លោកជំទាវឧកញ៉ា «នឹម វណ្ណៈ» ថាឱ្យតែពូកែលាបពណ៌ «ខ្មែរមួយជីវិត» តទៅមុខលែងមានអ្នកចេញមុខកែតម្រូវបុគ្គលល្បី

នៅតែមានភាពចម្រូងចម្រាស់មិនទាន់ស្ងប់នៅឡើយទេទៅលើពាក្យសម្តីរបស់ «ខ្មែរមួយជីវិត» ទៅកាន់រៀមច្បងឧកញ៉ា ព្រាប សុវត្ថិ និងឧកញ៉ា ខេមរៈ សិរីមន្ត។ ខណៈមានការវឹកវរជាច្រើនថ្ងៃនៅមិនទាន់ស្ងប់លោកជំទាវឧកញ៉ា នឹម វណ្ណៈ បានបញ្ចេញមតិយោបល់ផ្ទាល់ខ្លួនពីចេតនាល្អរបស់ ខ្មែរមួយជីវិត ទៅកាន់រៀមច្បងប៉ុណ្ណោះមិនមែនជាការហួងហែងតន្ត្រីរ៉េប និងចង់តោងល្បីនោះទេ។ លោកជំទាវឧកញ៉ា បន្ថែមថាឱ្យតែពូកែលាបពណ៌បែបនេះតទៅមុខលែងមានអ្នកណាហ៊ានចេញមុខកែតម្រូវបុគ្គលល្បីហើយ។

ចាប់តាំងពីថ្ងៃតារាចម្រៀងឧកញ៉ា ខេមរៈ សិរីមន្ត ចេញមកប្រតិកម្មពាក្យសម្តីរបស់ខ្មែរមួយជីវិតកាលពីថ្ងៃទី១២ មករា មកទល់នឹងថ្ងៃទី១៧ មករា រឿងរ៉ាវចម្រូវចម្រាសនេះនៅមិនទាន់បញ្ចេញដោយលេចមុខសិល្បករជាច្រើនរូបបានចេញមតិយោបល់ទៅលើរឿងនេះ។ ទោះជាយ៉ាងណាមកទល់ពេលនេះឧកញ៉ា ខេមរៈ សិរីមន្ត កំពុងរង់ចាំនឹងចង់ឃើញ ខ្មែរមួយជីវិត កែតម្រូវនៅរាល់ពាក្យពេចន៍របស់ខ្លួនឡើងវិញ។

ទន្ទឹមនឹងសភាពនៅលើបណ្តាញសង្គមវឹកវរខ្លាំងនៅក្នុងវិស័យតន្រ្តីកម្តៅនៅមិនទាន់ថមថយនៅឡើយលោកជំទាវឧកញ៉ា នឹម វណ្ណៈ ស្រ្តីជំនួញដ៏ជោគជ័យបានបញ្ចេញមតិយោបល់ផ្ទាល់ខ្លួនទៅលើពាក្យសម្តីរបស់ ខ្មែរមួយជីវិត គឺមានចេតនាល្អចំពោះរៀមច្បងទាំងពីរប៉ុណ្ណោះ។
លោកជំទាវឧកញ៉ា បានសរសេរនៅលើបណ្តាញសង្គមនៅយប់ថ្ងៃទី១៦ មករា ថា «ជាមតិរបស់ខ្ញុំ ខ្ញុំបានស្តាប់ប្អូនខ្មែរមួយជីវិតគាត់និយាយ និងបកស្រាយគឺគាត់ចង់ឃើញតារាជើងចាស់ល្បីល្បាញនៅក្នុងស្រុករក្សាតំណែងជាតារាលំដាប់កំពូលនៃជំនាញរបស់គាត់ ដើម្បីជាតំណាងប្រទេសដូចប្រទេសដទៃ។ បើពួកគាត់ឡើងដល់ចំណុចកំពូលទៅហើយ មកចង់សាងភាពល្បីល្បាញតាមរយៈ rap ដូចក្មេងៗជំនាន់ក្រោយវាមិនសូវស័ក្តិសមនឹងតម្លៃនៃកេរ្តិ៍ឈ្មោះរបស់ពួកគាត់ឡើយ ព្រោះវាហាក់បីដូចជាការសាងកេរ្តិ៍ឈ្មោះតាមពីក្រោយ rapper ក្មេងៗ ដែលទើបនឹងមានឈ្មោះល្បីដែលការrapនេះមិនមែនជាជំនាញរបស់ពួកគាត់ទៅទៀត។ នេះគ្រាន់តែជាមតិរបស់គាត់ តែគាត់ស្រលាញ់បងព្រាប សុវត្ថិ និង ប្អូនខេមរៈ សេរីមន្តដែលជារាមច្បង បើតាមការនិយាយរបស់គាត់នៅពេលនោះ»។

លោកជំទាវឧកញ៉ា នឹម វណ្ណៈ បន្តទៀតថា «ប៉ុន្តែម្នាក់ៗទៅជាគិតថា ខ្មែរមួយជីវិតហួងហែងតន្ត្រីrap និងចង់តោងល្បីទៅវិញ។ ឱ្យតែពូកែលាបពណ៌គ្នាអ៊ីចឹងតទៅមុខទៀតគ្មាននរណាហ៊ានចេញនិយាយកែតម្រូវបុគ្គលល្បីៗនោះឡើយ»។

ប្រធានក្រុមប្រឹក្សាភិបាល ក្រុមហ៊ុន អេស៊ីអ៊ី គ្រុប សង្កត់ធ្ងន់ថា «សូមញែកឱ្យដាច់រវាងការបញ្ចេញមតិកែតម្រូវ ការបញ្ចេញមតិបែបបរិហារកេរ្តិ៍ និង ញ៉ុះញ៉ុង់ឱ្យមានការរើសអើង»។

សូមបញ្ជាក់ផងដែរថា បន្ទាប់ពីរៀមច្បងឧកញ៉ា ខេមរៈ សិរីមន្ត បញ្ចេញប្រតិកម្មមិនពេញចិត្តចំពោះសម្តីខ្លួន ខ្មែរមួយជីវិត ក៏បានបង្ហោះសំណេរបកស្រាយពីចេតនារបស់ខ្លួនដូចគ្នាកាលពីថ្ងៃទី១៣ មករា ផតខាសដែលលោកបាននិយាយគ្រាន់តែជាការយល់ឃើញមតិផ្ទាល់ខ្លួន ហើយក៏គ្មានបំណងទៅបិទសិទ្ធិ ឬបញ្ជាឱ្យរៀមច្បងច្រៀងតាមចិត្តលោកចង់បាននោះទេ៕