តារាចម្រៀង ឈីន រតនៈ បានចែករំលែកបទពិសោធន៍ផ្ទាល់ខ្លួនក្នុងនាមជាអតីតបេក្ខភាពមួយរូបរបស់កម្មវិធី The Voice Cambodia រដូវកាលទី២ ថាអំឡុងពេលប្រលងជាពេលត្រូវសន្សំពិន្ទុពីមហាជនព្រោះពឹងលើសមត្ថភាពតែមួយមុខមិនអាចជោគជ័យឡើយ ដូច្នេះមុនប្រើពេលសម្តីណាមួយត្រូវគិតពិចារណាឱ្យបានច្រើនដង។

នៅល្ងាចថ្ងៃទី១៥ ខែមិថុនា ឆ្នាំ២០២៣ នៅលើបណ្តាញសង្គមរបស់តារាចម្រៀងប្រចាំផលិតកម្មហង្សមាស និងជាអតីតបេក្ខភាពមួយរូបបានចែករំលែកថា « បទពិសោធន៍ខ្លះៗក្នុងនាមខ្ញុំក៏ធ្លាប់ជាបេក្ខភាពប្រឡងកម្មវិធី The Voice Cambodia រដូវកាលទី 2 មួយរូបពេលវេលាដែលកំពុងប្រឡងគឺជាពេលដែលអ្នកគួរសន្សំពិន្ទុះក្តីស្រលាញ់ពី គណៈកម្មការ ជាពិសេសពុកម៉ែបងប្អូនមហាជនតែម្តង សមត្ថភាពតែមួយមុខ មិនអាចជួយឱ្យអ្នកជោគជ័យបានឡើយ ត្រូវបូកផ្សំជាមួយនិងអត្តចរិតផងដែរ ទើបអាចទទួលបានការគាំទ្រពីពុកម៉ែបងប្អូនមហាជនបានយូរអង្វែង » ។

ម្ចាស់បទ «មួយឆាវ» រូបនេះបានបន្ថែមទៀតថា «ដូច្នេះមុននិងប្រើប្រាស់ពាក្យសម្តីសូមគិតពិចារណាឱ្យច្រើនដងមុននិងនិយាយអ្វីមួយ នេះគ្រាន់តែជាបទពិសោធន៍បន្តិចបន្តួចសម្រាប់ចែករំលែកដល់បេក្ខភាពជំនាន់ក្រោយតែប៉ុណ្ណោះ»៕

តារាសម្តែង នី មុន្នីនាថ បានបង្ហាញអារម្មណ៍រំភើបចិត្តជាខ្លាំងបន្ទាប់ពីខ្លួនត្រូវបានឯកឧត្តម ម៉ម ប៊ុនហេង រដ្ឋមន្រ្តីក្រសួងសុខាភិបាលកោតសរសើរ បន្ទាប់ពីតារាសម្តែងរូបនេះបានកៀងគរអ្នកសិល្បៈជាច្រើនរូបចូលរួមក្នុងព្រឹត្តិការណ៍ទិវាពិភពលោកនៃអ្នកបរិច្ចាគឈាម កាលពីថ្ងៃទី១៤ មិថុនានេះ។

នៅលើបណ្តាញសង្គមហ្វេកប៊ុកនាថ្ងៃទី១៥ ខែមិថុនា នេះ នី មុន្នីនាថ ដែលជាប្រធានមូលនិធិមូលនិធិឈាម នី មុនីនាថ បានសរសេរយ៉ាងដូច្នេះថា «ជាមហាកិតិ្តយសសម្រាប់នាងខ្ញុំ ដែលទទួលបានការកោតសរសើរពី ឯកឧត្តមសាស្រ្តាចារ្យ ម៉ម ប៊ុនហេង រដ្ឋមន្រ្តីក្រសួងសុខាភិបាលក្នុងព្រឹត្តិការណ៍ ទិវាពិភពលោកនៃអ្នកបរិច្ចាគឈាម ថ្ងៃទី១៤ មិថុនានេះ នៅមជ្ឈមណ្ឌលជាតិផ្តល់ឈាម។ រួមគ្នា ផ្តល់ឈាម ផ្តល់ប្លាស្មា យើងអាចធ្វើបានច្រើនដង ដើម្បីជួយជីវិតមនុស្ស!»។

ជាមួយការកោតសរសើរនេះ តារាសម្តែងទឹកភ្នែក នី មុនីនាថ បានអរគុណយ៉ាងខ្លាំងបំផុតដល់លោក G-Devith និងសិល្បករ សិល្បការិនី ជាច្រើនរូបទៀតទោះជារវល់យ៉ាងណាក៏បានឆ្លៀតផ្តល់ជាកិត្តិយសចូលរួមកម្មវិធីមនុស្សធម៌តាមរយៈការបរិច្ចាគឈាមក្រោមប្រធានបទ «ទិវាពិភពលោកនៃអ្នកបរិច្ចាគឈាម»។

