អត្ថប្រយោជន៍នៃការបរិភោគពងក្រួច

តើលោកអ្នកជ្រាបទេថា ការបរិភោគពងក្រួចផ្តល់នូវផលប្រយោជន៍យ៉ាងច្រើនដល់សុខភាពមិនចាញ់ពងមាន់ទេ ហើយថែមទាំងមានរសជាតិឆ្ងាញ់ទៀតផង ។ អ្នកពុំចូលចិត្តពងមាន់ គឺអាចបរិភោគពងក្រួចជំនួសបាន ហើយគេអាចយកពងក្រួចទៅធ្វើជាអាហារជាច្រើនប្រភេទ ឬយកទៅស្ងោរបរិភោគក៏បាន ។

ការបរិភោគពងក្រួចបានផ្តល់ផលប្រយោជន៍ដល់សុខភាពបេះដូង និងសរសៃឈាម, ជួយដល់ការធ្វើការរបស់ខួរក្បាល ហើយវាជាជម្រើសល្អសម្រាប់អ្នកពុំចូលចិត្តបរិភោគពងមាន់ ។ លើសពីនេះ វាផ្តល់ផលប្រយោជន៍ច្រើនដល់ស្ត្រីមានផ្ទៃពោះ, កុមារ និងមនុស្សចាស់ ។

ខាងក្រោមនេះ គឺជាផលប្រយោជន៍ផ្នែកសុខភាពរបស់ពងក្រួច ៖

១-ជួយបង្កើនការចងចាំ ៖ ពងក្រួចផ្ទុកនូវសារធាតុកូលីនពាក់ព័ន្ធនឹងការបញ្ជាប្រព័ន្ធប្រសាទ ដែលអាចជួយបង្កើនការចងចាំបានល្អ ឬចងចាំរយៈពេលយូរ ជាពិសេស វាជួយបង្កើនការចងចាំសម្រាប់មនុស្សចាស់ ។

២-មានកូឡេស្តេរ៉ូលល្អ ៖ ក្នុងពងក្រួចមានបរិមាណពងក្រហមខ្ពស់ជាងពងមាន់ និងមានសារធាតុ HDL ច្រើន ដែលសារធាតុនេះអាចជួយកាត់បន្ថយកម្រិត LDL និងធ្វើឱ្យកូឡេស្តេរ៉ូលល្អ ។

៣-ជួយដល់ការលូតលាស់សាច់ដុំ ៖ ពងក្រួចមានជាតិខ្លាញ់ និងប្រូតេអ៊ីន ដែលអាចជួយដល់ការធ្វើចលនាសាច់ដុំ និងការលូតលាស់ ។

៤-ជួយសុខភាពស្ត្រីមានផ្ទៃពោះ ៖ ពងក្រួចផ្តល់នូវសារធាតុបំប៉នយ៉ាងពិសេសសម្រាប់ស្ត្រីមានផ្ទៃពោះ ពីព្រោះនៅក្នុងពងក្រួចមានសារធាតុហ្វីលិក ដែលមានសារៈសំខាន់សម្រាប់សុខភាពខួរក្បាលរបស់ទារកក្នុងផ្ទៃ និងការអភិវឌ្ឍឆ្នឹងខ្នង ។

៥-ជួយការពារជំងឺស្លេកស្លាំង ៖ ពងក្រួចមានបរិមាណជាតិដែកច្រើន ហើយបើរួមគ្នាជាមួយវីតាមីន B នោះ គឺវានឹងអាចការពារជំងឺស្លេកស្លាំង ដោយសារជំងឺស្លេកស្លាំងកើតឡើងដោយសារការខ្វះជាតិដែក ឬខ្វះវីតាមីន B ។

៦-ជួយសុខភាពស្បែក និងសរសៃសក់ ៖ ពងក្រួចផ្តល់នូវប្រូតេអ៊ីន, ខ្លាញ់, វីតាមីន និងខលឡាជេន ដើម្បីជួយដល់សុខភាពស្បែក និងសរសៃសក់ ។

៧-ជួយកាត់បន្ថយភាពតានតឹង ៖ ពងក្រួចអាចផលិតសារធាតុពាក់ព័ន្ធនឹងសរសៃប្រសាទ, សារធាតុសេរ៉ូណូលីន និងតូប៉ាមីន ដើម្បីកាត់បន្ថយភាពតានតឹង ។

៨-ជួយដល់ការមើលឃើញរបស់ភ្នែក ៖ ពងក្រួចមានវីតាមីន A ជួយថែទាំសុខភាពភ្នែក និងបង្កើនការមើលឃើញនៅពេលយប់ ។ លើសពីនេះ វាអាចជួយការពារកុំឱ្យខូចភ្នែកមុនអាយុផងដែរ ។

៩-ជួយការពារជំងឺមហារីក ៖ ការបរិភោគពងក្រួចអាចជួយការពារជំងឺមហារីក ដោយសារវាផ្ទុកនូវសារធាតុ Lysozyme ។

១០-ជួយសុខភាពមនុស្សចាស់ ៖ ការបរិភោគពងក្រួចអាចជួយពន្យារភាពចាស់របស់អ្នកអាយុច្រើន, កាត់បន្ថយការឈឺចាប់តាមសន្លាក់, ជួយឱ្យឆ្អឹងរឹងមាំ, ជួយឱ្យភ្នែកមើលឃើញកាន់តែច្បាស់ និងត្រចៀកស្តាប់ឮ ។

ការរៀបរាប់ពីផលប្រយោជន៍របស់ពងក្រួចខាងលើនេះ គ្រាន់តែជាការដកស្រង់មកខ្លះៗប៉ុណ្ណោះ ប៉ុន្តែពងក្រួចបានផ្តល់ផលប្រយោជន៍ដល់សុខភាពជាច្រើនទៀត បើទោះជាវាមានទំហំតូចជាងពងមាន់ក្តី ៕