ប្រទេសថៃ ៖ កាលពីថ្ងៃទី២២ ខែវិច្ឆិកា ឆ្នាំ២០២៣ នៅពេលគ្រូបង្រៀន និងកូនសិស្សប្រមាណ១០០នាក់របស់សាលារៀន «បានណាមផុ ហិនឡាត» ស្ថិតនៅឃុំធុងណាឡៅ ស្រុកខនសាន ខេត្តជ័យភូមិ ប្រទេសថៃ កំពុងប្រមូលផ្តុំគ្នានៅមុខអគារពេលព្រឹកមុនចូលបន្ទប់រៀន ស្រាប់តែមានបុរសវ័យកណ្តាលម្នាក់ដែលមានផ្ទះនៅក្បែរសាលារៀននេះ នៅសុខៗ កើតអាការៈខុសប្រក្រតី ក៏ទាញកាំបិតកាប់អំពៅមកដេញកាប់គ្រូ និងសិស្សក្នុងបរិវេណសាលារៀន ។
បុរសនេះបានដេញកាប់គ្រូ និងកូនសិស្សមិនរើសមុខ ហើយបណ្តាលឱ្យគ្រូ និងកូនសិស្សភ័យស្លន់ស្លោរត់ជាន់ជើងគ្នាទៅពួនក្នុងបន្ទប់រៀនដើម្បីគេចពីសេចក្តីស្លា.ប់ ។ ហេតុការណ៍នេះបានបណ្តាលឱ្យគ្រូបង្រៀនម្នាក់រងរបួ.សតិចតួច ខណៈកូនសិស្សបានរត់ចូលទៅពួនក្នុងបន្ទប់រៀនទាន់ពេលវេលា ហើយពួកគេមិនបានរងរបួ.សទេ ។ ក្រោយមក បុរសនេះបានជិះម៉ូតូចេញពីសាលារៀន និងទៅសម្ងំពួនក្នុងផ្ទះរបស់ខ្លួននៅមុខសាលារៀន ។
កងកម្លាំងប៉ូលិស, ភ្នាក់ងារសង្គ្រោះបន្ទាន់ និងក្រុមគ្រូពេទ្យ ក៏បាននាំគ្នាទៅបញ្ចុះបញ្ចូលបុរសបង្កហេតុនេះ ដោយចំណាយពេលអស់ជាង១ម៉ោង ទើបអាចចាប់ខ្លួនបុរសនេះបាន និងបញ្ជូនទៅព្យាបាលជំងឺនៅមន្ទីរពេទ្យ ។ បុរសនេះសារភាពថា ខ្លួនឈ្មោះ រឺងរីត អាយុ៣៧ឆ្នាំ ប៉ុន្តែមិនព្រមប្រាប់ពីមូលហេតុទៅអុកឡុកនៅសាលារៀនទេ គ្រាន់តែប្រាប់ថា ធ្លាប់កើតជំងឺផ្លូវចិត្តពីមុនមក ។
លោកគ្រូ ថាវ៉ាត់ បានរងរបួសក្នុងហេតុការណ៍នេះរៀបរាប់ថា នៅពេលជនបង្កហេតុរត់សំដៅមករកគាត់ គឺមានកូនសិស្ស២នាក់នៅក្បែរដែរ ទើបគាត់សម្រេចចិត្តឱ្យសិស្សឈរនៅខាងក្រោយខ្នង ហើយពេលងាកមកវិញឃើញថា ជនបង្កហេតុបានយកកាំបិតកាប់មកលើគាត់ ។ ពេលនោះ គាត់គេចខ្លួនទាន់ ទើបបណ្តាលឱ្យរងរបួ.សតិចតួច ។ បន្ទាប់មក គាត់ក៏បានតទល់ជាមួយជននេះអស់មួយសន្ទុះធំ មុនពេលជននេះរត់គេចខ្លួន ។
ទោះយ៉ាងណា ក្រោយហេតុការណ៍នេះកើតឡើង ពលរដ្ឋរស់នៅក្នុងតំបន់បានផ្តាំផ្ញើទៅកាន់ស្ថាប័នពាក់ព័ន្ធជួយទប់ស្កាត់កុំឱ្យហេតុការណ៍នេះកើតឡើងម្តងទៀត ។ ចំណែកគ្រួសារណាដែលមានអ្នកជំងឺផ្លូវចិត្ត ត្រូវថែទាំពួកគេឱ្យបានដិតដល់ ឬឱ្យលេបថ្នាំជាប្រចាំ ឬគួរព្យាបាលអ្នកជំងឺផ្លូវចិត្តឱ្យជាដាច់ មុននឹងអនុញ្ញាតឱ្យពួកគេត្រឡប់មកផ្ទះវិញ និងមករស់នៅជាមួយមនុស្សក្នុងទីប្រជុំជន ៕
