មរណ.ភាពរបស់ ឡុង លីសុង និងគូណ្តឹង ដោយដៃអតីតឧកញ៉ា ស្រី ស៊ីណា បានធ្វើឱ្យមហាជនតក់ស្លុតយ៉ាងខ្លាំង ខណៈពេលនេះមហាជន ពិធីករ ជា វណ្ណារិទ្ធ រួមទាំងអ្នកសិល្បៈជាច្រើនរូបទាមទារយុត្តិធម៌ជូនជនរងគ្រោះព្រោះតែមិនពេញចិត្តចំពោះការសម្រេចរបស់តុលាការទៅលើការកាត់ទោសជនល្មើសឱ្យជាប់គុកពី១០ទៅ១៥ឆ្នាំ។ ពិធីកររូបនេះថាអំពើនេះឃោរឃៅណាស់មិនអាចជាប់ទោសត្រឹមតែ១០ទៅ១៥ឆ្នាំទេ។
នាថ្ងៃទី២៣ មិថុនា សាលាដំបូងរាជធានីភ្នំពេញ ចេញសេចក្តីប្រកាសស្តីពីការចោទប្រកាន់និងចំណាត់ការនិតិវិធីលើសំណុំរឿងពាក់ព័ន្ធនឹងអំពើឃាតកម្មប្រពឹត្តដោយឈ្មោះ ស្រី ស៊ីណា។ដោយផ្អែកលើអង្គហេតុកាលពីថ្ងៃទី១៧ មិថុនា ការពិនិត្យភស្តុតាង របាយការណ៍សន្និដ្ឋានរបស់សមត្ថកិច្ចនិងបានសាកសួរគ្រប់បុគ្គលពាក់ព័ន្ធបានធ្វើការសន្និដ្ឋានថាអំពើនេះជាអំពើឃាតកម្មដោយពុំមានធាតុផ្សំជាអំពើឃាតកម្មគិតទុកជាមុនតាមការកំណត់នៃច្បាប់នោះទេដោយមុនមានការបាញ់ប្រហារទៅលើជនរងគ្រោះគឺមានការជជែកឈ្លោះប្រកែកគ្នាពុំមានភស្តុតាងផែនការនៃការរៀបចំសម្លាប់។ 
តំណាងអយ្យការ បានចោទប្រកាន់ករណីនេះជា ០២ (ពីរ) សំណុំរឿង ដោយ៖
សំណុំរឿងទី១ (ជនរងគ្រោះស្លាប់ពីរនាក់) បានធ្វើការចោទប្រកាន់ឈ្មោះ ស្រី ស៊ីណា ពីបទ “ឃាតកម្ម និងប្រើប្រាស់អាវុធដោយគ្មានការអនុញ្ញាត” ដែលទណ្ឌកម្មក្នុងសំណុំរឿងនេះ ជនត្រូវចោទប្រឈមនឹងការផ្តន្ទាទោស រហូតដល់ ១៥ (ដប់ប្រាំ) ឆ្នាំ។
សំណុំរឿងទី២ (ជនរងគ្រោះរបួសពីរនាក់) បានធ្វើការចោទប្រកាន់ឈ្មោះ ស្រី ស៊ីណា ពីបទ “ប៉ុនប៉ងឃាតកម្ម និងប្រើប្រាស់អាវុធដោយគ្មានការអនុញ្ញាត” ដែលទណ្ឌកម្មក្នុងសំណុំរឿងនេះ ជនត្រូវចោទប្រឈមនឹងការផ្តន្ទាទោស រហូតដល់ ១៥ (ដប់ប្រាំ) ឆ្នាំ។
ទោះជាយ៉ាងណាក៏ដោយ ការសម្រេចរបស់តុលាការសម្រាប់ជនល្មើស ស្រី ស៊ីណា ជាប់គុករយៈពេល១៥ឆ្នាំពុំបានធ្វើឱ្យមហាជនស្ងប់ចិត្តនោះទេ ខណៈបច្ចុប្បន្នអ្នកក្នុងចង្កោមសិល្បៈកំពុងទាមទាររកយុត្តិធម៌ជូនជនរងគ្រោះ។ 
នៅថ្ងៃទី២៤ ខែមិថុនា លោក ជា វណ្ណារិទ្ធ ពិធីករដ៏មានប្រជាប្រិយភាពបានបង្ហោះថា «ត្រូវការយុត្តិធម៌ជូន ប្អូនទាំងពីរ និងអ្នករងរបួសផ្លូវកាយ និង ផ្លូវចិត្ត
ឃោរឃៅណាស់ មិនមែន ១០-១៥ឆ្នាំទេ ដោយបានដាក់ហាសថេកឈ្មោះ លីសុងនិងកញ្ចនា ។ មិនត្រឹមតែពិធិកររូបនេះប៉ុណ្ណោះប៉ុន្តែប្រជាជនរាប់ពាន់នាក់មានការគាំទ្រ ខណៈអ្នកបង្កើតមាតិកា ឃ្យូវីន អ្នកនាង ប្រាសាទ ដាវីន សេង សុខឃីម ផលិតករ ហ៊ុយ យ៉ាឡេង សុទ្ធតែគាំទ្រ និងចែករំលែកបន្តនូរសំណេររបស់លោក ជា វណ្ណារិទ្ធ៕
