ប្រទេសថៃ ៖ កសិករដាំដុះកញ្ឆានៅតំបន់ភាគឦសានប្រទេសថៃ បានអំពាវនាវឱ្យរដ្ឋាភិបាលថ្មីដាក់កញ្ឆាជាគ្រឿងញៀនដូចមុន ហើយជំរុញឱ្យដាំកញ្ឆាសម្រាប់ផ្នែកវេជ្ជសាស្ត្រតែប៉ុណ្ណោះ ពីព្រោះបច្ចុប្បន្ន ពួកគេទទួលរងផលប៉ះពាល់ដោយសារគោលនយោបាយកញ្ឆាសេរី ។

គេសង្កេតឃើញថា ចម្ការកញ្ឆាមួយកន្លែងនៅស្រុកមឿងមហាសារខាម ខេត្តមហាសារខាម ប្រទេសថៃ បានផ្លាស់ប្តូរមកដាំដំណាំចេកវិញ ដោយសារកញ្ឆាគ្មានទីផ្សារលក់ចេញ ។ លោក សាំលី រ៉ាក់សុទ្ធី សមាជិកសហគ្រាសសហគមន៍ «ណងម៉ង ផារួយ» លើកឡើងថា កាលពីមុន លោកបានដាំកញ្ឆាចំនួន៥០០ដើម និងចំណាយប្រាក់អស់២សែនបាត ប៉ុន្តែពេលនេះ នៅសល់ដើមកញ្ឆាត្រឹមតែ២ដើមប៉ុណ្ណោះ ព្រោះគ្មានទីផ្សារលក់ចេញ ។ លោករំពឹងថា លោក អនុថិន ឆាយវីរៈគូន នឹងលើកកម្ពស់ការដាំកញ្ឆាសេរី និងរកទីផ្សារឱ្យកសិករ ។

ចំណែកលោក ម៉ន់ទ្រី យៀមស៊ុងនឺម ប្រធានសហគ្រាសសហគមន៍ប្រចាំខេត្តនគរាជសីម៉ា លើកឡើងថា បច្ចុប្បន្ន កសិករដាំកញ្ឆានៅខេត្តនគរាជសីម៉ា បានទទួលរងផលប៉ះពាល់យ៉ាងខ្លាំង ដោយសារគោលនយោបាយកញ្ឆាសេរី ហើយកសិករមិនអាចលក់ទិន្នផលកញ្ឆាបានទេ ។ ដូច្នេះ ធ្វើឱ្យសមាជិកចំនួន៤៣២នាក់រងផលប៉ះពាល់ជាខ្លាំង ។ គោលនយោបាយកញ្ឆាសេរីបានធ្វើឱ្យកសិករដាំកញ្ឆានៅទូទាំងប្រទេសថៃរងផលប៉ះពាល់ ដោយសារស្លឹក, ឫស, ដើម និងទិន្នផលផលិតមិនអាចលក់ចេញបាន ព្រមទាំងធ្វើឱ្យតម្លៃធ្លាក់ចុះ ។ ម្យ៉ាងទៀត ប្រទេសថៃបាននាំចូលកញ្ឆាជាច្រើនពីក្រៅប្រទេសទៀតផង ។

លោក ម៉ន់ទ្រី យៀមស៊ុងនឺម សង្ឃឹមថា រដ្ឋាភិបាលថ្មីនឹងដាក់កញ្ឆាជាគ្រឿងញៀនដូចមុន និងជំរុញឱ្យដាំកញ្ឆាសម្រាប់ផ្នែកវេជ្ជសាស្ត្រតែប៉ុណ្ណោះ ដើម្បីគ្រប់គ្រងមិនឱ្យកញ្ឆារាលដាលទៅគ្រប់លំនៅឋានពលរដ្ឋ ។

