ពិធីសែន ដកជើងធូប ឬ ជនជាតិចិន ហៅថា ពិធីជូនទេវតាឡើងឋានសួគ៌ គឺជាពិធីដែលជនជាតិចិនតែងធ្វើឡើងនៅមុនថ្ងៃបុណ្យចូលឆ្នាំថ្មីឈានចូលមកដល់ ។

សម្រាប់ក្នុងឆ្នាំនេះ ថ្ងៃសែនដកជើងធូបនឹងត្រូវធ្វើឡើងនៅថ្ងៃទី១៥ ខែ មករា ឆ្នាំ២០២៣។ យោងតាមឯកសារស្រាវជ្រាវបានបញ្ជាក់ថា ពិធីសែនដកជើងធូបនេះ ត្រូវបានធ្វើឡើងចន្លោះពី៥ថ្ងៃ និង៧ថ្ងៃ មុនថ្ងៃចូលឆ្នាំថ្មីប្រពៃណីចិនឈានមកដល់រៀងរាល់ឆ្នាំ។

បើតាមជំនឿហើយនៅថ្ងៃនេះគេនឹងធ្វើការ ដកជើងធូប គ្រប់កន្លែងដើម្បីដូរកំប៉ុង ជើងពាន ឬផើង ហើយផ្លាស់ខ្សាច់ឬអង្ករ ក្នុងកំប៉ុងជើងធូបឬជើងពានចេញ រួចប្ងូរថ្មី ដើម្បីទទួលសិរីសួរស្តីឆ្នាំថ្មីនឹងឈានមកដល់។ក្នុងក្បួនដកជើងធូបនេះទៀតសោតគេមានត្រណមមួយគឺនៅពេលដែលដកហើយបើជាជំនាងផ្ទះ ឬ ហៅ ទី ជុយអៀ ត្រូវតែ ទុកធូបចាស់ចំនួន៥សរសៃ ប៉ុន្តែបើជាកុងម៉ាវិញទុកបន្សល់ជើងធូបចាស់អោយបាន៣សរសៃ។

គួរបញ្ជាក់ថាតាមជំនឿជាប្រពៃណីចិន ការសែនដកជើងធូប គឺជាពិធីអរគុណ និងជូនដំណើរកុងម៉ា (ដូនតា) និងទេវតាឆ្នាំចាស់ដែលបានថែរក្សា ការពារឱ្យចម្រុងចម្រើនពួកគេអស់រយៈកាលមួយឆ្នាំកន្លងមកឱ្យត្រឡប់ទៅឋានសួគ៌វិញ។ បន្ទាប់ពីកុងម៉ា និងទេវតាដែលជាម្ចាស់កំប៉ុងជើងធូបទាំងនោះត្រឡប់ទៅវិញ បានសេចក្តីថា កំប៉ុងជើងធូបនេះនៅទំនេរពុំមានម្ចាស់ឡើយ រហូតកុងម៉ា និងទេវតាឆ្នាំថ្មីចូលមកជំនួស។ ក្នុងពេលពុំមានម្ចាស់នេះឯង ជាពេលដែលម្ចាស់ផ្ទះដកជើងធូបចេញពីកំប៉ុង និងយកកំប៉ុងជើងធូបទៅលាងសម្អាតសម្រាប់រៀបចំទទួលទេវតាឆ្នាំថ្មី ។

ចំពោះការបម្លាស់ទីរបស់កំប៉ុង ឬជើងពានជើងធូប គឺយើងត្រូវកាន់ ហើយលើកឡើងឱ្យផុតពីទីដែលបានតម្កល់ ប៉ុន្តែកុំអូសកំប៉ុង ឬជើងពាននោះឱ្យសោះ ទើបជាការលើករាសីដល់ម្ចាស់ផ្ទះ ហើយកុងម៉ា ឬទេវតាក៏នឹងមិនខឹងសម្បាផងដែរ៕

