ប្រទេសថៃ ៖ អនុរដ្ឋមន្ត្រីក្រសួងការពារជាតិ លោក ណាត់ថាផុង ណាកផានិច បាននិយាយមកកាន់ប្រព័ន្ធផ្សព្វផ្សាយ នៅថ្ងៃទី៣០ ខែសីហា ឆ្នាំ២០២៥ ថា ទោះបីជារដ្ឋាភិបាលរង្គោះរង្គើ ប៉ុន្តែមិនប៉ះពាល់ដល់ការការពារប្រទេសរបស់កងទ័ពទេ កងទ័ពនៅតែមានអំណាចពេញលេញ ។ កងទ័ពនឹងរង់ចាំភាពច្បាស់លាស់ពីរដ្ឋាភិបាលរឿងការកំណត់គោលនយោបាយទំនាក់ទំនងអន្តរជាតិ ។

ការលើកឡើងបែបនេះក្រោយពីតុលាការធម្មនុញ្ញថៃបានដកតំណែងលោកស្រី ផេថងថាន ស៊ីណាវ៉ាត់ ជាផ្លូវការ ក្រោយរកឃើញទោសខុសក្រមសីលធម៌រដ្ឋធម្មនុញ្ញក្នុងសារសំឡេងបែកធ្លាយរវាងលោកស្រីជាមួយសម្តេចតេជោ ហ៊ុន សែន ប្រធានព្រឹទ្ធសភាកម្ពុជា ដែលធ្វើឱ្យគណបក្សនយោបាយនានាប្រជែងដណ្តើមយកតំណែងនាយករដ្ឋមន្ត្រីជាមួយគណបក្សកាន់អំណាចបច្ចុប្បន្ន ។

នៅថ្ងៃទី៣០ ខែសីហា នៅវិមានរដ្ឋាភិបាល លោក ណាត់ថាផុង ណាកផានិច អនុរដ្ឋមន្ត្រីក្រសួងការពារជាតិបានផ្តល់សម្ភាសន៍ជាមួយអ្នកសារព័ត៌មានពីការការពារជាតិរបស់កងទ័ពក្នុងអំឡុងពេលរដ្ឋាភិបាលរង្គោះរង្គើថា នឹងមិនប៉ះពាល់ដល់ការការពារប្រទេសទេ ដោយសារបទបញ្ជារបស់ក្រសួងការពារជាតិបានផ្តល់សិទ្ធិអំណាចដល់កងទ័ពទាក់ទងនឹងច្បាប់ប្រើប្រាស់កម្លាំង ដូច្នេះ គ្មានបញ្ហាអ្វីឡើយ ។

ប៉ុន្តែក្រសួងការពារជាតិត្រូវរង់ចាំការពិភាក្សាក្នុងកិច្ចប្រជុំម្តងទៀត រីឯភារកិច្ចការពារប្រទេស ឬអធិបតេយ្យ គឺពលរដ្ឋពុំចាំបាច់បារម្ភ ពីព្រោះមេបញ្ជាការកងទ័ព និងមេបញ្ជាការយោធភូមិភាគបានទទួលអំណាចរួចហើយថា តើនៅតំបន់ណាកើតហេតុការណ៍អ្វីខ្លះ និងអាចធ្វើអ្វីបានខ្លះ ។ មេបញ្ជាការកងទ័ពអាចសម្រេចចិត្តបាន ខណៈគោលនយោបាយការពារប្រទេសពុំទាន់ផ្លាស់ប្តូរ ។

ក្នុងអំឡុងពេលរដ្ឋាភិបាលថៃពុំទាន់មាននាយករដ្ឋមន្ត្រីថ្មី គឺកងទ័ពត្រៀមខ្លួនការពារអធិបតេយ្យជានិច្ចមិនឱ្យមានការល្មើសពីប្រទេសជិតខាង ។ ដូច្នេះ ពលរដ្ឋពុំចាំបាច់បារម្ភពីរឿងនេះ ប៉ុន្តែកងទ័ពនឹងរង់ចាំភាពច្បាស់លាស់ពីរដ្ឋាភិបាលរឿងការកំណត់គោលនយោបាយទំនាក់ទំនងអន្តរជាតិ ។ នេះបើតាមការលើកឡើងរបស់លោក ណាត់ថាផុង អនុរដ្ឋមន្ត្រីក្រសួងការពារជាតិ ។