រីឯកសិករនៅខេត្តឈៀងម៉ៃបាននាំគ្នាដាក់លិខិតស្នើទៅកាន់សាលាខេត្តឈៀងម៉ៃផងដែរ ដោយសារពួកគេទទួលក្លិនចេញពីរោងចក្រកែច្នៃកញ្ឆា ដែលមានទីតាំងនៅក្នុងទីប្រជុំជនមានអ្នកស្រុករស់នៅជាច្រើននាក់ និងជាតំបន់ពាណិជ្ជកម្មច្រើនជាងកសិកម្ម ។ ហេតុនេះ អាជ្ញាធរមិនគួរអនុញ្ញាតឱ្យដាំកញ្ឆា និងបង្កើតរោងចក្រកែច្នៃកញ្ឆាទេ ព្រោះក្លិនកញ្ឆាធ្វើឱ្យប៉ះពាល់សុខភាពអ្នកស្រុករស់នៅក្បែរនេះ ។ ដូច្នេះ ពួកគេបានសំណូមពរឱ្យរដ្ឋាភិបាលថ្មីចុះមកត្រួតពិនិត្យ និងពិចារណាផ្អាក ឬលុបចោលលិខិតអនុញ្ញាតដាំកញ្ឆា ។

លោក វីរៈផុង វង្សសែនស៊ី អ្នកជំនាញប្រចាំខេត្តឈៀងម៉ៃ លើកឡើងថា ជាបឋម លោកបានជ្រាបពីការបារម្ភរបស់អ្នកស្រុក បន្ទាប់មក លោកនឹងដាក់លិខិតទៅកាន់មន្ត្រីថ្នាក់ខេត្តឈៀងម៉ៃ ដើម្បីពិចារណាពីបញ្ហានេះបន្តទៀត ៕ ប្រភព ៖ Thai PBS

ប្រទេសវៀតណាម ៖ សារព័ត៌មានរ៉យទ័របានចុះផ្សាយថា រដ្ឋាភិបាលវៀតណាមនឹងចុះហត្ថលេខាលើកិច្ចព្រមព្រៀងពាណិជ្ជកម្មអង្ករជាមួយរដ្ឋាភិបាលហ្វីលីពីន នាពេលឆាប់ៗនេះ ដើម្បីជួយធានាដល់សន្តិសុខស្បៀង ។ នេះបើតាមការបញ្ជាក់ពីរដ្ឋាភិបាលវៀតណាម កាលពីថ្ងៃទី៧ ខែកញ្ញា ឆ្នាំ២០២៣ ។

ការប្រកាសរបស់រដ្ឋាភិបាលវៀតណាមនេះ ធ្វើឡើងបន្ទាប់ពីកិច្ចប្រជុំដាច់ដោយឡែករវាងនាយករដ្ឋមន្ត្រីវៀតណាម លោក Pham Minh Jing និងប្រធានាធិបតីហ្វីលីពីន លោក Ferdinand Marcos Jr. ក្រៅកិច្ចប្រជុំកំពូលអាស៊ាននៅប្រទេសឥណ្ឌូណេស៊ី ។ ប៉ុន្តែមិនទាន់មានព័ត៌មានលម្អិតបន្ថែមទៀតពាក់ព័ន្ធនឹងកិច្ចព្រមព្រៀងដែលបានគ្រោងទុកនោះទេ ។

កាលពីឆ្នាំ២០២២ ប្រទេសវៀតណាមបាននាំចេញអង្ករក្នុងបរិមាណយ៉ាងច្រើនស្ថិតក្នុងលំដាប់ទី៣ នៅលើពិភពលោក បន្ទាប់ពីប្រទេសឥណ្ឌា និងថៃ ។ ចំណែកហ្វីលីពីន គឺជាប្រទេសទិញអង្ករដ៏ច្រើនបំផុតរបស់វៀតណាម ។