ភ្នំពេញ៖ អធិការរងនគរបាលខណ្ឌច្បារអំពៅម្នាក់ ត្រូវបានរថយន្ដដឹកដីកិនស្លាប់ ពេលកំពុងធ្វើដំណើរទៅបំពេញការងារ។ ហេតុការណ៍នេះ បានកើតឡើងនៅព្រឹកថ្ងៃទី១៤ ខែមករា ឆ្នាំ២០២២នេះ នៅតាមផ្លូវថៃហ្គ័រ ស្ថិតក្នុងភូមិចំពុះក្អែក សង្កាត់ព្រែកថ្មី ខណ្ឌច្បារអំពៅ រាជធានីភ្នំពេញ។

លោកវរសេនីយ៍ឯក ម៉ៅ សឿត អធិការនគរបាលខណ្ឌច្បារអំពៅ បានឲ្យដឹងថា ជនរងគ្រោះក្នុងហេតុការណ៍នេះ ឈ្មោះ គង់ គន្ធា ភេទស្រី អាយុ៤០ឆ្នាំ ជាមន្ដ្រីនគរបាល ដែលមានតួនាទីជាអធិការរងនគរបាលខណ្ឌច្បារអំពៅ។ ជនរងគ្រោះជិះម៉ូតូម៉ាក Zoomer-X ពណ៌សលាយទឹកក្រូច ពាក់ផ្លាកលេខភ្នំពេញ 1GL-9475 ខណៈរថយន្ដបង្កជាប្រភេទរថយន្ដដឹកដី ពាក់ផ្លាកលេខភ្នំពេញ 3E-1032។ ដោយឡែក សម្រាប់ជនបង្កបានរត់គេចខ្លួនបាត់ពីកន្លែងកើតហេតុ។

លោកវរសេនីយ៍ឯក ម៉ៅ សឿត សូមឲ្យវិញ្ញាណក្ខន្ធលោកស្រីវរសេនីយ៍ទោ គង់ គន្ធា បានទៅកាន់ទៅស្ងប់។ បច្ចុប្បន្នសពត្រូវបានយកទៅតម្កល់នៅគេហដ្ឋាន ជិតកន្លែងកើតហេតុ ផ្ទះលេខ២៥ ផ្លូវគ្រីស្តាល់ ស្ថិតនៅភូមិចំពុះក្អែក សង្កាត់ព្រែកថ្មី ខណ្ឌច្បារអំពៅ រាជធានីភ្នំពេញ៕

បូរ៉ូប៊ូឌ័រ​ គឺជាប្រាសាទដែលស្ថិតនៅ​កណ្តាលប្រទេសឥណ្ឌូនេស៊ី តាំងពីសតវត្សរ៍ទី៨ និងជាសម្បត្តិបេតិកភណ្ឌពិភពលោក ត្រូវបានចុះក្នុងបញ្ជីដេាយអង្គការយូណេស្កូ។ ទីនោះគឺជាប្រាសាទមួយក្នុងចំណោមប្រាសាទបុរាណដ៏អស្ចារ្យបំផុតក្នុងពិភពលោក ដែលមានរចនាបថបែបពុទ្ធសាសនា ធំជាងនៅលើផែនដី។ជញ្ជាំងថ្មរបស់ប្រាសាទបូរ៉ូប៊ូឌ័រ ត្រូវបានតុបតែងជាមួយនឹងចម្លាក់ដ៏ប្រណិត ​មានទំហំសរុបគ្របដណ្តប់រហូតដល់២,៥២០ម៉ែត្រការ៉េ​​ ហេីយមានរូបចម្លាក់ព្រះពុទ្ធ៧២អង្គ​។ ក្រៅពីប្រាសាទអង្គរវត្តនៅក្នុងប្រទេសកម្ពុជា និងទីក្រុងបុរាណបាកាន (Bagano នៅមីយ៉ាន់ម៉ា ប្រាសាទបូរ៉ូប៊ូឌ័ររបស់ឥណ្ឌូនេស៊ីក៏ទាក់ទាញភ្ញៀវទេសចរលេីលេាកជាច្រេីនមកទស្សនាកម្សាន្តរាល់ឆ្នាំដែរ។​

