ដូចមហាជនជ្រាបមកហើយថាបេក្ខនារី លឹម សេរីហាន់នីកា បានក្លាយជាម្ចាស់ពាន The Voice Cambodia រដូវកាលទី៣ ក្រោមការហ្វឹកហាត់របស់គ្រូបង្វឹក ពេជ្រ សោភា។ ស្របពេលជាមួយគ្នានេះគ្រូបង្វឹក ឱក សុគន្ធកញ្ញា បានបង្ហោះសារអបអរម្ចាស់ពានទាំងព្រឹក និងអបអរដោយអារម្មណ៍រំភើបចិត្តទៅដល់គ្រូបង្វឹក ពេជ្រ សោភា ក្រោយពីខិតខំប្រឹងប្រែងអស់ពីកម្លាំងកាយចិត្តរហូតទទួលជ័យជម្នះ។
នៅព្រឹកថ្ងៃទី៣ ខែតុលា អ្នកនាងឱក សុគន្ធកញ្ញា បានបង្ហោះរូបម្ចាស់ជ័យលាភី លឹម សេរីហាន់នីកា អមជាមួយខ្លឹមសារថា «បងសូមចូលរួមអបអរសាទរ ប្អូនស្រី លឹម សេរីហាន់នីកា #TeamSophea ម្ចាស់ជ័យលាភីកម្មវិធីប្រឡងចម្រៀងលំដាប់ពិភពលោក The Voice Cambodia រដូវកាលទី៣»។
គ្រូបង្វឹកដ៏ស្រស់ស្អាតគ្រប់រដូវកាលរូបនេះបន្តទៀតថា«ក្នុងនាមជាគ្រូបង្វឹកមួយរូប សូមអបអរសាទរដល់ coach សោភា ដែលទទួលបានភាពជោគជ័យក្រោយពីការប្រឹងប្រែងយ៉ាងអស់ពីកម្លាំងកាយចិត្ត រំភើបជំនួសឯង ពេជ្រ សោភា Pich Sophea ជូនពរអ្នកគ្រូនិងកូនសិស្សទទួលបានភាពជោគជ័យបន្តបន្ទាប់ទៀត»។
គួរបញ្ជាក់ផងដែរថា នៅក្នុងថ្ងៃផ្តាច់ព័្រត្រនាយប់ថ្ងៃទី១ បេក្ខនារី លឹម សេរីហាន់នីកា អាយុ១៦ឆ្នាំជាអ្នកខេត្តកំពង់ធំទទួលបានសំឡេងផ្ញើសារគាំទ្រច្រើនលើសបេក្ខជន សាល បាទី កូនក្រុមលោក ឆន សុវណ្ណារាជ, បេក្ខនារី គឹម សុវណ្ណ កូនក្រុមអ្នកនាង ឱក សុគន្ធកញ្ញា និងបេក្ខជន សួន សុវណ្ណចន្នី កូនក្រុមលោក ណុប បាយ៉ារិទ្ធ។
ម្ចាស់ជ័យលាភី សេរីហាន់នីកា នឹងក្លាយជាតារាចម្រៀងកុងត្រាផលិតកម្មរស្មីហង្សមាស ទឹកប្រាក់១០០លានរៀលអមជាមួយពានក្នុងកម្មវិធី រួមទាំងទទួលបានការឧបត្ថម្ភផ្សេងៗទៀត។ នេះជាលើកដំបូងហើយដែល ពេជ្រ សោភា មានកូនក្រុមក្លាយជាម្ចាស់ពាន បន្ទាប់ពីលោក ឆន សុវណ្ណារាជ និងអ្នកនាង ឱក សុគន្ធកញ្ញា ក្នុងរដូវកាលទី១និងទី២៕ 