គួរបញ្ជាក់ផងដែរថា ក្នុងទិវាខាងលើដែលប្រព្រឹត្តទៅកាលពីពេលថ្មីៗនេះគេសង្កេតឃើញមានវត្តមានតារាល្បីៗជាច្រើនចូលរួមមានដូចជា៖ លោក ជី ដេវីត , ប៉ែន ចំរ៉ុង,រចនា រ៉ាវ៉ាឌី, ព្រីន,អេឡិច ហ្សូរ៉ា, Athika ,ជេ ស៊ីកា និងសិល្បករផ្សេងទៀតចូលរួមដែលជារឿងគម្រូមួយសម្រាប់ការចូលរួមបរិច្ចាគឈាម៕

ជុំវិញការរិះគន់រឿង សុខុម រចនា មានចរិតខ្មើតមិនផ្តល់ Credit ឱ្យម្ចាស់ដើមបទ «How abot Now?លោកជី ដេវីត កៀកនឹងបញ្ចប់ទៅហើយ ស្រាប់តែធ្លាយរឿងបងប្រុសរបស់បេក្ខនារីរូបនេះបោះសម្តីថា ម្ចាស់បទក៏មិនអាច Report បទដែលប្អូនលោក COVER បានឡើងព្រោះច្រៀងតុងខុសគ្នា ថែមទាំងជា Melody ថ្មីទៀត ស្រាប់តែអ្នកលេងបណ្តាញសង្គមផ្ទុះកំហឹងជាថ្មី ព្រមទាំងនាំគ្នាសម្រុកចូលទៅ Report បទ «How abot Now?» Version អកកាដង់យ៉ាងច្រើន។

ជឿជាក់ថាប្រិយមិត្តជ្រាបមកហើយរឿងក្តៅគគុកទៅលើបេក្ខនារី The Voice Cambodia រដូវកាលទី៣ សុខុម រចនា អរគុណ៣០M Views មិនខ្ចីអរគុណម្ចាស់ដើមលោក ជី ដេវីត ធ្វើឱ្យមហាជនរិះគន់ និងបញ្ចេញប្រតិកម្មយ៉ាងច្រើនព្រមទាំងមានការលើកឡើងថា នាងជាមនុស្សខ្មើតនិងហៅជាច្រើនទៀតតាមការយល់ឃើញរបស់ពួកគេ។ យ៉ាងណាមិញ រឿងនេះបានថយកម្តៅបន្តិចបន្ទាប់ពី សុខុម រចនា បានប្តូរ Caption សុំការអធ្យាស្រ័យពីសំណាក់មហាជននិងបានបញ្ជាក់ថាលោក ជី ដេវីត ជាម្ចាស់បទ «How about Now?»។

កៀកនឹងបញ្ចប់ទៅហើយស្រាប់តែអ្នកលេងបណ្តាញសង្គមផ្ទុះកំហឹងជាថ្មី បន្ទាប់ពីធ្លាយរឿងបងប្រុសរបស់ សុខុម រចនា ដែលមានគណនី Thik TK បានបោះសម្តីថាបទ How about Now? អកកាដង់ សូម្បីម្ចាស់បទក៏មិនអាច report បានដែរ រហូតធ្វើឱ្យអ្នកលេងបណ្តាញសង្គមផ្ទុះកំហឹងជាថ្មី។
អត្ថន័យដែលគណនី Thik Tk បានសរសេរនោះមានសេចក្តីថា «បើមិនយល់អាចសួរខ្ញុំបាន ម្ចាស់បទក៏មិន អាចReport បទខ្ញុំមិនកើតដែរ តុងខុសគ្នា Melodyថ្មីទៀត សូមឱ្យតម្លៃសិល្បៈផង មិនមែនអង្គុយៗចេញលទ្ធផលឯកឯងទេ»។ ការសរសេរនេះគឺលោកឆ្លើយតបទៅគណនីមួយដែលមានការលើកឡើងថា «ខ្លួនឯងខ្លាចគេយកវីឌីអូផុស ត តែមើលទៅម្ចាស់បទដូចអត់ខ្លាចដូចគាត់សោះ» ដែលការឆ្លើយឆ្លងនេះគឺកាលពី១២សប្តាហ៍មុន។

