សកម្មភាពតារាសម្តែង Shawn Dou និងកូនស្រីមហាសេដ្ឋីកាស៊ីណូ មានសញ្ញាវិជ្ជមានក្រោយមានពាក្យចចាមអារ៉ាមលែងលះ

តារាសម្តែង Shawn Dou និង Laurinda Ho កូនស្រីមហាសេដ្ឋីកាស៊ីណូម៉ាកាវ បានជាប់ពាក់ព័ន្ធជាមួយពាក្យចចាមអារ៉ាមចែកផ្លូវគ្នាកាលពីឆ្នាំមុនហើយអ្នកទាំងពីរតែងតែរក្សាភាពស្ងៀមស្ងាត់ និងមិនបានឆ្លើយតបអ្វីទាំងអស់ ខណៈថ្មីៗនេះបានក្លាយជាប្រធានបទក្តៅម្តងទៀតដោយសារតែតារាប្រុស Shawn Dou មានសកម្មភាពនេះឡើង។

Shawn Dou និង Laurinda Ho ត្រូវបានគេស្គាល់ថាជាគូស្នេហ៍ដ៏ល្បីមួយក្នុងវិស័យកម្សាន្តចិន។ ភាគីម្ខាងជាតួឯកប្រុស ម្ខាងទៀតជាកូនស្រីរបស់ស្តេចកាស៊ីណូដ៏ល្បីល្បាញ ដូច្នេះទំនាក់ទំនងរបស់ពួកគេតែងតែទទួលបានការចាប់អារម្មណ៍ពីមហាជន។ ចាប់តាំងពីឆ្នាំ ២០២៤ មក Shawn Dou និងភរិយាកម្របង្ហាញខ្លួនជាមួយគ្នា ឬទាក់ទងគ្នានៅលើបណ្តាញសង្គមដែលបង្កឱ្យមានពាក្យចចាមអារ៉ាមអំពីការបញ្ចប់អាពាហ៍ពិពាហ៍របស់ពួកគេ។

នៅព្រឹកថ្ងៃទី៩ ឧសភា សារព័ត៌មាន Sohu បានរាយការណ៍ថា នៅវេលាម៉ោង ០:០១ នាទី តារាសម្ដែងរូបនេះស្រាប់តែបង្ហោះពាក្យជូនពរថ្ងៃកំណើតដល់ភរិយា ដោយដាក់ចំណងជើងថា «HPBD» ជាមួយនឹងនិមិត្តសញ្ញាបេះដូងហើយបាន Tag ក្នុងសារបង្ហោះនោះ។ កូនស្រីរបស់មហាសេដ្ឋីកាស៊ីណូម៉ាកាវបានឆ្លើយតបដោយរូបបេះដូង។ នេះជាលើកទីមួយហើយបន្ទាប់ពីមានពាក្យចចាមអារ៉ាមលែងលះគ្នា Shawn Dou និង Laurinda Ho បានទាក់ទងគ្នាជាសាធារណៈតាមបណ្តាញសង្គម។ ថ្វីដ្បិតតែមិនបានបដិសេធការរំពឹងទុកជាសាធារណៈដោយផ្ទាល់ក៏ដោយ ប៉ុន្តែទង្វើនេះបានធ្វើឱ្យមនុស្សជាច្រើនជឿថាគូស្នេហ៍មួយគូនេះមិនទាន់បាននាំគ្នាទៅតុលាការលែងលះទេ ។

កន្លងមក Laurinda Ho បានបង្ហោះរូបថតក្នុងពិធីខួបកំណើតគម្រប់៣៤ឆ្នាំរបស់នាងជាមួយមិត្តភ័ក្តិជិតស្និទ្ធ ប៉ុន្តែអវត្តមានប្តីរបស់ខ្លួន។ ពេលអ្នកលេងអ៊ីនធឺណិតសម្ដែងការព្រួយបារម្ភ កូនស្រីរបស់មហាសេដ្ឋីរូបនេះមិនបានឆ្លើយតបទេ។ យោងតាមប្រភពខ្លះនៅក្នុងឧស្សាហកម្មនេះ ភាពតានតឹងរវាងគូស្នេហ៍ដ៏ល្បីមួយគូនេះ ផ្តើមចេញពីការពិតដែលថា Shawn Dou មិនត្រូវបានអនុញ្ញាតឱ្យចូលរួមក្នុងសកម្មភាពអាជីវកម្មរបស់គ្រួសារ Ho។ លោកត្រូវបានគេនិយាយថាមានអារម្មណ៍មិនពេញចិត្តនឹងត្រូវបានគេរំពឹងថានឹងបោះបង់អាជីពសម្តែងរបស់ខ្លួនហើយចូលនិវត្តន៍។