ប្រាសាទបូរ៉ូប៊ូឌ័រស្ថិននៅក្នុងទីក្រុង Yogyakarta ដែលមានព្រលានយន្តហេាះ Adisucipto International Airport ជិតជាងគេ។ សម្រាប់ជនបរទេស គឺត្រូវការបង់ប្រាក់ប្រមាណ២២ដុល្លារសម្រាប់ចូលមេីល ហេីយចំពេាះសិស្សជនបរទេសវិញ គឺត្រឹមតែ១០ដុល្លារតែប៉ុណ្ណោះ៕

ខេត្តបន្ទាយមានជ័យ៖ អាជ្ញាធរខេត្តបន្ទាយមានជ័យ ដឹកនាំដោយលោក លី សារី អភិបាលរងខេត្ត សមត្ថកិច្ចនគរបាល មន្ត្រីកងរាជអាវុធហត្ថ និងមន្ត្រីអាជ្ញាធរក្រុងសិរីសោភ័ណ ចុះត្រួតពិនិត្យទីតាំងដីក្រុមហ៊ុន KP MORN DANY Land & House ឬ ម៉ន ដានី លក់ដីឡូតិ៍ នៅផ្លូវជាតិលេខ៥ ក្នុងសង្កាត់ទឹកថ្លា ក្រុងសិរីសោភ័ណ និងភូមិសាលាក្រហម ឃុំសំរោង ស្រុកអូរជ្រៅ ដែលបន្តសកម្មភាពលក់ដីឡូតិ៍ល្មើសច្បាប់ ខណៈអាជ្ញាធរបានឱ្យផ្អាកសកម្មភាព…។

លោក លី សារី អភិបាលរងខេត្ត បានឱ្យដឹងថា មូលហេតុដែលអាជ្ញាធរចុះទៅត្រួតពិនិត្យ និងហាមឃាត់ក្រុមហ៊ុន KP MORN DANY Land & House ឬ ម៉ន ដានី លក់ដីឡូតិ៍ នាពេលនេះ ក៏ព្រោះតែអាជ្ញាធររដ្ឋបាលខេត្តមើលឃើញថា ក្រុមហ៊ុននៅតែបន្តសកម្មភាពលក់ដីឡូតិ៍ ដែលអាជ្ញាធរបានហាមឃាត់ ព្រោះតែដីទាំងនោះ អត់ទាន់មានច្បាប់ត្រឹមត្រូវ ដែលអាចបង្កហានិភ័យ និងគ្រោះថ្នាក់ដល់អតិថិជន..។

លោកអភិបាលរងខេត្ត បញ្ជាក់ថា មូលហេតុដែលលោកចុះទៅត្រួតពិនិត្យនោះ គឺបន្ទាប់ពីក្រុមហ៊ុន បានស្នើសុំមករដ្ឋបាលក្រុង-ខេត្តដឹកដីយកទៅចាក់នៅក្នុងគម្រោងដីឡូតិ៍នោះ ហើយអាជ្ញាធរបានរកឃើញភាពមិនប្រក្រតីមួយចំនួនដូចជា៖ ទី១. លិខិតស្នើសុំចាក់ដីរបស់ឈ្មោះម៉ន ដានី ជាម្ចាស់ក្រុមហ៊ុន ស្នើសុំអនុញ្ញាតច្បាប់បំពេញអាចម៍ដីកម្មសិទ្ធិឯកជន (ចាក់ដី) ហើយ មិនទាន់មានលិខិតអនុញ្ញាត ប៉ុន្តែបានធ្វើសកម្មភាពចាក់ដី សង់សំណងផ្សេងៗ និងបានផ្សព្វផ្សាយពីអាជីវកម្មលក់ដី លំនៅឋាន និងផ្ទះវិឡា។ ទី២. យោងលិខិតរបស់មន្ទីររៀបចំដែនដី នគរូបនីយកម្ម សំណង់ និងសុរិយោដីខេត្ត។ ទី៣. ពិនិត្យលើឯកសារដី មានឈ្មោះផ្សេងៗ និងមិនមានលិខិតអនុញ្ញាតនៅឡើយ ។

