ពេជ្រ វត្តីសារ៉ាវឌ្ឍី បង្ហោះសារយ៉ាងកក់ក្តៅ និងលើកទឹកចិត្ត ភឹម ស្រីនោ កុំឱ្យបាក់ទឹកចិត្តព្រោះសម្តីរបស់អ្នកដទៃ

ដូចអ្នកតាមដានវិស័យបវរកញ្ញាជ្រាបមកហើយបវរកញ្ញាតំណាងប្រទេស ភឹម ស្រីនោ មិនបានចូលTopឡើយក្នុងកម្មវិធី MGI 2023 ខណៈយប់ថ្ងៃទី២៦ តុលា បវរកញ្ញារូបនេះបានវិលមកមាតុប្រទេសវិញហើយ។ ក្នុងនោះ ពេជ្រ វត្តីសារ៉ាវឌ្ឍី បានបង្ហោះពាក្យពេចន៍យ៉ាងកក់ក្តៅទៅកាន់ ភឹម ស្រីនោ និងកុំឱ្យនាងបាក់ទឹកចិត្តហើយនៅតែពោលថា ស្រីនោ នៅតែស័ក្តិសមជា Miss Grand Cambodia 2023 ដដែល។

នៅលើបណ្តាញសង្គមរបស់ ពេជ្រ វត្តីសារ៉ាវឌ្ឍី បានបង្ហោះរូបភាពពីរសន្លឹកជាមួយ ភឹម ស្រីនោ អមជាមួយខ្លឹមសារពោរពេញដោយអត្ថន័យថា «មនុស្សគ្រប់គ្នាមិនមែនសុទ្ធតែមានក្តីស្រឡាញ់ចំពោះយើងនោះទេ ដូច្នេះហើយយើងត្រូវតែមានក្តីស្រឡាញ់ចំពោះខ្លួនឯងឱ្យបានច្រើនៗជាទីបំផុត ។ នៅក្នុងដំណើរនៃការប្រកួតមនុស្សគ្រប់គ្នាតែងតែចង់ឃើញអ្នកស្ថិតក្នុងថប់កំពូលណាមួយ ដោយមិនគិតពីផលលំបាកដែលអ្នកកំពុងតែប្រឈមមុខឡើយ ទទួលស្គាល់ការចូល Top គឺជាក្តីប្រាថ្នារបស់ Queen និងអ្នកគាំទ្រគ្រប់រូបពិតមែន ប៉ុន្តែការលើកទង់ជាតិកម្ពុជាលើឆាកអន្តរជាតិ ក៏មិនមែនជារឿងងាយស្រួលផងដែរ។ ក្នុងឆ្នាំនេះយើងពិតជាមោទនភាពចំពោះអ្នកខ្លាំងមែនទែន អ្នកធ្វើបានល្អបំផុតហើយ ឈរលើឆាកអន្តរជាតិស្រែកឈ្មោះ ប្រទេសកម្ពុជា យ៉ាងអង់អាចក្លាហានព្រមទាំងបញ្ចប់ការប្រកួតដោយសន្តិភាពនិងទទួលបានសេចក្តីស្រឡាញ់ពីបណ្តាបវកញ្ញាជុំវិញពិភពលោកជាច្រើន»។

ពេជ្រ វត្តីសារ៉ាវឌ្ឍី បន្តទៀតថា «សម្រាប់អារម្មណ៍ខ្ញុំឆ្លងកាត់ការចូលទៅទស្សនាផ្ទាល់ អ្នកដែលគួរតែអបអរផងដែរនោះគឺ បេក្ខនារីដែលមិនចូល Top កំពូលណាមួយ សូមសរសើរពួកគាត់មានទឹកចិត្តល្អណាស់គឺតែងតែទះដៃ អបអរសាទរមិត្តភក្តិជានិច្ច ពេលដែលមិត្តភក្តិចូលទៅកាន់ Top ណាមួយ សង្ឃឹមថាការវិលត្រឡប់របស់ពួកគាត់មកប្រទេសកំណើតវិញពោរពេញដោយការស្វាគមន៍យ៉ាងកក់ក្តៅតាមរយៈសកម្មភាពនិងពាក្យសម្តីល្អៗ គួរឱ្យគោរព»។

ជាចុងក្រោយ MGC2022 រូបនេះបាននិយាយទៅកាន់ ភឹម ស្រីនោ ទៀតថា «ក្នុងនាមជារាមច្បងពិតជាមានមោទនភាពណាស់ដែលឃើញសិស្សប្អូនមានការ តស៊ូ ខិតខំប្រឹងប្រែង បញ្ចេញអស់ពីសមត្ថភាពក្នុងការតំណាងឲ្យប្រទេសកម្ពុជា ដឹងថាបេសកម្មមួយនេះវាពិតជាលំបាក ចូរកុំបាក់ទឹកចិត្តព្រោះតែសម្តីមិនល្អអ្នកដទៃ សូមបន្តដំណើរទៅមុខទៀត សូមចាំថាអ្នកពិតជាសក្តិសមជា Miss Grand Cambodia 2023 »៕