យ៉ាងណាមិញ បន្ទាប់ពីធ្លាយរឿងបងប្រុស សុខុម រចនា លើកឡើងថាម្ចាស់បទក៏មិនអាច Report បានអ្នកលេងបណ្តាញសង្គមជាច្រើនបានសម្តែងការមិនពេញចិត្តឡើយ ដោយមានអ្នកលើកឡើងថា នៅពីក្រោយភាពខ្មើតរបស់ប្អូនស្រីគឺដោយសារតែមានប្រុសនេះឯង ចំណែកមួយផ្នែកធំទៀតបាននាំគ្នាសម្រុកចូលទៅ repot បទ Cover «How about Now?»ដែលពេលនេះមានចំនួន៣១លានដងនៅលើឆាណែលយូធូបរបស់ Thik Tk ផងដែរ៕

អគ្គលេខាធិការសហព័ន្ធកីឡាបាល់ទះកម្ពុជា VFC លោក អាំង សិរីពិសិដ្ឋ បានបង្ហើបតម្រុយមកថា កម្ពុជាយើងនឹងមានលីគបាល់ទះ តាមស្តង់ដាមួយ នាចុងឆ្នាំនេះ។

លោក អាំង សិរីពិសិដ្ឋ និយាយថា៖ “នៅចុងឆ្នាំ២០២៣ នេះយើងនឹងបង្កើតពានរង្វាន់លីគកីឡាបាល់ទះ តេជោលីគ។ ទន្ទឹមនឹងជិតបើកលីគបាល់ទះ មន្រ្តីសហព័ន្ធយើងក៏មានកង្វល់ចំពោះអ្នកលេងបាល់ទះក្រៅផ្លូវការដែលជាកត្តាមួយនាំឱ្យវិស័យបាល់ទះនៅកម្ពុជា ធ្លាក់អន់ថយវិញផងដែរ”។

លោកបានសង្កត់ធ្ងន់ថា៖”យើងកំពុងរង់ចាំច្បាប់កីឡាដាក់ចេញសិន និងយើងមានតែអញ្ជើញម្ចាស់តារាងមកអប់រំណែនាំ ហើយនូវពេលដែលច្បាប់បានចេញហើយយើងនឹងមានការបពិន័យផ្សេងៗ»។ នេះជាការបន្ថែមរបស់អគ្គលេខាធិការ VFC ក្រោយលោកមើលឃើញថា ការលេងចាប់បាល់បោករបស់អ្នកលេងមួយចំនួនធំ នៅតែបន្តដែលធ្វើឱ្យខូចសណ្តាប់ធ្នាក់វិស័យកីឡាបាល់ទះនៅកម្ពុជា”៕

រយៈពេល៥ខែដើមឆ្នាំ២០២៣ កម្ពុជាទទួលបានភ្ញៀវទេសចរអន្តរជាតិប្រមាណ២,១លាននាក់ កើនឡើង ៥៣០% ធៀបនឹងរយៈពេលដូចគ្នាឆ្នាំ២០២២ រីឯទេសចរក្នុងស្រុកប្រមាណ ១០លាននាក់។ នេះបើតាមការប្រសាសន៍របស់ឯកឧត្តមរដ្ឋមន្ត្រី ថោង ខុន ឱកាសអញ្ជើញជាអធិបតីបើកកិច្ចប្រជុំលើកទី៥ នៃក្រុមការងាររាជរដ្ឋាភិបាល និងឯកជនដើម្បីស្តារ និងលើកស្ទួយវិស័យទេសចរណ៍កម្ពុជា ក្នុងនិងក្រោយវិបត្តិជំងឺកូវីដ-១៩ នៅទីស្តីការក្រសួងទេសចរណ៍នាថ្ងៃទី១៤ ខែមិថុនា ឆ្នាំ២០២៣។

បើតាមឯកឧត្ដមរដ្ឋមន្ត្រី ថោង ខុន តាមការព្យាករក្នុងឆ្នាំ២០២៣ កម្ពុជារំពឹងថានឹងទទួលភ្ញៀវទេសចរអន្តរជាតិប្រមាណ ៤លាននាក់ និងភ្ញៀវទេសចរក្នុងស្រុកប្រមាណយ៉ាងតិច ១៦លាននាក់។ ការសម្រេចបាននេះ គឺប្រហាក់ប្រហែលទៅនឹងការព្យាកររបស់ផែនទីចង្អុលផ្លូវ ស្តីពីផែនការស្តារ និងលើកស្ទួយវិស័យទេសចរណ៍កម្ពុជា ក្នុង និងក្រោយវិបត្តិជំងឺកូវីដ-១៩ ដែលរំពឹងថាការស្តារវិស័យទេសចរណ៍កម្ពុជាឡើងវិញនឹងត្រូវប្រើពេលក្នុងរង្វង់ ៥ឆ្នាំ ដោយអាចនឹងទទួលបានភ្ញៀវទេសចរអន្តរជាតិក្នុងកម្រិតប្រហាក់ប្រហែលពេលមុនវិបត្តិ នៅក្នុងឆ្នាំ២០២៥ ឬយ៉ាងយូរនៅឆ្នាំ២០២៦ ក្រោមទម្រង់អក្សរ U។