នៅខែកក្កដា ឆ្នាំ២០២៣ ប្រទេសឥណ្ឌាដែលបានកាន់កាប់ចំណែកទីផ្សារជាង៤០% នៃពាណិជ្ជកម្មអង្ករលើពិភពលោក បានបញ្ជាឱ្យផ្អាកការនាំចេញអង្ករទៅក្រៅប្រទេស ។ ការផ្អាកការនាំចេញអង្កររបស់ឥណ្ឌា គឺដើម្បីដោះស្រាយបញ្ហាតម្លៃអង្ករក្នុងប្រទេស ទើបធ្វើឱ្យតម្លៃអង្ករនៅទូទាំងពិភពលោក កើនឡើងខ្ពស់បំផុតក្នុងរយៈពេល១៥ឆ្នាំ ហើយធ្វើឱ្យប្រទេសផ្សេងៗបារម្ភអំពីតម្លៃស្បៀង ខណៈបច្ចុប្បន្ន វាបានឡើងថ្លៃស្រាប់ហើយ ៕ ប្រភព ៖ mgronline

បរទេស៖ ការរញ្ជួយដីដែលបានកើតឡើងនៅក្នុងតំបន់ High Atlas កាលពីយប់ថ្ងៃទី ៨ ខែកញ្ញា បានធ្វើឱ្យមនុស្សយ៉ាងហោចណាស់ ៦៣២ នាក់ស្លាប់ និង ៣២៩ នាក់ទៀតរងរបួស ក្នុងនោះ ៥១ នាក់បានធ្លាក់ខ្លួនឈឺធ្ងន់ នេះបើយោងតាមក្រសួងមហាផ្ទៃរបស់ប្រទេសម៉ារ៉ុកដែលបានធ្វើបច្ចុប្បន្នភាពអំពីអ្នកស្លាប់និងរបួស។
ចំណុចកណ្តាលនៃការរញ្ជួយដីស្ថិតនៅជម្រៅ ១៨.៥ គីឡូម៉ែត្រ ក្នុងតំបន់ដាច់ស្រយាល Ighil ប្រហែល ៧២ គីឡូម៉ែត្រពីទីក្រុង Marrakech ដែលជាទីក្រុងមានមនុស្សរស់នៅ ៨៤០,០០០ នាក់ ។ មន្ត្រីក្នុងតំបន់នោះបាននិយាយថា អ្នកស្លាប់ភាគច្រើនគឺនៅតំបន់ភ្នំដែលពិបាកទៅដល់។

យោងតាមក្រសួងមហាផ្ទៃរបស់ប្រទេសម៉ារ៉ុក អាជ្ញាធរបានប្រមូលធនធានចាំបាច់ទាំងអស់ ដើម្បីអន្តរាគមន៍ និងគាំទ្រតំបន់ដែលរងផលប៉ះពាល់។ ទីភ្នាក់ងារស្ទាបស្ទង់ភូមិសាស្ត្រអាមេរិក (USGS) បាននិយាយថា នេះគឺជាការរញ្ជួយដីខ្លាំងបំផុតដែលបានវាយប្រហារប្រទេសអាហ្វ្រិកខាងជើងនេះក្នុងរយៈពេលមួយសតវត្ស។
អ្នកនាំពាក្យអង្គការសហប្រជាជាតិ លោក Stephane Dujarric បាននិយាយថា អង្គការសហប្រជាជាតិ ត្រៀមខ្លួនរួចជាស្រេច ដើម្បីគាំទ្ររដ្ឋាភិបាលម៉ារ៉ុក នៅក្នុង “កិច្ចខិតខំប្រឹងប្រែងរបស់ខ្លួន ដើម្បីជួយប្រជាជនដែលរងផលប៉ះពាល់” ។ នាយករដ្ឋមន្ត្រីឥណ្ឌា Narendra Modi និងនាយករដ្ឋមន្ត្រីអាល្លឺម៉ង់ Olaf Scholz ក៏បានផ្ញើសាររំលែកទុក្ខដល់ជនរងគ្រោះនៃគ្រោះមហន្តរាយនេះផងដែរ។