គួរបញ្ជាក់ថា ក្រោយពីលោកស្រី ផេថងថាន ធ្លាក់ពីតំណែង ពេលនេះ គណបក្សភូមិចៃថៃបានជំរុញឱ្យបង្កើតរដ្ឋាភិបាលបណ្តោះអាសន្ន និងគាំទ្រលោក អនុថីន ឆាន់វីៈគូន ជាប្រធានគណបក្សភូមិចៃថៃកាន់តំណែងនាយករដ្ឋមន្ត្រីថ្មី ដោយរង់ចាំការចុះហត្ថលេខាលើកិច្ចព្រមព្រៀង និងលក្ខខណ្ឌជាមួយគណបក្សប្រជាជន (ឬគណបក្សប្រឆាំង) ជាលាយលក្ខណ៍អក្សរ ។

សំឡេងគាំទ្ររបស់សមាជិកសភាឱ្យលោក អនុថីន ឆាន់វីៈគូន ប្រធានគណបក្សភូមិចៃថៃ កាន់តំណែងនាយករដ្ឋមន្ត្រី គឺស្មើរហូតដល់២៨៣សំឡេង ។ រីឯគណបក្សភឿថៃ ដែលកាន់អំណាចបច្ចុប្បន្ន កំពុងប្រឈមនឹងប្រជាប្រិយភាពធ្លាក់ចុះ និងខ្វះទំនុកចិត្តពីពលរដ្ឋ ហើយគណបក្សភឿថៃពុំឯកភាពឱ្យមានការបោះឆ្នោតជ្រើសរើសនាយករដ្ឋមន្ត្រីថ្មីទេ ។ លោក ភូមិថាំ វីឆាយ៉ាឆៃ ដែលកាន់តំណែងជានាយករដ្ឋមន្ត្រីស្តីទីនិយាយថា លោក អនុថីន ឆាន់វីៈគូន កំពុងសុបិនទាំងថ្ងៃចង់ធ្វើនាយករដ្ឋមន្ត្រី ៕

នៅថ្ងៃសៅរ៍ទី៣០ ខែសីហានេះ គណៈប្រតិភូ សភាសហរដ្ឋអាមេរិក (CODEL) ដឹកនាំដោយលោកស្រី Beth Van Duyne ជាសមាជិកសភាប្រចាំរដ្ឋ Texas បានចុះទៅពិនិត្យស្ថានភាពរបស់ជនភៀសសឹក កម្ពុជានៅក្នុងខេត្តព្រះវិហារ និងខេត្តឧត្តរមានជ័យដោយផ្ទាល់ ក្រោយពីសហរដ្ឋអាមេរិកបានជួយសម្របសម្រួលឲ្យមានបទឈប់បាញ់រវាងកម្ពុជា និងថៃ។

បន្ទាប់ពីបានជួបជាមួយប្រមុខរដ្ឋាភិបាលកម្ពុជា និងមន្ត្រីជាន់ខ្ពស់កម្ពុជារួចមក លោកស្រី Beth Van Duyne និងគណៈប្រតិភូ សភាសហរដ្ឋអាមេរិកផ្សេងទៀត បានធ្វើដំណើរចុះទៅជំរុំភៀសសឹកនៅខេត្តព្រះវិហារ និងឧត្តរមានជ័យ ដើម្បីឈ្វេងយល់ពីទុក្ខលំបាករបស់ប្រជាជនកម្ពុជា ដោយសារតែសង្គ្រាមរវាងកម្ពុជា និងថៃ ដែលបានប្រយុទ្ធគ្នា៥ថ្ងៃ កាលពីចុងខែកក្កដា ឆ្នាំ២០២៥។

មុនការចុះទស្សនកិច្ចនៅជំរុំជនភៀសសឹក លោកស្រី Beth Van Duyne ប្រធានគណៈប្រតិភូសភាអាមេរិក ធ្លាប់បានបញ្ជាក់ប្រាប់លោក ស៊ុន ចាន់ថុល ឧបនាយករដ្ឋមន្ត្រី និងជាអនុប្រធានទី១ក្រុមប្រឹក្សាអភិវឌ្ឍន៍កម្ពុជា នៅក្នុងជំនួបសន្ទនាកាលពីថ្ងៃទី២៩ ខែសីហាកន្លងទៅថា អាមេរិក នឹងបន្តយកចិត្តទុកជានិច្ចដាក់លើការអនុវត្តបទឈប់បាញ់រវាងកម្ពុជា និងថៃ។

