ថ្មីៗនេះនៅលើបណ្តាញសង្គមផ្ទុះការជជែកគ្នាយ៉ាងខ្លាំងបន្ទាប់ពីឃើញរូបភាព និងវីដេអូ តារាសម្តែងរូបសង្ហា ប៊ឺរី និងស្រីស្រស់ គៀត សុវណ្ណាឡាង កៀកកិតជិតគ្នាយ៉ាងខ្លាំងមានទាំងការឱបថើបគ្នាទៀត ខណៈអ្នកគាំទ្រកំពុងសង្ស័យថាអ្នកទាំងពីរកំពុងមានទំនាក់ទំនងស្នេហាជាមួយគ្នារីឯអ្នកខ្លះទៀតថាអាចជាការសម្តែង។
ដ្បិតថាមិនសូវលេចមុខច្រើនដូចមុននៅក្នុងកម្មវិធីសិល្បៈតែគៀត សុវណ្ណាឡាង នៅតែជាទីចាប់អារម្មណ៍របស់មហាជនដដែលពីព្រោះតារាចម្រៀងនិងសម្តែងរូបនេះមានឈ្មោះបោះសំឡេងគួរសមលើអាជីពនេះ ជាពិសេសនាងបានលេចមុខជាតួឯកស្រីទាំងរឿងភាគ និងខ្សែភាពយន្តជាបន្តបន្ទាប់មកផងដែរ។ ទន្ទឹមនឹងការងារសិល្បៈងាកទៅកាន់ជីវិតឯកជនរបស់ គៀត សុវណ្ណាឡាង ត្រូវបានមហាជនចាប់អារម្មណ៍សង្ស័យថានាងកំពុងមានទំនាក់ទំនងស្នេហាជាមួយតារាសម្តែងប្រុសសង្ហាលោក ប៊ឺរី បន្ទាប់ពីមានរូបភាពនិងវីដេអូបង្ហោះជាបន្តបន្ទាប់នៅលើបណ្តាញសង្គមទិកតុក។
តាមរយៈវីដេអូ និងរូបភាពគេសង្កេតឃើញថា ពួកគេទាំងពីរនាក់មានភាពសិទ្ធស្នាលគ្នាយ៉ាងខ្លាំង ទាំងការឱប ថើបគ្នា ហើយរូបភាពទាំងនោះហាក់ទើបតែឃើញតែប៉ុណ្ណោះមិនមានការបង្ហាញពីមុនមកឡើយ។ ប្រការនេះហើយអ្នកគាំទ្រកំពុងដាក់ការសង្ស័យតារាទាំងពីរដួងនេះទំនងមានទំនាក់ទំនងស្នេហាជាមួយគ្នាហើយ ខណៈអ្នកខ្លះក៏សរសើរថាពួកគេសមគ្នា និងអ្នកខ្លះទៀតក៏និយាយថាអាចជាការសម្តែង។
ទោះបីជានេះគ្រាន់តែជាមន្ទិលសង្ស័យរបស់អ្នកគាំទ្រក្តីតែអ្នកគាំទ្រហាក់សប្បាយចិត្តនូវទំនាក់ទំនងរបស់ពួកគេ ជាពិសេសតារាស្រី គៀត សុវណ្ណាឡាង ដែលមានអ្នកស្អំបេះដូងបន្ទាប់ពីបែកបាក់ជាមួយលោក លឹម ជាឡាយ។
គួរបញ្ជាក់ថា កាលពីឆ្នាំ២០២២ គៀត សុវណ្ណាឡាង និងលោក ប៊ឺរី រួមជាមួយ ពេជ្រ វត្តី ធ្លាប់ថតរឿងជាមួយគ្នាមានចំណងជើងថា «ប្រពន្ធចិត្តព្រះ» របស់ស្ថានីយទូរទស្សន៍ហង្សមាសផងដែរ៕