ម៉ារុក មានទីតាំងនៅអាហ្រ្វិកខាងជើង ដែលមានព្រំប្រទល់ជាប់ប្រទេសអាល់ហ្សេរី នៅភាគខាងកើត ឆ្លងកាត់ច្រកសមុទ្រ Gibraltar ពីប្រទេសអេស្ប៉ាញ។
ប្រទេសនេះមានផ្ទៃដី ៤៤៦,០០០ គីឡូម៉ែត្រការ៉េ និងមានប្រជាជនចំនួន ៣៥ លាននាក់។ ភាគច្រើននៃភាគខាងកើតប្រទេសម៉ារ៉ុកគឺជាវាលខ្សាច់សាហារ៉ាដែលមានប្រជាជនតិច ហើយ Casablanca គឺជាទីក្រុងធំបំផុតរបស់ប្រទេសម៉ារ៉ុក និងជាកំពង់ផែដ៏សំខាន់របស់ប្រទេស៕
ប្រភព៖vnexpress

នៅឆ្នាំ២០២៣ ជំងឺគ្រុនឈាមបានឆ្លងរាតត្បាតយ៉ាងខ្លាំងនៅអាស៊ីខាងត្បូង ជាពិសេស មានអ្នកស្លា.ប់ជាច្រើននាក់នៅប្រទេសបង់ក្លាដែស ។ អ្នកជំនាញបញ្ជាក់ថា ជំងឺគ្រុនឈាមកើនឡើងដោយសារអាកាសធាតុក្តៅ និងរដូវមូសុងអូសបន្លាយពេលយូរ ។

ប្រទេសបង់ក្លាដែសមានអ្នកស្លា.ប់ដោយសារជំងឺគ្រុនឈាម យ៉ាងតិចចំនួន៦៩១នាក់នៅឆ្នាំ២០២៣ និងមានអ្នកឆ្លងជំងឺនេះជាង១៣ម៉ឺន៨ពាន់នាក់ ។ វាធ្វើឱ្យឆ្នាំ២០២៣ ក្លាយជាឆ្នាំមានអ្នកស្លា.ប់ដោយសារជំងឺគ្រុនឈាមច្រើនបំផុត បើគិតតាំងពីជំងឺនេះចាប់ផ្តើមរាតត្បាតនៅឆ្នាំ២០០០ ហើយវាកើនឡើងយ៉ាងខ្លាំង បើធៀបជាមួយស្ថិតិខ្ពស់បំផុតនាឆ្នាំ២០២២ គឺស្មើត្រឹមតែ២៨១នាក់ ។

ចំណែកប្រទេសនេប៉ាល់មានអ្នកស្លាប់ដោយសារជំងឺគ្រុនឈាមយ៉ាងតិចចំនួន១៣នាក់ និងអ្នកឆ្លងជំងឺនេះជាង២១.២០០នាក់នៅឆ្នាំ២០២៣ ។ មន្ត្រីសុខាភិបាលបារម្ភថា ចំនួនអ្នកស្លា.ប់នៅឆ្នាំ២០២៣ អាចស្មើជាមួយឆ្នាំ២០២២ ដែលមានអ្នកស្លា.ប់៨៨នាក់ និងអ្នកឆ្លងចំនួន៥៤.០០០នាក់ ។

ជំងឺគ្រុនឈាម មិនត្រឹមតែឆ្លងនៅតំបន់អាស៊ីខាងត្បូងប៉ុណ្ណោះទេ ប៉ុន្តែមានអ្នកឆ្លងជំងឺគ្រុនឈាមកើនឡើងនៅទូទាំងពិភពលោកផងដែរ រហូតដល់៤,២លាននាក់នៅឆ្នាំ២០២២ កើនឡើង៨ដង បើធៀបនឹងឆ្នាំ២០០០ ។ អង្គការសុខភាពពិភពលោក (WHO) ដាស់តឿនថា ជំងឺគ្រុនឈាម គឺជាជំងឺកើតនៅតំបន់ក្តៅ, ឆ្លងលឿនបំផុត និងឆ្លងនៅទូទាំងពិភពលោកផងដែរ ។

