ចន សុទីម៉ា Miss Universe Cambodia 2023 បានធ្វើឱ្យអ្នកគាំទ្រចាប់អារម្មណ៍ខ្លាំងបន្ទាប់ពីបង្ហាញខ្លួនក្នុងឈុតរាត្រីស្រមោលសពណ៌ខ្មៅ បញ្ចេញដើមទ្រូងយ៉ាងស្រស់ស្អាតមិនវាលពេកចូលរួមក្នុងកម្មវិធី Miss Global 2023។
មិនសូវជាបង្ហាញខ្លួនញឹកញាប់នៅលើបណ្តាញសង្គមស្រាប់តែ ចន សុទីម៉ា លេចមុខចូលរួមក្នុងវគ្គផ្តាច់ព្រ័ត្រ Miss Global 2023 នៅលើទឹកដីកម្ពុជានាយប់ថ្ងៃទី១៨ មករា សម្រស់ ចន សុទីម៉ា បានឆាបឆក់បេះដូងទស្សនិកជនយ៉ាងខ្លាំងសូម្បីតែពិធីករលោក Nicolas Fowler ក៏សរសើរសម្រស់របស់នាងដូចគ្នា។ ចន សុទីម៉ា បានស្លៀកឈុតរ៉ូបរាត្រីស្រមោលសពណ៌ខ្មៅអមដោយក្បូរក្បាច់រចនា និងបញ្ចេញល្វែងលើ រួមជាមួយគ្រឿងអលង្ការបន្តិចទៀតកាន់តែធ្វើឱ្យសម្រស់ ចន សុទីម៉ា លេចធ្លោខ្លាំង។
ការបង្ហាញខ្លួនលើកនេះបានធ្វើឱ្យអ្នកគាំទ្រសរសើរសម្រស់របស់ Miss Universe Cambodia 2023 រូបនេះដូចគ្នាព្រមទាំងលើកឡើងទៀតថាបើកាលពី សុទីម៉ា ស្លៀកឈុតនេះនៅក្នុងការប្រកួតលើឆាកអន្តរជាតិនាពេលកន្លងមកច្បាស់ជាលេចធ្លោខ្លាំងជាក់ជាមិនខាន។
គួរបញ្ជាក់ថា ចន សុទីម៉ា Miss Universe Cambodia 2023 គឺជាបវរកញ្ញា ដែលទទួលបានការគាំទ្រពីទស្សនិកជនច្រើន ជាពិសេសអំឡុងពេលតំណាងប្រទេសចូលរួមប្រកួតលើឆាកអន្តរជាតិ។ ទាំងសមត្ថភាព ការរៀបចំខ្លួន សមនឹងកម្មវិធីទទួលបានការចាប់អារម្មណ៍ច្រើនពីសាសន៍ដទៃ។ ទោះបីជាលទ្ធផលមិនដូចការរំពឹងទុករបស់អ្នកគាំទ្រកម្ពុជាក្តីប៉ុន្តែអ្នកគាំទ្រទទួលស្គាល់សមត្ថភាពរបស់នាង។
ចន សុទីម៉ា ធ្លាប់ចូលរួមប្រកួតនៅក្នុងកម្មវិធី Miss Grand Cambodia 2017 ជាប់លំដាប់រងទី២ , Miss Tourism International 2019ជាប់TOP5 , Miss Universe Cambodia 2019 ជាប់លំដាប់រងទី២ និងក្លាយជា Miss Universe Cambodia 2023 ចូលរួមប្រកួត Miss Universe លើកទី៧២ នៅប្រទេស El Salvador កាលពីខែវិចិ្ឆកា ឆ្នាំ២០២៣ កន្លងមក៕
