ម៉ាឡេស៊ីហាមពលរដ្ឋមិនឲ្យទៅលេងថៃ ក្រោយវិបត្តិអសន្តិសុខកាន់តែវឹកវរនៅភាគខាងត្បូង

តើឲ្យទៅការពារភ្ញៀវទេសចរបានយ៉ាងម៉េចទៅ បើសូម្បីតែស្ថិរភាពនៅក្នុងប្រទេសខ្លួនឯងក៏ថៃគ្រប់គ្រងមិនបានផងនោះ? រដ្ឋាភិបាលម៉ាឡេស៊ីបានចេញបញ្ជាដាច់ខាតឱ្យប្រជាពលរដ្ឋខ្លួនផ្អាក ឬលុបចោលរាល់ការធ្វើដំណើរទៅកាន់ប្រទេសថៃជាបន្ទាន់ បន្ទាប់ពីក្រុមឧទ្ទាមបំបែ.កខ្លួនបានបើកការវា.យប្រហារបំផ្ទុះគ្រាប់បែ.កចំឡានអ្នកទេសចរម៉ាឡេស៊ី ដុតបំផ្លា.ញស្ថានីយប្រេងឥន្ធនៈទ្រង់ទ្រាយធំ និងបង្ករការភ័យខ្លាចដល់អ្នករស់នៅក្នុងតំបន់ជាបន្តបន្ទាប់សឹងមិនលស់មួយថ្ងៃ។

យោងតាមរបាយការណ៍ពីក្រសួងការបរទេសម៉ាឡេស៊ី និងបញ្ជាការដ្ឋានប៉ូលិសរដ្ឋ Kelantan ព្រឹត្តិការណ៍ដ៏សាហាវនេះបានកើតឡើងបន្ទាប់ពីក្រុមសកម្មប្រយុទ្ធបានបង្កប់គ្រាប់បែកកែច្នៃ (IED) ក្រោមលូផ្លូវថ្នល់ក្នុងស្រុក Tak Bai ខេត្ត Narathiwat ដោយដៅផ្ទុះចំរថយន្តទេសចរណ៍ស្លាកលេខម៉ាឡេស៊ី ដែលកំពុងដឹកអ្នកដំណើរត្រឡប់ទៅផ្ទះវិញ បណ្តាលឱ្យបុរសជនជាតិម៉ាឡេស៊ី ២ នាក់រងរបួសធ្ងន់ដោយអំបែងគ្រាប់ ស្របពេលមានការវាយប្រហារបាញ់ប្រហារនិងដុតបំផ្លាញស្ថានីយប្រេងឥន្ធនៈ PT ដល់ទៅ ៣ កន្លែងផ្សេងគ្នាក្នុងខេត្ត Pattani និង Yala។ ជុំវិញគ្រោះថ្នាក់ដ៏គួរឱ្យខ្លាចនេះ មេបញ្ជាការប៉ូលិសព្រំដែនម៉ាឡេស៊ី លោក Datuk Mohd Yusoff Mamat បានចេញមុខព្រមានចំៗថា បើគ្រាន់តែចង់ឆ្លងដែនទៅដើរលេង ឬរកអីហូបចុកគឺសុំកុំទៅឱ្យសោះនៅក្នុងពេលនេះ ខណៈដែលស្ថានកុងស៊ុលម៉ាឡេស៊ីប្រចាំខេត្ត Songkhla បានណែនាំឱ្យពលរដ្ឋខ្លួនដែលកំពុងជាប់គាំងនៅថៃ ហាមដាច់ខាតការដើរហើរចេញក្រៅផ្ទះនៅពេលយប់ដើម្បីការពារអាយុជីវិត។

ការប្រកាសបិទផ្លូវធ្វើដំណើរភ្លាមៗនេះ បានជំរុញក្តីបារម្ភនិងការស្លន់ស្លោរយ៉ាងខ្លាំងក្នុងចំណោមប្រជាពលរដ្ឋម៉ាឡេស៊ី ដែលធ្លាប់តែនិយមប្រើប្រាស់ច្រកព្រំដែនគោកសម្រាប់ដើរលេងកម្សាន្តចុងសប្តាហ៍ ដោយសារតែការវាយប្រហាររបស់ក្រុមឧទ្ទាមនាពេលនេះគឺលែងដៅតែលើទាហានថៃដូចមុនទៀតហើយ គឺពួកគេមានចេតនាវាយប្រហារចំៗលើរថយន្តស៊ីវិល និងអ្នកទេសចរបរទេសតែម្តង។

សរុបជារួម វិបត្តិអសន្តិសុខដ៏សាហាវនៅភាគខាងត្បូងប្រទេសថៃនាពេលនេះ បានរុញច្រានឱ្យទំនាក់ទំនងព្រំដែននៃប្រទេសទាំងពីរធ្លាក់ក្នុងភាពតានតឹង ដោយបង្ខំឱ្យម៉ាឡេស៊ីត្រូវរឹតបន្តឹងការធ្វើដំណើរដើម្បីការពារសន្តិសុខជាតិជាចម្បង។ សេចក្តីប្រកាសណែនាំរបស់អាជ្ញាធរម៉ាឡេស៊ីបានសបញ្ជាក់យ៉ាងច្បាស់ថា ដរាបណាភាគីថៃមិនទាន់អាចគ្រប់គ្រងស្ថានការណ៍ និងធានាសុវត្ថិភាពលើផ្លូវដឹកជញ្ជូនបានទេនោះ ម៉ាឡេស៊ីនឹងបន្តរក្សាបម្រាមហាមឃាត់នេះដដែល ព្រោះអាយុជីវិតពលរដ្ឋខ្លួនគឺជារឿងសំខាន់បំផុត មិនអាចយកទៅប្រថុយប្រថាននឹងភ្លើងសង្គ្រាមឧទ្ទាមបំបែកខ្លួននោះឡើយ៕