អ្នកជំនាញផ្នែកជំងឺរាតត្បាតបញ្ជាក់ថា សីតុណ្ហភាពកើនឡើង និងរដូវមូសុងអូសបន្លាយពេលយូរបានធ្វើឱ្យសត្វមូសងាយស្រួលបង្កាត់ពូជ ។ អ្នកជំនាញផ្នែកជំងឺរាតត្បាតនៅប្រទេសបង់ក្លាដែសនិយាយថា កង្វះខាតវិធានការការពារត្រឹមត្រូវធ្វើឱ្យមូសអាចចម្លងជំងឺគ្រុនឈាមស្ទើរគ្រប់តំបន់នៅទូទាំងប្រទេស ខណៈលក្ខខណ្ឌអាកាសធាតុបានអំណោយផលដល់ការបង្កាត់ពូជមូស ។ ក្រៅពីនេះ នឹងមានអ្នកឆ្លងជំងឺគ្រុនឈាមកាន់តែច្រើននៅខែកញ្ញា ។ តាមធម្មតា ជំងឺគ្រុនឈាមនឹងឆ្លងរាតត្បាតនៅរដូវវស្សា ចាប់ពីខែមិថុនា ដល់ខែកញ្ញា ហើយចំនួនមូសនឹងកើនឡើងនៅតំបន់មានទឹកដក់ ។

ចំណែកអ្នកស្រាវជ្រាវនេប៉ាល់និយាយថា ជំងឺគ្រុនឈាមបានឆ្លងនៅទូទាំងប្រទេសយ៉ាងឆាប់រហ័សក្នុងរយៈពេលប៉ុន្មានឆ្នាំកន្លងមក ហើយមានអ្នកឆ្លងជំងឺនេះនៅរដូវស្លឹកឈើជ្រុះ ដែលមានសីតុណ្ហភាពទាបជាងរដូវមូសុង ។ នៅតំបន់ព្រៃភ្នំ ដែលមិនធ្លាប់មានជំងឺគ្រុនឈាមឆ្លងរាតត្បាត អាជ្ញាធរក៏បានព្យាយាមគ្រប់គ្រងចំនួនអ្នកឆ្លងផងដែរ ។

អង្គការសុខភាពពិភពលោក (WHO) បញ្ជាក់ថា កត្តាធ្វើឱ្យជំងឺគ្រុនឈាមកើនឡើង គឺមួយផ្នែកដោយសារពិភពលោកកាន់តែក្តៅ ព្រមទាំងកត្តាផ្សេងទៀតដូចជា ការបម្លាស់ទីរបស់មនុស្ស និងសម្ភារៈ, ការពង្រីកទីក្រុង ក៏ដូចជាបញ្ហាពាក់ព័ន្ធនឹងអនាម័យ ។ កាលពីខែកក្កដា ឆ្នាំ២០២៣ អង្គការ WHO លើកឡើងថា បរិមាណភ្លៀងធ្លាក់ខុសធម្មតា, សីតុណ្ហភាពកើនឡើង និងមានសំណើមខ្ពស់បានធ្វើឱ្យចំនួនមូសកើនឡើងនៅទូទាំងប្រទេសបង់ក្លាដែស ។

ក្រៅពីនេះ ក្នុងរយៈពេលជាច្រើនឆ្នាំកន្លងមក ប្រទេសបង់ក្លាដែសបានជួបនឹងរដូវមូសុងអូសបន្លាយពេលយូរជាងធម្មតា ដោយមានភ្លៀងធ្លាក់ចាប់ពីខែមីនា រហូតដល់ខែតុលា និងមានទឹកដក់ជាច្រើនកន្លែង ដែលអំណោយផលដល់ការបង្កាត់ពូជមូស ៕ ប្រភព ៖ Nation World News

