ហេង នរៈកក្កដា បោះសម្តីបែបនេះទៅអ្នករិះគន់ សុខុម រចនា ថា The Voice អកកាដង់

ទោះបីជាធ្លាក់នៅក្នុងកម្មវិធីត្រឹមវគ្គLive Show សប្តាហ៍ទី១ សុខុម រចនា នៅតែរងមតិរិះគន់និងសើចចំអកពីអ្នកលេងបណ្តាញសង្គមដដែល។ ដោយសម្លឹងឃើញការរិះគន់នៅតែកើតមានជាហូរហែតារាសម្តែងហេង នរៈកក្កដា ចេញមកបោះសម្តីដល់អ្នករិះគន់រចនាថា The Voice អកកាដង់ និងថាបើមិនពេញចិត្តអូសរំលងទៅនាងក៏ជាមនុស្សមានការឈឺចាប់ដែរ។

នៅយប់ថ្ងៃទី២៩ សីហា លោក ហេង នរៈកក្កដា ដែលជាតារាសម្តែងមួយរូបបានលើកឡើងថា «ខ្ញុំនៅតែមិនយល់ ថីបានម្នាក់ៗរិះគន់លើគាត់ថា The Voice អកកេះ អកការដង់? អ្នកច្រៀងតាមរោងការ អកកេះនឹងជាជនថោកទាបដែលសង្គមស្អប់ខ្ពើមមែនទេ? ខ្ញុំបានឃើញមានគេសើចចំអកគាត់ជាច្រើន តើអ្នកច្រៀងតាមរោងការ កម្មវិធីផ្សេងៗគ្នាជាមនុស្សគ្មានតំលៃក្នុងសង្គមមួយនេះឬក្នុងការប្រលងកម្មវិធីចម្រៀងផ្សេងៗឬយ៉ាងណា? បើមិនពេញចិត្តអូសចោលទៅ គាត់ក៏ជាមនុស្សមានការឈឺចាប់ដែរ»។

ការលើកឡើងរបស់តារាសម្តែងខាងលើនេះធ្វើឡើងក្រោយ សុខុម រចនា បានជ្រើសបទចម្រៀងមួយបទមានចំណងជើងថា «កាឡុងឃុង» មកបកស្រាយក្នុងវគ្គ Live Show សប្តាហ៍ទី១ក្នុងកម្មវិធី The Voice Cambodia រដូវកាលទី៣ ដែលបានប្រពឹត្តទៅកាលពីថ្ងៃទី២៧ សីហា កន្លងមកនេះ។

ជាលទ្ធផល រចនា បានធ្លាក់នៅក្នុងវគ្គនេះខណៈអ្នកមួយចំនួនបានសើចចំអកនាងដោយសារតែការជ្រើសបទមកច្រៀងខុសទើបបណ្តាលឱ្យធ្លាក់ពីកម្មវិធី និងអ្នកខ្លះទៀតនៅមិនទាន់រំងាប់ចិត្តស្អប់ទៅលើនាងបន្ទាប់ពីផ្ទុះរឿងអាស្រូវអរគុណ30M Views មិនខ្ចីអរគុណម្ចាស់ដើម និងរឿងបងប្រុសរបស់នាង ទើបជំរុញឱ្យមហាជនកាន់តែមានចិត្តខឹង ស្អប់ និងបញ្ចេញមតិអវិជ្ជមានលើនាងជាបន្តបន្ទាប់រហូតជាប់ឈ្មោះថាកញ្ញា 30M Views និងកញ្ញាខ្មើតជាដើម។

ទោះបីជាមតិមួយភាគធំមិនពេញចិត្តចំពោះនាងក្តី តែគេក៏សង្កេតឃើញថាអ្នកគាំទ្រមួយចំនួនរួមទាំងបេក្ខជនប្រលងរួមជំនាន់ជាមួយគ្នាបានលើកទឹកចិត្តនាងដូចគ្នាព្រមទាំងលើកឡើងទៀតថា រចនា ជាមនុស្សមានអត្តចរិតរុសរាយ មិនឆ្មើងឆ្មៃឡើយ៕