ពិធីបុណ្យចូលឆ្នាំចិន កាន់តែកៀកខិតចូលមកដល់ នៅក្នុងនោះកូនខ្មែរ ដែលជាប់ខ្សែស្រឡាយចិន បាននឹងកំពុងរៀបចំផ្ទះ និងកំពុងធ្វើម្ហូប ដើម្បីសែនផងដែរ។
តាមជំនឿរបស់ជនជាតិចិន អ្វីដែលសំខាន់គឺ ប្រសិនបើយើងចាប់ផ្តើមសែនអាហារល្អៗ និង វត្ថុដែលមានមង្គលនោះ វានឹងនាំសេចក្តីសុខ និងនាំលាភសំណាង ជូនគ្រួសារផងដែរ។ ប្រសិនបើអ្នកមិនបានគោរពនិងធ្វើតាមទំនៀមទម្លាប់នោះទេ វាអាចនាំឲ្យអ្នកបាត់បង់នូវលាភសំណាង។ ហេតុដូចនេះហើយ អ្នកគួរតែគោរពប្រណិប័តន៍ទៅតាមប្រពៃណីឱ្យខ្ជាប់ខ្ជួនពិសេសសម្រាប់បងប្អូនជាប់ខ្សែស្រឡាយចិន។
បម្រាមមិនគួរធ្វើអស់ទាំងនោះរួមមាន៖
ហាមជូតផ្ទះឬយកសំរាមបោះចោល
ការជូតសម្អាតផ្ទះអាចមានន័យថា ជាការបោសសម្អាតទ្រព្យចេញពីផ្ទះ។ រីឯការយកសំរាមបោះចោលមានន័យថា ឆ្កឹះយកទ្រព្យសំណាងល្អចេញពីផ្ទះ។
ហាមទទួលទានបបរឬសាច់នៅពេលព្រឹក
ការទទួលទានបបរពេលព្រឹកគឺជាការហាមប្រាមដោយសារតែគេជឿថា មានតែអ្នកក្រទេដែលទទួលទានបបរជាអាហារពេលព្រឹក។ ចំពោះការទទួលទានសាច់នៅពេលព្រឹកក៏គេហាមមិនឲ្យបរិភោគដែរ ព្រោះថានេះចាត់ទុកជាការមិនគោរពចំពោះព្រះពុទ្ធដែលជាអ្នកមិនសម្លាប់សត្វ។
ហាមបោកសម្លៀកបំពាក់និងកក់សក់
អ្នកមិនគួរបោកសម្លៀកបំពាក់នៅពីរថ្ងៃដំបូងឡើយ ធ្វើបែបនេះដើម្បីគោរពដល់ទេវតាទឹកឬ Shuishen។ សម្រាប់ថ្ងៃដំបូង អ្នកមិនគួរកក់សក់ឡើយ ព្រោះដោយសារពាក្យ សក់ នៅក្នុងភាសាចិនស្រដៀងទៅនឹង ពាក្យ រកស៊ីមានបាន។ ដូច្នេះអ្នកមិនគួរកក់សក់នៅថ្ងៃចូលឆ្នាំចិនដំបូងឡើយ។
ចៀសវាងការធ្វើឱ្យធ្លាក់របស់របរបែក
ការធ្លាក់របស់របរបែកអាចជាការនាំឲ្យបាត់បង់ទ្រព្យសំណាង។ ហេតុដូចនេះហើយ ចំពោះអ្នកលក់ដូរនិងរកស៊ីវិញតែងមានការប្រុងប្រយ័ត្នចំពោះរឿងមួយនេះ។
ហាមសម្លាប់សត្វ
ចាប់ពីថ្ងៃទីមួយរហូតទៅដល់ថ្ងៃទីដប់ប្រាំ មិនត្រូវឲ្យមានការសម្លាប់សត្វឡើយព្រោះវាជាប្រថ្នូរមិនល្អ។
ការជូនអំណោយមិនសមរម្យ
សម្រាប់អំណោយនៅថ្ងៃចូលឆ្នាំចិន អ្នកត្រូវមានការប្រុងប្រយ័ត្នក្នុងការជូនទៅបងប្អូនសាច់ញាតិ។ អ្នកគួរចៀសវាងជូនកាដូរមួយចំនួនដូចជា នាឡិកា កន្ត្រៃនិងផ្លែសេរីព្រោះរបស់អស់ទាំងនេះមានអត្ថន័យមិនល្អនៅក្នុងវប្បធម៌ចិន៕
ប្រភព៖ China Highlight
