ខេត្តបាត់ដំបង៖ លោក សុខ លូ អភិបាលនៃគណអភិបាលខេត្តបាត់ដំបង បានមានប្រសាសន៍ថា ដីព្រៃលិចទឹកក្នុងតំបន់បី ក្នុងភូមិសាស្ត្រខេត្តបាត់ដំបងជាង១ម៉ឺនហិចតា ត្រូវបានជនខិតខូចរំលោភ ទន្ទ្រានកាន់កាប់ ។
នៅក្នុងកិច្ចប្រជុំជាមួយ ក្រុមការងារក្រសួងដែនដី ដើម្បីចាត់វិធានការចុះបង្ក្រាប ការរំលោភទន្ទ្រានដីព្រៃលិចទឹក នៅតំបន់បឹងទន្លេសាបក្នុង ភូមិសាស្ត្រខេត្តបាត់ដំបង នៅព្រឹកថ្ងៃទី៣០ ខែវិច្ឆិកា ឆ្នាំ ២០២១នេះ លោក សុខ លូ បានឲ្យដឹងថា ក្រុមការងារប្ដេជ្ញា និងចុះអនុវត្តតាមអនុសាសន៍ដ៏ខ្ពង់ខ្ពស់ របស់សម្ដេចតេជោ ហ៊ុន សែន នាយករដ្ឋមន្ត្រីកម្ពុជា ក្នុងការទប់ស្កាត់បង្ក្រាបករណីទន្ទ្រានកាន់កាប់ដីព្រៃលិចទឹកដោយខុសច្បាប់។
លោក សុខ លូ បញ្ជាក់ថា “ដីព្រៃលិចទឹកក្នុងតំបន់៣ ជាង១ម៉ឺន ហិកតាក្នុងស្រុកចំនួន៤ រួមមាន ស្រុកមោងឫស្សី ស្រុកសង្កែ ស្រុកឯកភ្នំ និង ស្រុកថ្មគោលត្រូវ បានជនខិលខូចរំលោភទន្ទ្រាន កាន់កាប់”។
អភិបាលខេត្តរូបនេះ បន្ថែមថា ដោយឡែកការបោះបង្គោលតំបន់ព្រៃលិចទឹក ក្នុងភូមិសាស្ត្រខេត្តបាត់ដំបង ក្នុងស្រុកចំនួន៤នោះមានចំនួន ១១២បង្គោល ដោយក្នុងនោះបោះបាន៦០នៅខ្វះ៥២បង្គោល តែទោះជាយ៉ាងណាក្រុមការងារខេត្ត ប្ដេជ្ញាបោះបង្កោលឲ្យបានគ្រប់ចំនួនកំណត់ក្នុងពេលដ៏ឆាប់ៗនេះ។
លោកបានឲ្យដឹងទៀតថា ចំពោះការទន្ទ្រានព្រៃលិចទឹក ជាក់ស្ដែងកាលពីថ្ងៃម្សិលមិញ កម្លាំងអាវុធហត្ថបាន ធ្វើការចុះបង្ក្រាប និងចាប់ខ្លួនអ្នកទន្ទ្រានដីព្រៃលិចទឹក បានមួយចំនួន ព្រមទាំងរឹបអូសបានវត្ថុតាងមួយចំនួនផង ដែរនៅក្នុងភូមិសាស្ត្រតំបន់៣។
សូមរំលឹកថា នៅក្នុងអនុក្រឹត្យលេខ១៩៧ របស់រាជរដ្ឋាភិបាល នៅឆ្នាំ២០១១ បានកំណត់ដីព្រៃលិចទឹកនៅ៦ ខេត្តជុំវិញបឹងទន្លេសាប មានចំនួន ៦៤៧ ៤០៦ហិចតា ដោយឡែកខេត្តបាត់ដំបងមានព្រៃលិចទឹកចំនួន២០៦ ៩៥៣ហិចតា ខណៈព្រៃលិចទឹកប្រមាណ ២ម៉ឺនហិកតា ត្រូវបានកាប់បំផ្លាញនិងត្រូវភ្លើងព្រៃឆេះ៕