ចាប់ពីខែមិថុនា ប្រទេសថៃនឹងប្រមូលប្រាក់ពីភ្ញៀវទេសចរណ៍ម្នាក់១២ដុល្លារ

រដ្ឋមន្ត្រីក្រសួងទេសចរណ៍ថៃ លោក ហ្វីផាត រ៉ាត់ឆាគីត ប្រាកាន ( Phiphat Ratchakitprakarn) បាននិយាយថា អ្នកទេសចរបរទេសទាំងអស់ដែលចូលប្រទេសថៃ ចាប់ពីខែមិថុនា នឹងត្រូវបង់ថ្លៃ ៣០០បាត (១២ដុល្លារអាមេរិក)។

លោក រដ្ឋមន្ត្រីក្រសួងទេសចរណ៍ថៃបានលើកហេតុផលថា ប្រាក់១២ដុល្លារនេះនឹងត្រូវប្រើប្រាស់ ដើម្បីអភិវឌ្ឍតំបន់ទេសចរណ៍ និងចំណាយលើការធានារ៉ាប់រងគ្រោះថ្នាក់សម្រាប់អ្នក ដែលមិនមានលទ្ធភាពព្យាបាល។ ប៉ុន្តែ ជនបរទេសដែលមានប័ណ្ណការងារ និងលិខិតឆ្លងដែននឹងត្រូវបានលើកលែងពីការបង់ថ្លៃសេវា។

ប្រទេសថៃ ទទួលបានភ្ញៀវបរទេសចំនួន ១១ លាននាក់ កាលពីឆ្នាំមុន ហើយប្រទេសថៃ បានកំណត់គោលដៅ ឱ្យបានចំនួន ២៥ លាននាក់ នៅឆ្នាំ២០២៣នេះ។

គោលដៅទេសចរណ៍ពេញនិយមជាច្រើននៅជុំវិញពិភពលោកគ្រោងនឹងដាក់ថ្លៃស្រដៀងគ្នា នៅឆ្នាំ ២០២៣ ដើម្បីបង្កើនគុណភាពនៃសេវាកម្មទេសចរណ៍៕

ប្រភព៖ VN Express