ឯកឧត្ដម ថោង ខុន បានឱ្យដឹងទៀតថា ដើម្បីបន្តការគាំទ្រដំណើរឆ្ពោះទៅកាន់អនាគតកាន់តែប្រសើរនៃវិស័យទេសចរណ៍កម្ពុជាការរៀបចំនូវផែនការយុទ្ធសាស្រ្តជាតិអភិវឌ្ឍន៍ទេសចរណ៍ ឆ្នាំ២០២៣-២០៣៥ ពិតជាមានភាពចាំបាច់ណាស់ ដោយផែនការនេះមានការសហការជាមួយក្រសួង ស្ថាប័នពាក់ព័ន្ធ និងវិស័យឯកជន ក្នុងការរៀបចំនូវសេចក្ដីព្រាង ផែនការយុទ្ធសាស្រ្តជាតិនេះឡើង៕

ភ្នំខ្នងព្រះ ជាគោលដៅទេសចរណ៍បែបផ្សងព្រេងថ្មីលើទឹកដីខេត្តពោធិ៍សាត់ កំពុងតែទាក់ទាញភ្ញៀវទេសចរឱ្យចង់ដឹងចង់ស្គាល់ពីសក្កានុពល សម្រស់ដ៏ស្រស់ត្រកាលនៃតំបន់ទេសចរណ៍ធម្មជាតិ ដែលមានទេសភាពស្អាត មានព្រៃឈើតូចធំ ខៀវស្រងាត់អមដោយផ្កាព្រៃចម្រុះពណ៌ និងមានជីវៈចម្រុះជាច្រើន។

ភ្នំខ្នងព្រះ ជាតំបន់អេកូទេសចរណ៍ថ្មី កំពុងឆក់យកបេះដូងភ្ញៀវទេសចរយ៉ាងខ្លាំង ជាពិសេសអ្នកទេសចរដែលនិយមធ្វើដំណើរផ្សង ព្រេងដោយសារទីនោះ មានផ្ទាំងថ្មដែលជាថ្មភ្នំធម្មជាតិដ៏ស្រស់ស្អាត មានព្រៃព្រឹក្សាខៀវស្រងាត់ ជាមួយនឹងភ្នំល្វឹងល្វើយអមដោយផ្កាព្រៃ ចម្រុះពណ៌ដែលពេញនិយមបំផុតសម្រាប់ភ្ញៀវទេសចរឡើងភ្នំបោះតង់ សម្រាកលម្ហែកាយស្រូបយកខ្យល់អាកាសបរិសុទ្ធ គយគន់ធម្មជាតិព្រៃភ្នំ និង ស្តាប់សំឡេងសត្វយំប្រគំជាបទភ្លេង រំសាយអារម្មណ៍ បាត់អស់ទុក្ខកង្វល់។

នៅពេលឡើងដល់កំពូលភ្នំ អ្នកទេសចរអាចអង្គុយមើលទេសភាពពីលើកំពូលភ្នំឃើញខេត្តពោធិ៍សាត់ទាំងមូល និងផ្លូវកាច់កោងគួរឱ្យទាក់ទាញនៃភ្នំ ១៥០០។

លើសពីនោះនៅព្រឹកព្រលឹមអ្នកទេសចរអាចអង្គុយមើលថ្ងៃរះពីលើកំពូល ភ្នំហើយនៅពេលថ្ងៃអាចដើរ កម្សាន្តថតរូបទុកជាអនុស្សាវ រីយ៍ រីឯពេលរាត្រីអាចដុតភ្លើងអង្គុយមុខតង់មើលផ្កាយរះយ៉ាងប្លែកភ្នែកទៀតផង។

យើងក៏អាចក្រឡេកមើលឃើញទេសភាពទៅខេត្តត្រាតប្រទេសថៃ និងមើលថ្ងៃលិច នៅលើភ្នំ១៥០០ នេះផងដែរ។

សូមបញ្ជាក់ផងដែរថា ភ្នំខ្នងព្រះស្ថិតនៅតាមតំបន់ភ្នំ ១៥០០នៃឃុំអូរសោមស្រុកវាលវែងខេត្តពោធិ៍សាត់ភ្ញៀវទេសចរអាចធ្វើដំណើរឡើង លើភ្នំនេះដោយថ្មើជើងប្រហែលជា ៥ទៅ៦ម៉ោងអាស្រ័យទៅលើអ្នកដំណើរដើរយឺត ឬដើរលឿនតែប៉ុណ្ណោះ៕