ថ្ងៃទី៣ ខែវិច្ឆិកា Jungkook សមាជិក BTS បានចេញអាល់ប៊ុមទោលដំបូងរបស់ខ្លួនមានចំណងជើងថា “GOLDEN” ជាមួយបទចម្រៀងមានចំណងជើងថា “Standing Next to You” ។ យោងតាម Hanteo Chart បានឱ្យដឹងថាអាល់ប៊ុល “GOLDEN” របស់តារាចម្រៀងរូបនេះបានលក់ដាច់សាងកំណត់ត្រាសរុបចំនួន ២,១៤៧,៣៨៩ បន្ទះដែលធ្វើឱ្យវាក្លាយជាអាល់ប៊ុមដំបូងរបស់សិល្បករទោលដែលលក់បាន២លានបន្ទះក្នុងថ្ងៃដំបូងនៃការចេញផ្សាយ។
មិនត្រឹមតែអាល់ប៊ុម “GOLDEN” បានបង្កើតកំណត់ត្រាថ្មីសម្រាប់ការលក់អាល់ប៊ុមទោលក្នុងថ្ងៃដំបូងខ្ពស់បំផុតក្នុងប្រវត្តិសាស្ត្រ Hanteo ប៉ុណ្ណោះទេ ប៉ុន្តែវាបានបំបែកកំណត់ត្រាសម្រាប់ការលក់អាល់ប៊ុមទោលក្នុងសប្តាហ៍ដំបូងខ្ពស់បំផុតក្នុងរយៈពេលត្រឹមតែមួយថ្ងៃប៉ុណ្ណោះ។
កំណត់ត្រានៃការលក់អាល់ប៊ុមបានខ្ពស់កាលពីមុនគឺជាអាល់ប៊ុម “Layover” របស់សមាជិក V ដែលលក់បានចំនួន ១,៦៧២,១៣៨ បន្ទះនៅថ្ងៃដំបូង និងចំនួន ២,១០១,៩៧៤ បន្ទះក្នុងសប្តាហ៍ដំបូង។
យោងតាម BIGHIT MUSIC នាព្រឹកថ្ងៃទី៤ ខែវិច្ឆិកា អាល់ប៊ុម “GOLDEN” បានឈានដល់លេខ ១ នៅលើតារាង iTunes Top Albums នៅក្នុងតំបន់យ៉ាងហោចណាស់៧៧ ផ្សេងៗគ្នា រួមទាំងចក្រភពអង់គ្លេស អាល្លឺម៉ង់ បារាំង កាណាដា និងជប៉ុន។
ទន្ទឹមនឹងនេះដែរ បទ “Standing Next to You” បានជាប់ចំណាត់ថ្នាក់លេខ ១ នៅលើ iTunes Top Songs charts នៅក្នុងតំបន់យ៉ាងហោចណាស់ ៧១ ផ្សេងៗគ្នា រួមមានប្រទេសក្រិក ប៉ូឡូញ និងកាតា៕