បន្ថែមពីលើនោះ លោកស្រី Beth Van Duyne ក៏បានកត់សំគាល់ពីការអភិវឌ្ឍដ៏ឆាប់រហ័សរបស់ប្រទេសកម្ពុជា និងការវិវត្តជាវិជ្ជមាននៃទំនាក់ទំនងទ្វេភាគីរវាងប្រទេសកម្ពុជា និងសហរដ្ឋអាមេរិក ដោយលោកស្រីបានបង្ហាញនូវសុទិដ្ឋិនិយមខ្ពស់ ក្នុងការធ្វើឲ្យសើរឡើងនៃទំនាក់ទំនង និងកិច្ចសហប្រតិបត្តិការរវាងប្រទេសទាំងពីរនាពេលអនាគត។

សូមបញ្ជាក់ថាគណៈប្រតិភូ សភាសហរដ្ឋអាមេរិក (CODEL) បានចាប់ផ្តើមទស្សនកិច្ចនៅកម្ពុជា កាលពីថ្ងៃទី២៨ ខែសីហា ដោយបានជួបសន្ទនាជាមួយសម្ដេចធិបតី ហ៊ុន ម៉ាណែត មុននឹងធ្វើដំណើរ ចុះទៅត្រួតពិនិត្យស្ថានភាពជនភៀសសឹកកម្ពុជា នៅថ្ងៃទី៣០ ខែសីហានេះ៕

ស្របពេលដែលមេដឹកនាំប្រទេសជាច្រើននៅក្នុងតំបន់រួមមានកម្ពុជា ម៉ាឡេសុី វៀតណាម ឡាវ ឥណ្ឌូណេសុី និងប្រទេសផ្សេងៗទៀតសរុបចំនួន 26ប្រទេស ត្រូវបានប្រទេសចិនអញ្ជើញឲ្យចូលរួមក្នុងក្បួនដង្ហែរទិវាជ័យជំនះ របស់ទីក្រុងប៉េកាំងខួបលើកទី 80 នៃការបញ្ចប់សង្គ្រាមលោកលើកទី 2 ប្រទេសថៃគ្មានឈ្មោះនៅក្នុងបញ្ជីនេះឡើយ ជាហេតុជំរុញឲ្យសាធារណជនថៃកើតមានចម្ងល់ចង់ដឹង។

យោងតាមការប្រកាសជាផ្លូវការតាមរយៈប្រព័ន្ធផ្សព្វផ្សាយចិនបានឲ្យដឹងថា ប្រទេសចិនបានអញ្ជើញមេដឹកនាំបរទេសចំនួន 26 នាក់ ដើម្បីចូលរួមការប្រារព្ធទិវាជ័យជម្នះ ក្នុងសង្គ្រាមប្រជាជនចិនប្រឆាំងនឹងការឈ្លានពានរបស់ជប៉ុន ដែលនឹងប្រារព្ធនៅថ្ងៃទី 3 ខែកញ្ញា ឆ្នាំ 2025 ខាងមុខ។ បញ្ជីនេះមានសុទ្ធតែឥស្សរជនជាន់ខ្ពស់ដូចជា ប្រធានាធិបតីរុស្ស៊ី លោក វ្ល៉ាឌីមៀ ពូទីន, មេដឹកនាំកូរ៉េខាងជើង គីម ជុងអ៊ុន និងព្រះករុណាព្រះបាទសម្ដេចព្រះបរមនាថ នរោត្ដមសីហមុនី ព្រះមហាក្សត្រនៃព្រះរាជាណាចក្រកម្ពុជា រួមជាមួយនឹងមេដឹកនាំមកពីបណ្តាប្រទេសនៅទូទាំងអាស៊ីកណ្តាល អាស៊ីអាគ្នេយ៍ អាហ្វ្រិក និងអឺរ៉ុបខាងកើតជាច្រើនរូប។

