ប្រទេសថៃ ៖ សារព័ត៌មានថៃបានផ្សព្វផ្សាយ កាលពីថ្ងៃទី១៤ ខែមីនា ឆ្នាំ២០២៤ ថា រដ្ឋមន្ត្រីក្រសួងអប់រំប្រទេសថៃ លោក Permpoon Chidchob បានលើកឡើងបន្ទាប់ពីកិច្ចប្រជុំនាយកគ្រប់គ្រងក្នុងក្រសួងអប់រំថា ថៃត្រៀមចុះ «ពិធីសំពះគ្រូ» ជាបេតិកភណ្ឌវប្បធម៌ជាមួយអង្គការយូណេស្កូ (UNESCO) ពីព្រោះវាជាប្រពៃណីមួយផ្តល់នូវអត្ថន័យអប់រំដ៏ល្អ ដែលប្រទេសថៃគួរតែផ្តល់ភាពសំខាន់ឱ្យខ្លាំងជាងនេះ ។
កាលពីថ្ងៃទី១៣ ខែមីនា ឆ្នាំ២០២៤ រដ្ឋមន្ត្រីក្រសួងអប់រំថៃ លោក Permpoon Chidchob បានលើកឡើងថា ពិធីសំពះគ្រូនៅប្រទេសថៃ គឺជាប្រពៃណីមួយមានអត្ថន័យអប់រំល្អ ដែលថៃត្រូវតែផ្តល់ភាពសំខាន់ និងរៀបចំពិធីនេះឱ្យក្លាយជាប្រព័ន្ធ ។ បច្ចុប្បន្ន ក្រសួងអប់រំបានរៀបចំឯកសារលម្អិតផ្សេងៗ ដើម្បីស្នើឱ្យអង្គការយូណេស្កូប្រកាសថា ពិធីសំពះគ្រូ គឺជាបេតិកភណ្ឌវប្បធម៌របស់មនុស្សជាតិ ។.jpg)
រដ្ឋមន្ត្រីក្រសួងអប់រំថៃ លោក Permpoon លើកឡើងថា ពិធីសំពះគ្រូ គឺជាប្រពៃណីមួយមានអត្ថន័យល្អ ដែលប្រទេសនានានៅលើពិភពលោក តែងតែផ្តល់ភាពសំខាន់ និងទទួលស្គាល់ ហើយមិនមែនប្រទេសថៃធ្វើពិធីសំពះគ្រូ ដោយគ្មានអត្ថន័យនោះទេ ។ ហេតុនេះ យើងមានគោលបំណងរក្សានូវការទទួលបានចំណេះដឹង និងជំនាញ ព្រមទាំងទទួលស្គាល់ថា វាជាផ្នែកមួយរបស់សម្បត្តិបេតិកភណ្ឌវប្បធម៌របស់ថៃ ដូចគ្នានឹងពិធីបុណ្យសង្ក្រាន្ត, ល្ខោនខោល, ម៉ាស្សាថៃ និងរបាំ Menora ។
លោក Permpoon សង្កត់ធ្ងន់ថា ៖ «ប្រទេសថៃត្រៀមចុះពិធីសំពះគ្រូ ជាបេតិកភណ្ឌវប្បធម៌ជាមួយអង្គការយូណេស្កូ គឺថៃគ្រោងដំណើរការរយៈពេលប្រមាណ៦ខែ ពីព្រោះយើងត្រូវយកចិត្តទុកដាក់ និងពិនិត្យឯកសារឱ្យបានគ្រប់ជ្រុងជ្រោយ ដើម្បីឱ្យពិភពលោកយល់ព្រមទទួលស្គាល់ពិធីនេះ ។ ការរៀបចំពិធីសំពះគ្រូ គឺក្នុងគោលបំណងឱ្យកូនសិស្សទាំងអស់ដឹងគុណគ្រូបង្រៀនអស់មួយជីវិត និងតាំងចិត្តរៀនសូត្រផងដែរ» ៕
