ភ្នំពេញ ៖ ប្រជាពលរដ្ឋដែលរស់នៅក្នុងបុរី ប៉េង ហួត បឹងស្នោរគម្រោងទី១ បានឃាត់ខ្លួនជនសង្ស័យម្នាក់ប្រគល់ឲ្យសមត្ថកិច្ច កាលពីយប់ថ្ងៃទី១៣ វិច្ឆិកា ២០១៩ ។
ជនសង្ស័យភេទប្រុស មានអាយុប្រហែលជាង២០ឆ្នាំ ត្រូវបានប្រជាពលរដ្ឋឃាត់ខ្លួនជាក់ស្តែង ខណៈរូបគេព្យាយាមចូលលួចទ្រព្យសម្បត្តិរបស់ពួកគាត់ក្នុងបុរី ប៉េង ហួត បឹងស្នោរ ស្ថិតនៅតាមបណ្តោយផ្លូវជាតិលេខ១ សង្កាត់និរោធ ខណ្ឌច្បារអំពៅ រាជធានីភ្នំពេញ ។
បើតាមប្រជាពលរដ្ឋរស់នៅក្នុងបុរី ប៉េង ហួត បានបញ្ជាក់ថា នេះមិនមែនជាលើកទី១នោះទេ ដែលមានជនសង្ស័យចូលទៅលួចទ្រព្យសម្បត្តិរបស់បងប្អូន ដែលកំពុងរស់នៅក្នុងបុរីមួយនេះ ពោលគឺពេលកន្លងមក ក៏ធ្លាប់មានបាត់បង់ទ្រព្យសម្បត្តិអស់ជាច្រើនលើកមកហើយ ទើបតែពេលនេះ ពួកគាត់ចាប់បានចោរដោយខ្លួនឯង ខណៈដែលរៀងរាល់ខែ ពួកគាត់ត្រូវតែបង់ថ្លៃសេវាសន្តិសុខជូនបុរី មិនដែលខាន ដើម្បីការពារសុវត្ថិភាព ៕