នៅក្នុងការលាតត្រដាងនាពេលថ្មីៗនេះដោយ Women’s Wear Daily (WWD) Jennie Kim សមាជិកក្រុម BLACKPINK ត្រូវបានគេទទួលស្គាល់ថាជានារីម្នាក់ក្នុងចំណោមស្ត្រីដែលមានឥទ្ធិពលបំផុតទាំង ៥០ នៅក្នុងពិភពម៉ូដ និងសម្រស់សម្រាប់ឆ្នាំ២០២៣។

Jennie វ័យ២៧ឆ្នាំដែលជាជនជាតិកូរ៉េខាងត្បូងគឺជាតារា K-Pop តែមួយគត់នៅក្នុងបញ្ជីដ៏មានកិត្យានុភាពរួមជាមួយតារាល្បី ៗ នៅលើពិភពលោកដូចជា Selena Gomez ស្ថាបនិកនៃ Rare Beauty ,Scarlett Johansson និងស្ត្រីដែលនៅពីក្រោយម៉ាកយីហោដែលទទួលស្គាល់ទូទាំងពិភពលោកដូចជា Puma, Louis Vuitton, Nike,និង Chanel ជាដើម ។

ការដាក់បញ្ចូល Jennie នៅក្នុងបញ្ជីនេះគឺជាសក្ខីភាពមួយចំពោះឥទ្ធិពលដ៏សំខាន់របស់នាងនៅក្នុងពិភពម៉ូដដោយបានក្តោបតំណែងធ្វើការងារជាមួយម៉ាកល្បីៗជាច្រើន។ ការសហការរបស់នាងជាមួយ Calvin Klein ក្នុងខែឧសភា តាមសេចក្តីរាយការណ៍ទទួលបាន ៦.៨ លានដុល្លារ ក្នុងផលតម្លៃលើប្រព័ន្ធផ្សព្វផ្សាយ។ ការបង្ហោះតែម្តងនៃម៉ាកនេះ Jennie ទទួលបាន ២.១ លានដុល្លារ។ជាងនេះទៅទៀត Jennie ជាមួយម៉ាក Chanel គឺជាភាពអស្ចារ្យដោយនាងបានចូលរួមនៃយុទ្ធនាការធំៗចំនួនពីរនៅឆ្នាំនេះ៖ គ្រឿងអលង្ការ Coco Crush នៅក្នុងខែមករា និងកាបូបម៉ាក Chanel 22 នៅក្នុងខែមីនា។ វត្តមានរបស់នាងនៅក្នុងកម្មវិធី Paris Fashion Week រកចំណូលបាន ៤.៥លានដុល្លារ ឯណោះក្នុងប្រព័ន្ធផ្សព្វផ្សាយ។

ក្រៅពីការខិតខំដើរម៉ូដ Jennie នៅតែបន្តសកម្មភាពក្នុងពិភពតន្ត្រីជាមួយ BLACKPINK។ ក្រុមចម្រៀងនេះគ្រោងនឹងរៀបចំការប្រគំតន្ត្រីចុងក្រោយរបស់ពួកគេ “Born Pink” នៅទីក្រុងសេអ៊ូល ដែលជាការបញ្ចប់ការប្រគំតន្ត្រីទេសចរណ៍ពិភពលោកដែលបានចាប់ផ្តើមនៅក្នុងខែតុលា ឆ្នាំ២០២២។

ការទទួលស្គាល់ Jennie នេះនៅក្នុងបញ្ជី Women in Power របស់ WWD បញ្ជាក់ពីទេពកោសល្យជាច្រើនរបស់នាង និងឥទ្ធិពលដែលមិនអាចប្រកែកបានរបស់នាងទាំងនៅក្នុងឧស្សាហកម្មតន្ត្រី និងម៉ូដ៕