ខេត្តកំពត ៖ តូបលក់ដូររបស់អាជីវករសរុបចំនួន១៨៧តូប ក្នុងនោះឆេះអស់ទាំងស្រុងចំនួន១៤៧តូប ដោយសារអគ្គិភ័យឆាបឆេះផ្សារសាមគ្គីត្រពាំងរពៅ ត្រូវបានកម្លាំងសមត្ថកិច្ចពន្លត់បានទាំងស្រុង ដោយប្រើប្រាស់រថយន្តពន្លត់អគ្គិភ័យ៥គ្រឿង ប្រើទឹកសរុប៣៥រថយន្ត ។
ហេតុការណ៍នេះបានកើតឡើងកាលពីយប់ថ្ងៃទី៧ ខែសីហា ឆ្នាំ២០១៩ ក្នុងភូមិត្រពាំងរពៅ ឃុំព្រែកត្នោត ស្រុកទឹកឈូ ដែលជាព្រំប្រទល់រវាងខេត្តកំពត និងខេត្តព្រះសីហនុ ។
តាមការប្រាប់ឱ្យដឹងពីសមត្ថកិច្ចថា ករណីអគ្គិភ័យកើតឡើងនៅផ្សារត្រពាំងរពៅ បានបណ្តាលឲ្យខូចខាតតូបលក់ដូរអស់ប្រមាណ៨០ភាគរយ ប៉ុន្តែតម្លៃ នៃការខូចខាតក្នុងទំហំទឹកប្រាក់ប៉ុន្មានមិនទាន់អាចប៉ាន់ប្រមាណបាននៅឡើយទេ ព្រោះក្រៅពីតូបលក់ដូរទាំងនោះ ទ្រព្យសម្បត្តិដែលមានតម្លៃដ៏ច្រើនសន្ធឹកសន្ធាប់ក៏ត្រូវបានបំផ្លាញដោយអំណាចនៃអណ្តាតភ្លើងនោះដែរ ។
ករណីអគ្គិភ័យកើតឡើងនៅផ្សារសាមគ្គីត្រពាំងរពៅ មានរថយន្តពន្លត់អគ្គិភ័យប្រាំគ្រឿងបានចុះអន្តរាគមន៍ ដោយបីគ្រឿងជារបស់ស្នងការដ្ឋាននគរបាលខេត្តកំពត និងពីរគ្រឿងទៀតមកពីអធិការដ្ឋានស្រុកព្រៃនប់ ខេត្តព្រះសីហនុដោយប្រើប្រាស់ទឹកអស់៣៥ស៊ីទែន ទើបភ្លើងបានរលត់នៅរយៈពេលប្រហែលបីម៉ោងក្រោយមក ។
សមត្ថកិច្ចសន្និដ្ឋានជំហានដំបូងថា អាចបណ្តាលមកពីទុស្សេខ្សែភ្លើង ព្រោះខណៈពេលចាប់ផ្តើមឆេះនោះមិនមានអ្នកណានៅក្នុងផ្សារទេ ។ ប៉ុន្តែជំនាញនឹងស្រាវជ្រាវបន្តទៀត ។ ទោះជាយ៉ាងណាក្នុងហេតុការណ៍នោះមិនបានបណ្តាលឱ្យនរណាម្នាក់រងគ្រោះទេ ៕