តារាមានមុខមិនស្អាត មុខចាស់ រួមទាំងមតិយោបល់ជាច្រើនទៀតបានកើតឡើងទៅលើតារាចម្រៀង ឆន សុវណ្ណារាជ បន្ទាប់ពីខ្សែភាពយន្តខ្មែរមួយបានចាក់បញ្ចាំង។ យ៉ាងណាមិញ តារាចម្រៀង ពេជ្រ សោភា បានចេញមកទម្លាយមូលហេតុផ្ទៃមុខរបស់តារាប្រុសរូបនេះមិនស្អាតថាលោកជួបប្រទះបញ្ហាសុខភាព ម្តាយខូច ស្ត្រេសខ្លាំង រួមទាំងថារឿងមេឆាបានថតជាយូរមកហើយតែទើបតែចាក់បញ្ចាំង។
ប្រិយមិត្តមួយចំនួនធំជ្រាបមកហើយថា តារាចម្រៀង ឆន សុវណ្ណារាជ ត្រូវបានអ្នកលេងបណ្តាញសង្គមមួយចំនួនបញ្ចេញមតិរិះគន់ស្ពឹកទៅលើសម្រស់ផ្ទៃមុខរបស់លោកថាមិនស្អាត មិនរលោង ឃើញរន្ធញើសធំៗ និងបានលើកឡើងទៀតថាម្តេចមិនរកតួណាមានមុខស្អាតជាងនេះ។ ការបញ្ចេញមតិរបស់ទស្សនិកជនធ្វើឡើងក្រោយពីទស្សនាខ្សែភាពយន្តខ្មែរមានចំណងជើងថា «មេឆា» របស់ស្ថានីយទូរទស្សន៍ហង្សមាស ដែលមានតួធំកញ្ញា មាន សូនីតា តារាចម្រៀងហ្សូណូ រួមទាំងលោក ឆន សុវណ្ណារាជ ផងដែរ។
យ៉ាងណាមិញមតិរិះគន់រឿងសម្រស់របស់ ឆន សុវណ្ណារាជ សាមីខ្លួនផ្ទាល់មិនបង្ហាញអារម្មណ៍ឆ្លើយតបអ្វីទៅកាន់អ្នករិះគន់លោកឡើយ ប៉ុន្តែគេឃើញមានអ្នកសិល្បៈផ្សេងទៀតបានលើកឡើងថាតារាក៏ចេះចាស់ដែរមិនអាចមានសម្រស់អមតៈបាននោះទេ។.png)
ទន្ទឹមនឹងនេះដែរ កាលពីកន្លងទៅនេះតារាចម្រៀង ពេជ្រ សោភា ដៃគូយ៉ាងស្និទ្ធស្នាលរបស់ ឆន សុវណ្ណារាជ ចេញមកបញ្ជាក់ពីមូលហេតុដែលនាំឱ្យតារាចម្រៀងប្រុសរូបនេះមិនមានមុខរលោងស្រស់ស្អាត។ នៅក្នុង Story អ្នកនាង ពេជ្រ សោភា បាននិយាយថា «កំលុងពេល ឆន សុវណ្ណារាជ ថតរឿងហ្នឹងគឺតំណាលគ្នានឹងខ្លួននាងថតបទចម្រៀង «ទ្វារបេះដូង» ដែលពេលហ្នឹង ឆន សុវណ្ណារាជ អត់មានសុខភាពល្អនោះទេ។ ពេលកំពុងថតរឿង លោកត្រូវទៅពេទ្យនៅក្រៅប្រទេសដែលតារាចម្រៀងរូបនេះមានជំងឺប្រចាំខ្លួនត្រូវឡើងទៅពេទ្យញឹកញាប់ មានបញ្ហាស្រ្តេសច្រើនហើយលោកក៏មានបញ្ហាបាត់បង់សមាជិកក្នុងគ្រួសារ បាត់បង់ម្តាយ។ អ្នកនាង ពេជ្រ សោភា ថាសាកគិតមើលទៅអារម្មណ៍ពេលហ្នឹងបែបមិច ហើយរឿងហ្នឹងថតយូរហើយ មិនមែនទើបតែថតនោះទេហើយយកពីមុននិងឥឡូវមកប្រៀបធៀបគ្នាវាមិនស្មើគ្នានោះទេ»។
លោក ឆន សុវណ្ណារាជ ជាតារាចម្រៀងមួយដួងក្នុងទ្រនំហង្សមាសដែលក្តោបឱកាសធ្វើជាគណៈកម្មការ គ្រូបង្វឹក ក្នុងកម្មវិធីប្រកួតគ្រប់កម្មវិធីធំៗ ជាក់ស្តែងពេលនេះលោកបានធ្វើជាគណៈកម្មការក្នុងកម្មវិធី Beat The Best ខណៈកម្មវិធី Cambodian Idol រដូវកាលទី៥ ក៏លោកធ្វើជាគណៈកម្មការផងដែរ។ ក្រៅពីទីផ្សារចម្រៀង គណៈកម្មការក្នុងការប្រកួត ឆន សុវណ្ណារាជ ក៏បានចូលរួមសម្តែងក្នុងខ្សែភាពយន្តហង្សមាសមួយចំនួនដូចជា«ខ្ញុំមានញាណលើស» «ចំណតថ្មីនៃសុភមង្គល» និង រឿង«មេឆា »ដែលចាក់បញ្ចាំងក្នុងឆ្នាំ២០២៤នេះ៕