ការខ្វែងគំនិតគ្នាជាច្រើនបានបង្កឱ្យមានការឈ្លោះប្រកែកគ្នាជាយូរមកហើយ ធ្វើឱ្យទំនាក់ទំនងរវាងអ្នកទាំងពីរត្រជាក់បន្តិចម្ដងៗ។ ទីបំផុត Shawn Dou បានសម្រេចចិត្តវិលត្រឡប់មកអាជីពសិល្បៈវិញដើម្បីស្តារកេរ្តិ៍ឈ្មោះ និងហិរញ្ញវត្ថុរបស់ខ្លួនឡើងវិញ បន្ទាប់ពីដកខ្លួនអស់មួយរយៈ ដោយសារតែស្រលាញ់កូនស្រីរបស់មហាសេដ្ឋីកាស៊ីណូម៉ាកាវ។ យោងតាម QQ Shawn Douនិង Laurinda Ho មិនមានសំបុត្រអាពាហ៍ពិពាហ៍ទេ។ បើអ្នកទាំងពីរលែងលះគ្នា តារាសម្ដែងប្រុសរូបនេះនឹងមិនអាចបែងចែកទ្រព្យសម្បត្តិគ្រួសាររបស់ភរិយាបានឡើយ។

Shawn Dou និង Laurinda Ho បានរៀបចំពិធីមង្គលការដ៏ប្រណីតនៅកោះបាលី ប្រទេសឥណ្ឌូនេស៊ី ក្នុងខែមេសា ឆ្នាំ២០២៣។ ប៉ុន្មានខែបន្ទាប់ពីពិធីមង្គលការ កូនស្រីរបស់ស្តេចកាស៊ីណូ Stanley Ho បានត្រឡប់ទៅរស់នៅផ្ទះម្តាយរបស់នាងក្នុងទីក្រុងហុងកុង ខណៈដែលតារាសម្តែងប្រុសរូបនេះស្នាក់នៅក្នុងប្រទេសចិន។ ពីទីនេះ អ្នកទាំងពីរចាប់ផ្តើមបង្ហាញសញ្ញានៃបញ្ហា។ បន្ទាប់មក Laurinda មិនដែលទៅលេងប្តីរបស់ខ្លួនទេ ហើយ Shawn Dou ក៏អវត្តមានជាបន្តបន្ទាប់ក្នុងឱកាសគ្រួសារសំខាន់ៗដូចជា ពិធីខួបកំណើតម្តាយក្មេក ពិធីរំលឹកគុណឪពុកក្មេក និងព្រឹត្តិការណ៍ជំនួញមួយចំនួនរបស់គ្រួសារ Ho។

កាលពីចុងខែមេសា កូនស្រីរបស់មហាសេដ្ឋីកាស៊ីណូម៉ាកាវ ស្រាប់តែប្រកាសថា នាងគ្មានចេតនាចង់មានកូនឡើយ ទន្ទឹមនឹងការលាតត្រដាងអំពីទំនាក់ទំនងអាពាហ៍ពិពាហ៍របស់នាង ដែលមិនមានភាពស្ងប់ស្ងាត់នៅក្នុងសេចក្តីថ្លែងការណ៍របស់នាងទៅកាន់ប្រព័ន្ធផ្សព្វផ្សាយ។ ទាំងអស់នេះបានធ្វើឱ្យមានពាក្យចចាមអារ៉ាមអំពីការបែកបាក់រវាងនាង និងដៃគូរបស់នាង។ ម្យ៉ាងវិញទៀត កាសែត Sohu បាននិយាយថា បន្ទាប់ពីរៀបការរួច Shawn Dou បានកំណត់ការសម្ដែងរបស់ខ្លួន ហើយផ្តោតលើការកសាងអាជីពផ្ទាល់ខ្លួនរបស់លោក។ ទន្ទឹមនឹងនោះ Laurinda Ho បានចូលប្រឡូកក្នុងវិស័យសិល្បៈជាផលិតករភាពយន្ត។ យ៉ាងណាក៏ដោយ គូស្នេហ៍មួយគូនេះ បានសាងសង់យីហោភោជនីយដ្ឋានលំដាប់ខ្ពស់រួមគ្នា ដែលមានសាខានៅសៀងហៃ និងហុងកុង។

ក្នុងរយៈពេល ៣ ខែកន្លងមកនេះ Shawn Dou បានពង្រីកអាជីវកម្មរបស់ខ្លួនជាបន្តបន្ទាប់ ដោយបានចុះកិច្ចសន្យាជាមួយក្រុមហ៊ុនផ្សាយពាណិជ្ជកម្មល្បីៗ។ ប្រព័ន្ធផ្សព្វផ្សាយចិនបានរាយការណ៍ថា តារាសម្ដែងរូបនេះត្រូវបានម្ដាយក្មេកគោរព និងគាំទ្រយ៉ាងខ្លាំង។ ទាក់ទងនឹងការអវត្តមានពីកម្មវិធីខួបកំណើតរបស់ម្ដាយក្មេក Shawn Douបាននិយាយឡើងដើម្បីបញ្ជាក់។ ពេលនោះលោកត្រូវទៅខេត្តហៃណានដើម្បីធ្វើជំនួញ ដូច្នេះលោកមិនអាចត្រឡប់មកផ្ទះទាន់ពេលដើម្បីចូលរួម។ ជារួមទំនាក់ទំនងរបស់តារាសម្តែងវ័យ៣៦ឆ្នាំរូបនេះជាមួយគ្រួសារស្តេចកាស៊ីណូនៅតែល្អ៕