញ្ញានៃកិត្តិនាម «G-DEVITH TO THE GLOBAL» From the Kingdom to the World ដោយនឹងជ្រើសយកទីតាំងនៃការបើក Show ទីមួយនៅ ពហុកីឡដ្ឋានជាតិមរតកតេជោជាមួយនឹងការបើកឱ្យបានការចូលទស្សនាចំនួនសរុបនៃទស្សនិកជន ៥ម៉ឺននាក់។ ផ្ទាំងទស្សនីយភាពដ៏ធំក្នុងទម្រង់សិល្បៈបុរាណមិនយឺតសម័យមិនបរទេស នៅក្នុងការប្រគំតន្រ្តីមួយនេះជាមួយនឹងទំហំពេញលេញដែលមិនធ្លាប់មានពីមុនមកជាមួយនឹងការស្រមើស្រមៃ គំនិតច្នៃប្រឌិតដ៏អស្ចារ្យឱ្យក្លាយជាការពិតនៅពេលនេះ។

ទន្ទឹមនឹងការបង្ហាញមហិច្ឆតារបស់ខ្លួនបែបនេះសិល្បករទាំងពីរក៏បានបង្ហាញថាការប្រឹងប្រែងរបស់ពួកគេអាចទទួលបានផ្លែផ្កាបានលុះត្រាតែជនរួមជាតិរួមគ្នាបង្ហាញពីឆន្ទៈនិងក្តីស្រលាញ់ទោះជាមានការមិនពេញចិត្តឬទើសទាល់ពីមុនមកក្តីដើម្បីភាពជោគជ័យនៃការ រីកមុខមាត់នៃដែនដីកម្ពុជានៅលើផែនទីសិល្បៈពិភពលោក៕