បើទោះបីជាប្រទេសជិតខាងក្នុងតំបន់ រួមទាំងកម្ពុជានឹងត្រូវចូលរួមក្នុងកម្មវិធីដ៏ធំនេះ គេសង្កេតឃើញថា ប្រទេសថៃដែលជាប្រទេសដ៏មានសក្តានុពលមួយប្រចាំអាស៊ាន មិនមានឈ្មោះនៅក្នុងបញ្ជីភ្ញៀវកិត្តិយសឡើយ។ ការគ្មានវត្តមាននេះកើតឡើងចំពេលដែលអស្ថិរភាពនយោបាយកំពុងកើនឡើងនៅក្នុងប្រទេសថៃ ដោយនាយករដ្ឋមន្ត្រី Paetongtarn Shinawatra ថ្មីៗនេះត្រូវបានដកចេញពីតំណែងដោយតុលាការធម្មនុញ្ញ និងស្ថានភាពនៅតាមព្រំដែនរបស់ថៃជាប់ប្រទេសជិតខាងកំពុងមានភាពតានតឹង។

ខណៈពេលដែលប្រទេសចិនមិនបានពន្យល់ពីមូលហេតុដែលការអញ្ជើញត្រូវបានកំណត់ត្រឹម 26 ប្រទេស អ្នកវិភាគជាច្រើនបានលើកឡើងថា បញ្ជីភ្ញៀវកិត្តិយសនេះឆ្លុះបញ្ចាំងពីអាទិភាពភូមិសាស្ត្រនយោបាយបច្ចុប្បន្នរបស់ទីក្រុងប៉េកាំង។ មួយវិញទៀត វាអាចបណ្ដាលមកពីភាពជិតស្និតរបស់ថៃជាមួយសហរដ្ឋអាមេរិកដែលជាសត្រូវទីមួយរបស់ចិនបច្ចុប្បន្ន និងមិនត្រូវបានអញ្ជើញឲ្យចូលរួមដូចគ្នា។

បន្ថែមពីលើនោះ ក៏មានមតិមួយចំនួនបានលើកឡើងថា ការណ៍ដែលចិនមិនបានអញ្ជើញថៃគឺដោយសារតែប្រទេសនេះ ពុំទាន់មានមេដឹកនាំដែលច្បាស់លាស់ក្នុងការតំណាងប្រទេសទៅចូលរួមនៅឡើយ។

យ៉ាងណាក៏ដោយ ក៏ដាក់បញ្ចូលកម្ពុជាក្នុងចំណោមប្រទេសធំៗដទៃទៀតដែលត្រូវបានអញ្ជើញឲ្យចូលរួមក្នុងកម្មវិធីប្រចាំឆ្នាំដ៏សំខាន់របស់ចិននេះ បានឆ្លុះបញ្ជាំងពីភាពរឹងមាំនៃទំនាក់ទំនងតាំងពីប្រវត្តិសាស្ត្រដ៏យូរអង្វែងរវាងកម្ពុជា-ចិន និងជាពិសេសវាក៏ជាឱកាសដ៏ល្អមួយក្នុងការបើកផ្លូវឲ្យកម្ពុជាអាចផ្សារភ្ជាប់ទំនាក់ទំនងការទូត ឬបង្កើនមិត្តភាពជាមួយបណ្ដារប្រទេសផ្សេងៗជាច្រើនទៀតតាមរយៈការចូលរួមនេះផងដែរ៕

(ភ្នំពេញ)៖ របស់កូពីថយចេញឲ្យឆ្ងាយ! ប្រាសាទអង្គរវត្តរបស់កម្ពុជា ទទួលបានការចាត់ថ្នាក់កំពូលលើគេបង្អស់ក្នុងចំណោមគោលដៅទេសចរណ៍ជាច្រើនផ្សេងទៀតនៅទ្វីអាសុី ថាជាទីកន្លែងដែលមានភាពទាក់ទាញខ្លាំងបំផុតប្រចាំឆ្នាំ២០២៥។ នេះបើតាមការបង្ហាញរបស់គេហទំព័រ Tripadvisor ។

តាមរការស្ទង់មតិរយៈពេល១២ខែ នៅលើគេហទំព័រ Tripadvisor ដែលជាកម្មវិធីរៀបចំដំណើរកម្សាន្តដ៏ពេញនិយមមួយ និងមានការទទួលស្គាល់ដោយភ្ញៀវទេសចរអន្តរជាតិជុំវិញពិភពលោកបានបង្ហាញរបាយការណ៍សម្រាប់ឆ្នាំ២០២៥នេះថា ប្រាសាទអង្គរវត្ត ដែលស្ថិតនៅខេត្តសៀមរាប ប្រទេសកម្ពុជា ទទួលបានការវាយតម្លៃខ្ពស់ពីភ្ញៀវទេសចរបរទេស ថាគឺជាគោលដៅទេសចរណ៍ដ៏ទាក់ទាញជាងគេបំផុតប្រចាំនៅតំបន់អាសុី។

