រាជធានីភ្នំពេញ ៖ លោក សុវណ្ណ រិទ្ធី ហៅលោកតា វិចទ័រ ដែលត្រូវជាឪពុករបស់កញ្ញា វ៉ាន់ នីឡា បានចេញមុខបញ្ជាក់អំពីស្ថានភាពដែលនាំឲ្យកូនស្រី និងអនាគតកូនប្រសារនៅមិនទាន់អាចចូលរោងការបានព្រោះតែស្ថានភាពនៃជំងឺកូវីដ១៩នៅមិនទាន់ធូស្បើយ ។
ចំពោះ វ៉ាន់ នីឡា ដែលជាសាមីខ្លួនផ្ទាល់បាននិយាយថា ៖«រៀបចំមង្គលការខ្នាតតូចមនុស្សពីរគ្រួសារ ចុះអេតាស៊ីវិល សល់លុយរកស៊ីអ្នកណាសើចយំកុំខ្វល់សំខាន់យើងមានសុភមង្គលសល់លុយ» ។ ការពោលបែបនេះក៏ក្រោយពេលដែលមង្គលការរបស់នាងនិងគូស្នេហ៍ដែលជាកូនមន្ត្រីរាជការមានមុខមាត់ម្នាក់នោះត្រូវបានពន្យាពេលអស់ជាច្រើនខែ ព្រោះតែស្ថានភាពនៃជំងឺកូវីដ១៩ ។
លោក សុវណ្ណ រិទ្ធី ហៅលោកតា វិចទ័រ ជាឪពុកបានចេញមុខបញ្ជាក់អំពីពេលវេលាដែលកូនស្រីរបស់លោកអាចរៀបការបានថា ៖«កូនស្រីរបស់លោកអាចរៀបការបាន លុះត្រាតែស្ថានភាពអំណោយផលលែងភ័យពីកូវីដ-១៩ ពិសេសរដ្ឋាភិបាលបើកឲ្យរៀបចំពិធីមង្គលការឡើងវិញជាចំហដូចមុនបានហើយនោះនឹងរៀបចំតែម្ដង» ។
លោកបន្តថា ៖«មិនអាចនិយាយមុនថា នឹងរៀបការនៅខែ១០ ឬចុងឆ្នាំនេះ ឬដើមឆ្នាំក្រោយបានទេ ព្រោះត្រូវមើលទៅលើស្ថានភាពជាក់ស្ដែងសិន ព្រោះបើការទៅភ្ញៀវនៅតែបារម្ភកូវីដ-១៩នោះក្នុងនាមលោកជាឪពុកម្ដាយក៏មិនសប្បាយអស់ពីចិត្តដែរព្រោះថា ធ្លាប់លើកពេលរៀបការនេះម្ដងហើយកាលពីខែ៥» ។
លោកបានបន្ថែមថា ៖«ពេលនេះកូនប្រុសស្រីទាំង២ស្រលាញ់គ្នា ហើយចុះសម្រុងគ្នាល្អគ្មានបញ្ហាអីទេប៉ុន្តែស្ថានការណ៍កូវីដ-១៩ លែងជាបញ្ហាចោទទៀតហើយ គឺពួកគេទាំងពីរនឹងរៀបការតែម្ដង ព្រោះពេលនេះច្បាស់លាស់ជាមួយគ្នានិងមានការដឹងលឺពីក្រុមគ្រួសារទាំងសងខាងរួចហើយដែរ» ៕