តារាចម្រៀងមានសំឡេងស្អកដ៏ពីរោះជក់ចិត្ត ខេម បានបង្ហាញពីអារម្មណ៍របស់ខ្លួនបញ្ជាក់ទៅកាន់មហាជនក្រោយពីមានពាក្យចចាមអារ៉ាមថាលោកទទួលបានងារជា «ឧកញ៉ា» ខណៈរងនូវពាក្យប្រមា.ថរិះគ.ន់ពីបណ្តាអ្នកលេងបណ្តាញសង្គមមួយចំនួន។ ខេម ថាងារជា ឧកញ៉ា មិនអាក្រក់នោះទេ ប៉ុន្តែបើមិនចេញពីមាត់លោកកុំអាលជឿ។
ខេម ជាតារាចម្រៀងម្នាក់ដែលមានសំឡេងស្អកហើយចាប់ផ្តើមមានភាពល្បីល្បាញតាំងពីចេញបទចម្រៀងដំបូងមានចំណងជើងថា «បេះដូងអើយ» ក្នុងផលិតកម្មថោន។ ទោះយ៉ាងណា លោកបានផ្លាស់ប្តូរទៅទ្រនំហ្គាឡាក់ស៊ីវិញនិងបានចាប់ដៃគូជាមួយតារាចម្រៀង តន់ ច័ន្ទសីម៉ា មានបទចម្រៀងទាំងទោលនិងគូល្បីល្បាញជាច្រើនបទមុននឹងបច្ចុប្បន្នហាក់មានការមិនពេញចិត្តពីអ្នកមួយចំនួន។
ថ្មីៗនេះទៀតសោត តារាចម្រៀង ខេម ក្លាយជាផ្ទាំងស៊ិបពីអ្នកលេងបណ្តាញសង្គមមួយចំនួនក្រោយពីមានដំណឹងថាលោកត្រៀមទទួលងារជាឧកញ៉ា ជាអ្នកបន្ទាប់ពីរៀមច្បងក្នុងទ្រនំដូចជា ឧកញ៉ា ព្រាប សុវត្ថិ និង ឧកញ៉ា ខេមរៈ សិរីមន្ត។ ពាក្យចចាមមអារ៉ាមនេះ ខេម បានចេញមកបញ្ជាក់និងបង្ហាញអារម្មណ៍របស់ខ្លួនទាក់ទងនឹងបញ្ហានេះ។ 
នាយប់ថ្ងៃទី២២ ខែកញ្ញា តារាចម្រៀង ខេម បានបង្ហោះរូបមួយសន្លឹកស្ថិតក្នុងសំលៀកបំពាក់កីឡា ដោយបានដាក់ខ្លឹមសារថា«បងប្អូនជាទីស្រលាញ់ ថ្ងៃនេះសូមបញ្ចេញអារម្មណ៍ពិតមួយ ។ មួយរយៈនេះមានព័ត៌មានជាច្រើនចុះពីខ្ញុំទទួលបានងារជា ឧកញ៉ា
ខ្លះក៏ចុះថារៀបចំទទួលហើយ តើព័ត៌មានទាំងអស់នេះបានសំដីមកពីណាហើយបងប្អូនមួយចំនួនក៏ជឿស្លុងតាមព័ត៌មាននោះ ខ្លះក៏បានជេរប្រមាថខ្ញុំ អ្នកខ្លះក៏អបអរសាទរ ហេតុអីមិនសួរខ្ញុំផងថាតើខ្ញុំយ៉ាងមិចហើយ ហើយខ្ញុំរាល់ថ្ងៃចឹងដូចគេប្រាប់ទេ រស់នៅចំណុចណា រាល់ថ្ងៃខ្ញុំជាអ្នកចម្រៀងម្នាក់ ហើយជាប្រជាជនធម្មតាដូចបងប្អូនដែរ។ បញ្ជាក់ : ងារជា – ឧកញ៉ា វាមិនអាក្រក់នោះទេ – ប៉ុន្តែរាល់ព័ត៌មានដែលមិនចេញពីមាត់ខ្ញុំសូមបងប្អូនកុំទាន់ជឿអី អាចសួរខ្ញុំបាន»។ ក្នុងនោះដែរ ខេម ថាមិនបន្ទោសដែលជឿលើរឿងនេះនោះទេ ប៉ុន្តែចង់ដាស់ស្មារតីទៅដល់អ្នកដែលកុំតែផលប្រយោជន៍ខ្លួនបំភ្លៃការពិតគួរបញ្ឈប់សកម្មភាពនេះ។
គួរបញ្ជាក់ថា ខេម មានឈ្មោះពិតថា ប៉ុន សុណារិន ជាអ្នកខេត្តកំពង់ឆ្នាំង មុននឹងក្លាយជាតារាចម្រៀងមានប្រវត្តិជាអ្នករត់ម៉ូតូឌុប។ បច្ចុប្បន្នលោកមានវ័យ៣៩ឆ្នាំ និងមានគូស្នេហ៍ជាអនិកជនរស់នៅប្រទេសបារាំង៕