ទិន្នន័យខាងលើនេះបានរៀបរាប់ថា៖ ប្រាសាទអង្គរវត្តគឺជាអច្ឆរិយៈវត្ថុរបស់ពិភពលោក ហើយវាមិនពិបាកក្នុងការយល់ទេថា ហេតុអ្វីបានជាគេចាត់ទុកវាដូច្នេះ។ សូមទៅទស្សនានៅតំបន់បេតិកភណ្ឌពិភពលោករបស់អង្គការយូណេស្កូមួយនេះ ដើម្បីស្វែងយល់ពីស្ថាបត្យកម្មដែលគួរឲ្យកោតសរសើរ និងចម្លាក់ដ៏ល្អឥតខ្ចោះរបស់វា។ មនុស្សជាច្រើននិយមមកទីនេះនៅពេលថ្ងៃរះ ដូច្នេះត្រូវប្រាកដថាអ្នកបានកំណត់ម៉ោងរោទិ៍របស់អ្នកឲ្យច្បាស់លាស់ ដើម្បីចាប់ទីតាំងល្អមួយក្នុងការទស្សនាទិដ្ឋភាពដ៏អស្ចារ្យ។

គេហទំព័រនេះក៏បានគូសបញ្ជាក់ចំពោះភ្ញៀវទេសចរបរទេសទូទាំងពិភពលោកដែលមានបំណងចង់មកកម្សាន្ដនៅទីនេះដែរថា៖ ដំណើរកម្សាន្តរបស់អ្នកនឹងកាន់តែមានប្រយោជន៍ ប្រសិនបើអ្នកមានមគ្គុទេសន៍ណែនាំទៅជាមួយ ព្រោះអ្នកនឹងអាចឮពីរឿងរ៉ាវ និងលក្ខណៈពិសេសដែលនៅពីក្រោយកន្លែងដ៏អស្ចារ្យមួយនេះ។

ប្រាសាទដ៏អស្ចារ្យមួយនេះ ត្រូវបានចាត់ទុកជាទីសាសនដ្ឋានធំជាងគេបំផុតនៅលើពិភពលោក ដែលបានទាក់ទាញភ្ញៀវទេសចរអន្តរជាតិជុំវិញពិភពលោកឱ្យមកទស្សនាជាហូរហែជាប់ឥតដាច់ និងមិនមានស្ថាបត្យកម្មប្រាសាទនៅតំបន់អាសុីណាមួយអាចមកផ្ទឹមជាមួយបានឡើយ។

គួរជម្រាបថា គិតត្រឹមខែកក្កដា ឆ្នាំ២០២៥ ការលក់សំបុត្រចូលទស្សនា រមណីយដ្ឋានអង្គរ ទទួលបានចំណូលប្រមាណ ២៨ ៦៤៣ ៤០៧ ដុល្លារ ពីមានភ្ញៀវទេសចរបរទេសជាង ៦១ម៉ឺននាក់ កើនឡើង៥.៣៩%។ នេះបើតាមរបាយការណ៍ចុងក្រោយដែលបញ្ជាក់ដោយគ្រឹះស្ថានអង្គរ។

ជាមួយគ្នានេះ ស្របពេលដែលព្រឹត្តិការណ៍សមរាត្រីអង្គរ ឬបាតុភូតថ្ងៃរះចំកំពូលកណ្ដាលនៃប្រាសាទអង្គរ ដែលអាចនឹងកើតឡើងនៅចន្លោះថ្ងៃទី២១ ដល់២៣ ខែកញ្ញាខាងមុខនេះ គេរំពឹងថានឹងមានភ្ញៀវទេសចរទាំងជាតិ និងអន្តរជាតិមកចូលរួមច្រើនកុះករ បើទោះជាស្ថិតក្នុងរដូវបៃតងដែលជាទូទៅពុំសូវមានភ្ញៀវទេសចរក៏ដោយ។ ការណ៍នេះ នឹងជំរុញឲ្យវិស័យទេសចរណ៍នៅកម្ពុជា កាន់តែមានសន្ទុះកើនឡើងជាលំដាប់ ព្រមទាំងអាចជួយសម្រួលដល់សេដ្ឋកិច្ចនៅក្នុងប្រទេសបានមួយផ្នែកធំផងដែរ៕