លោកអភិបាលរងខេត្ត បានឱ្យដឹងបន្តថា ក្នុងនាមជាអាជ្ញាធររដ្ឋបាលខេត្ត លោកមានក្ដីសោមនស្សចំពោះក្រុមហ៊ុនមួយចំនួន ដែលមានបំណងចង់មកបណ្តាក់ទុនវិនិយោគលើទឹកដីខេត្តភាគខាងលិចនេះ ប៉ុន្តែក្រុមហ៊ុនវិនិយោគទាំងអស់ ក៏ត្រូវគោរពច្បាប់របស់ប្រទេសកម្ពុជាដែរ មិនអាចធ្វើអ្វីមួយបំពានច្បាប់ឡើយ។ ដូច្នេះ ក្នុងនាមជាអាជ្ញាធរដែនដី គឺមានតែហាមឃាត់ ប្រសិនបើរកឃើញថា ក្រុមហ៊ុនណាមួយមិនគោរពច្បាប់ដែលកំពុងនៅជាធរមាននោះ។ ក្រោយពីភាក្សាជាមួយក្រុមមន្ត្រីជំនាញពាក់ព័ន្ធ ក្រុមការងារបានឯកភាពលើការចុះពិនិត្យស្ថានភាពទូទៅរបស់ក្រុមហ៊ុនខាងលើ ដោយការចុះធ្វើអធិការកិច្ចលើបច្ចេកទេសសំណង់ផ្ទះល្វែង ផ្ទះវីឡា របស់បុរី ម៉ន ដានីនេះតែម្ដង។ ម៉្យាង ម្ចាស់បុរី បានព្យាយាមគេចវេះ មិនចូលខ្លួនមកសហការ ឬដោះស្រាយជាមួយអាជ្ញាធរ ដោយទុកឱ្យតែបុគ្គលិកបម្រើការងារធម្មតាក្នុងក្រុមហ៊ុន ចេញមកជួប ដែលសកម្មភាពនេះ គឺជាការមើលស្រាលអាជ្ញាធរដែនដី។

ដោយឡែក លោក ឡុង វុធ អនុប្រធានមន្ទីររៀបចំដែនដីនគរូបនីយកម្ម សំណង់ និងសុរិយោដី បានឱ្យដឹងថា អាជ្ញាធរមន្ទីរ បានជូនដំណឹងដល់ម្ចាស់ក្រុមហ៊ុនរួចហើយ ពីការហាមឃាត់មិនឱ្យធ្វើសកម្មភាព ប៉ុន្តែក្រុមហ៊ុននេះ មិនគោរពតាមការណែនាំរបស់អាជ្ញាធរទេ។ ចំណែកពេលអាជ្ញាធរចុះមកត្រួតពិនិត្យ និងហាមឃាត់លើកទី១ គឺភាគីក្រុមហ៊ុនបញ្ជាក់ថា ក្រុមហ៊ុនកំពុងរត់ការ ហើយក៏ចាប់ផ្តើមធ្វើសកម្មភាពបណ្តើរៗដែរ ដើម្បីទុបទល់លើការខាតបង់នៃការចំណាយទៅលើបុគ្គលិកទៅវិញ។ ចំណែកប្រជាពលរដ្ឋដែលបានជ្រុលខ្លួនទិញដីឡូតិ៍ ទិញផ្ទះល្វែង ឬផ្ទះវីឡា កំពុងព្រួយបារម្ភពីការខាតបង់ប្រាក់កាសរបស់ខ្លួន ក្រោយពេលដឹងថា ក្រុមហ៊ុនKP MORN DANY Land & House ឬ ម៉ន ដានី លក់ដីឡូតិ៍ ធ្វើអាជីវកម្មគ្មានច្បាប់អនុញ្ញាតបែបនេះ…៕

