កម្មវិធីពេលព្រឹកនៃពិធីមង្គលការរបស់លោកស្រី ទ្រី ដាណា និងលោក រស់ រាជ្ជសាល មានអ្នកសិល្បៈល្បីៗនិងអ្នកជំនួញអនឡានជាច្រើនរូបចូលរួម ហើយអ្វីដែលមហាជននឹកស្មានមិនដល់នោះគឺលេចវត្តមានរបស់អ្នកនាង ស្រីអូន ចូលរួមពិធីមង្គលនេះដូចគ្នាទាំងកាលពីមុនអ្នកទាំងពីរមានបញ្ហានឹងគ្នាវាយប្រហារទីផ្សារអនឡាញលើបណ្តាញសង្គម។
នៅថ្ងៃទី៣ ខែវិច្ឆិកា ឆ្នាំ២០២៣ គឺជាថ្ងៃសិរីសួស្តីជ័យមង្គលគូស្វាមីភរិយាថ្មី ថៅកែពេជ្រ ទ្រី ដាណា និងលោក រស់ រាជ្ជសាល ជាម៉ូដែលសម្បូរសាច់ដុំកង់ៗ ដោយមានការរៀបចំពិធីយ៉ាងអធិកអធមក្រោមវត្តមានអ្នកមានមុខមាត់ក្នុងសង្គម តារាប្រុសស្រីច្រើនរូប រួមទាំងអ្នកជំនួញអនឡាញល្បីៗជាច្រើនចូលរួមផងដែរ។
អ្វីដែលធ្វើឱ្យអ្នកលេងបណ្តាញសង្គមមានការចាប់អារម្មណ៍យ៉ាងខ្លាំងនោះកម្មវិធីពេលព្រឹកពិធីមង្គលការនេះលេចវត្តមានអ្នកនាង ស្រីអូន ថៅកែសម្រស់ធម្មជាតិចូលរួមផងដែរធ្វើឱ្យអ្នកតាមដានស្រឡាំងកាំង និងបានក្លាយជាប្រធានបទជជែកយ៉ាងច្រើននៅលើបណ្តាញសង្គម។ ភាពភ្ញាក់ផ្អើលចំពោះវត្តមានរបស់ ស្រីអូន ចូលរួមពិធីមង្គលការលោកស្រី ទ្រី ដាណា នេះដោយសារតែកាលពីមុនអ្នកជំនួញទាំងពីររូបនេះប៉ះពារគ្នាទៅលើទីផ្សារអនឡាញយ៉ាងក្តៅគគុកបញ្ចេញផលិតផលស្រដៀលៗគ្នាដេញជើងគ្នាយ៉ាងខ្លាំង។
ទន្ទឹមនឹងភាពភ្ញាក់ផ្អើលនេះផងដែរអ្នកលេងបណ្តាញសង្គមក៏សង្កេតឃើញថាពេលនេះអ្នកនាង ស្រីអូន ចាប់ផ្តើមស្រស់ស្រាយឡើងវិញហើយបន្ទាប់ពីជួបបញ្ហានាពេលកន្លងមកដោយក្នុងពិធីមង្គលការ អ្នកនាង ស្រីអូន និងលោកស្រី ទ្រី ដាណា បានជជែកគ្នាប្រកបដោយស្នាមញញឹមទៅវិញទៅមកដោយបំភ្លេចចោលបញ្ហារបស់អ្នកទាំងពីរកន្លងមក ខណៈអ្នកនាង ស្រីអូន ក៏បានចូលទៅកាត់សក់បង្កក់សិរីសួស្តីដល់គូស្វាមីភរិយាមួយគូនេះដូចគ្នា៕
