ទីក្រុងហូជីមិញ ដែលពីមុនត្រូវបានគេទទួលស្គាល់ថាសៃហ្គន(Saigon) គឺជាទីក្រុងដែលមានប្រជាជនរស់នៅច្រើនជាងគេក្នុងប្រទេសវៀតណាម ជាមួយនឹងចំនួនប្រជាជនប្រហែល៩.៣លាននាក់ក្នុងឆ្នាំ២០២៣។
ទីក្រុងនេះ ស្ថិតនៅក្នុងតំបន់ភាគអាគ្នេយ៍នៃប្រទេសវៀតណាម ជាទីក្រុងដែលព័ទ្ធជុំវិញដោយទន្លេ Saigon ដែលមានផ្ទៃដីប្រមាណ ២ ០៦១គីឡូម៉ែត្រការ៉េ។
កាលដើមឡើយហូជីមិញត្រូវបានគេស្គាល់ថាជាសៃហ្គន ក៏ប៉ុន្តែក្រោយការបែកបាក់នៃឥណ្ឌូចិន ទីក្រុងនេះបានក្លាយជារដ្ឋធានីនៃប្រទេសវៀតណាមខាងត្បូង រហូតដល់ការដួលរលំនៃទីក្រុង Saigon ក្នុងឆ្នាំ១៩៧៥។
ក្រោយមកទៀតរដ្ឋាភិបាលកុម្មុយនិស្តវៀតណាមបានប្តូរឈ្មោះសៃហ្គន ដើម្បីជាកិត្តិយសដល់លោកហូជីមិញ (Hồ Chí Minh) ដែលកាលនោះ លោកគឺជាមេដឹកនាំបដិវត្តន៍ ដែលបានជួយឱ្យវៀតណាមប្រកាសឯករាជ្យនៅឆ្នាំ១៩៤៥។
សូមរំលឹកផងដែរលោកហូជីមិញ ជាស្ថាបនិកវៀតណាមប្រជាធិបតេយ្យ ហើយក៏ជាស្ថាបនិកនៃកងទ័ពប្រជាជនវៀតណាម និងជាស្ថាបនិកនៃពួកយៀកកុងក្នុងសង្រ្កាមវៀតណាមផងដែរ៕