ភ្នំពេញ៖ យោងតាមការចុះផ្សាយរបស់ ក្រសួងព័ត៌មាន បានឱ្យដឹងថា សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានមានប្រសាសន៍ ជំរុញក្រសួងសេដ្ឋកិច្ចនិងហិរញ្ញវត្ថុ និងក្រសួងសាធារណការនិងដឹកជញ្ជូន ឱ្យពន្លឿនការសិក្សាគម្រោងសាងសង់ផ្លូវរថភ្លើងល្បឿនលឿន ពីរាជធានីភ្នំពេញទៅខេត្តព្រះសីហនុ និងផ្លូវរថភ្លើងល្បឿនលឿនពីរាជធានីភ្នំពេញទៅក្រុងប៉ោយប៉ែត ដោយអភិវឌ្ឍន៍លើផ្លូវរថភ្លើងដែលមានស្រាប់ ដើម្បីបម្រើឱ្យវិស័យដឹកជញ្ជូនកាន់តែសម្បូរបែប ជំរុញកំណើនសេដ្ឋកិច្ច-សង្គមកម្ពុជាឱ្យកាន់តែរីកចម្រើន បង្កើនប្រាក់ចំណូល និងលើកកម្ពស់ជីវភាពប្រជាជន។

បើតាមសេចក្ដីប្រកាសព័ត៌មាន ស្ដីពីលទ្ធផលនៃសម័យប្រជុំពេញអង្គគណៈរដ្ឋមន្ត្រីចេញផ្សាយ ព្រលប់ថ្ងៃទីថ្ងៃទី១៣ ខែមករា ឆ្នាំ២០២៣ ក៏បានឱ្យដឹងដែរថា ក្នុងកិច្ចប្រជុំនោះ សម្ដេចតេជោ លើកទឹកចិត្តឱ្យក្រសួងស្ថាប័នពាក់ព័ន្ធនិងវិស័យឯកជន ជំរុញការអភិវឌ្ឍផលិតកម្មនិងការកែច្នៃផលិតផលកសិកម្មឬកសិឧស្សាហកម្ម មានជាអាទិ៍ ស្រូវ កៅស៊ូ ដំឡូងមី និងស្វាយចន្ទី ជាដើម ដើម្បីបង្កើនតម្លៃបន្ថែម និងពង្រីកទីផ្សារនៃការនាំចេញ។

ទន្ទឹមនេះដែរ សម្ដេចតេជោនាយករដ្ឋមន្ត្រី បានសម្រេចផ្ដល់ដី និងផ្ទះដែលជាទ្រព្យសម្បត្តិរដ្ឋ ដែលលោក គង់ គាំ បានស្ម័គ្រចិត្តប្រគល់ត្រឡប់ជូនក្រសួងការបរទេសនិងសហប្រតិបត្តិការអន្តរជាតិវិញ ទៅឱ្យគណៈកម្មាធិការជាតិរៀបចំការបោះឆ្នោត (គ.ជ.ប.) ដើម្បីប្រើប្រាស់ធ្វើជាទីស្នាក់ការរបស់ គណៈកម្មាធិការជាតិរៀបចំការបោះឆ្នោត៕

ភ្នំពេញ៖ ជនសង្ស័យជាលោក សង្ឃក្លែងក្លាយចំនួន ០៧នាក់ និងអ្នកបេីកបររថយន្តចំនួន ១នាក់ ត្រូវបានកម្លាំងនៃអធិការដ្ឋាននគរបាលខណ្ឌពោធិ៍សែនជ័យឃាត់ខ្លួន ។

ការឃាត់ខ្លួននេះបានធ្វើឡើងនៅថ្ងៃទី១៣ ខែមករា ឆ្នាំឲ២០២៣ វេលាម៉ោង១១:៣០នាទីព្រឹក ស្ថិតនៅភូមិព្រៃ ជីសាក់ សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ។

វត្ថុតាំងដកហូតរួមមាន ៖ បាតសំរាប់បិណ្ឌដាក់បាយចំនួន៧គ្រឿង ,ស្បង់ ជីវមួយចំនួន និង សម្ភារៈមួយចំនួន ទៀត ។

បច្ចុប្បន្ន ជនសង្ស័យខាងលើ កំពុងឃាត់ខ្លួននៅអធិការ ដ្ឋាននគរបាលខណ្ឌពោធិ៍សែនជ័យ ដើម្បីកសាងសំណុំរឿងបញ្ជូនទៅសាលាដំបូងរាជធានីភ្នំពេញ ដើម្បីចាត់ការបន្តតាមនីតិវិធី៕