អ្នកស្រាវជ្រាវមួយរូបនៅ រាជបណ្ឌិត្យ សភាកម្ពុជាបានបង្ហាញការយល់ស្របចំពោះ ដាក់ឈ្មោះវិថីមួយនៅរាជធានីភ្នំពេញ តាមឈ្មោះ ថ្នាក់ដឹកនាំឥណ្ឌូណេស៊ី។
ឯកឧត្តមឧបនាយករដ្ឋមន្រ្តី ប្រាក់ សុខុន រដ្ឋមន្រ្តីក្រសួងការបរទេស និងសហប្រតិបត្តិអន្តរជាតិបញ្ជាក់ជាថ្មីអំពីការវាយតម្លៃខ្ពស់របស់កម្ពុជា ចំពោះតួនាទីដ៏សំខាន់ និងការរួមចំណែកដ៏ចាំបាច់របស់ ឥណ្ឌូនេស៊ី នៅក្នុងដំណើរការសន្តិភាពនៅក្នុងប្រទេសកម្ពុជា ដោយមានប្រសាសន៍ថា៖ “រាជរដ្ឋាភិបាលកម្ពុជា បាននិងកំពុង ពិចារណា ក្នុងការដាក់ឈ្មោះផ្លូវនៅរាជធានីភ្នំពេញតាមឈ្មោះរបស់ថ្នាក់ដឹកនាំឥណ្ឌូណេស៊ី”។
នេះជាការបញ្ជាក់នៅក្នុង សេចក្តីប្រកាស ព័ត៌មានរបស់ក្រសួងការបរទេស និងសហប្រតិបត្តិការអន្តរជាតិស្ដីពីជំនួបរវាង ឯកឧត្តម ប្រាក់ សុខុន ជាមួយឯកអគ្គរដ្ឋទូតឥណ្ឌូណេស៊ី កាលពីដើម សប្ដាហ៍នេះ។ ទោះជាយ៉ាងណាក្រសួងការបរទេសកម្ពុជាមិនទាន់បញ្ជាក់ទេថាកម្ពុជានឹងយកឈ្មោះមេដឹកនាំឥណ្ឌូនេស៊ីជំនាន់ណាមកធ្វើជាឈ្មោះដងវិថីនៅភ្នំពេញនៅឡើយទេ។
លោក យង់ ពៅ បញ្ជាក់ថា ៖ “ដូច្នេះការដាក់ឈ្មោះផ្លូវមួយ ឬក៏ច្រើន ខ្ញុំមិនបានដឹងទេ ប៉ុន្តែយ៉ាងហោចណាស់ការគ្រោងដាក់ឈ្មោះផ្លូវ ដោយយកឈ្មោះថ្នាក់ដឹកនាំឥណ្ឌូនេស៊ីនេះ វាសម្រាប់ជាការ ផ្ដល់ នូវគុណឧបការៈ ដូចជា ការផ្ដល់នូវកិត្តិយសដល់ប្រទេសឥណ្ឌូនេស៊ី សម្រាប់ការជួយជ្រោមជ្រែងដល់កម្ពុជាក្នុងការដំណើរការស្វែងរកសន្តិភាពនោះ”៕
