ម៉ូដែលរថយន្តខាងក្រោមនេះត្រូវបានគេស្គាល់ថាជាប្រភេទរថយន្តដែលមានតម្លៃសមរម្យបំផុតនៅសហរដ្ឋអាមេរិកដែលភាគច្រើនគឺម៉ាក Chevrolet, Nissan និង Toyota ។
យោងតាមបញ្ជីរថយន្តថោកបំផុតទាំង ១០ នៅឆ្នាំនេះបានឱ្យដឹងថា រថយន្តទាំងអស់នេះគឺមានតម្លៃក្រោមនិងជាង ២ ម៉ឺនដុល្លារប៉ុណ្ណោះ ខណៈដែលកន្លងទៅរថយន្តទាំងនោះគឺមានតម្លៃខ្ពស់ណាស់។ ដូច្នេះខាងក្រោមនេះគឺជាម៉ូដែលរថយន្តដែលមានតម្លៃថោកបំផុតក្នុងឆ្នាំ ២០២៣៖

១.រថយន្តម៉ាក Nissan Versa មានតម្លៃជាមធ្យមប្រមាណ ១៧.២៤៥ ដុល្លារអាមេរិកប៉ុណ្ណោះ
២.រថយន្តម៉ាក Mitsubishi Mirage មានតម្លៃជាមធ្យមប្រមាណ ១៧.៧៩០ ដុល្លារអាមេរិក
៣.រថយន្តម៉ាក Mitsubishi Mirage G4 មានតម្លៃជាមធ្យមប្រមាណ ១៨.៨៩០ ដុល្លារអាមេរិក
៤.រថយន្តម៉ាក Kia Forte មានតម្លៃជាមធ្យមប្រមាណ ២០.៩១៥ ដុល្លារអាមេរិក
៥.រថយន្តម៉ាក Hyundai មានតម្លៃជាមធ្យមប្រមាណ ២១.១៣៥ ដុល្លារអាមេរិក
៦. Kia Soul មានតម្លៃជាមធ្យមប្រមាណ ២១.៣១៥ ដុល្លារអាមេរិក
៧. Chevrolet Trax មានតម្លៃជាមធ្យមប្រមាណ ២១.៤៩៥ ដុល្លារអាមេរិក
៨.Nissan Sentra មានតម្លៃជាមធ្យមប្រមាណ ២១.៧៤៥ ដុល្លារអាមេរិក
៩. Nissan Kicks មានតម្លៃជាមធ្យមប្រមាណ ២២.១៥៥ ដុល្លារអាមេរិក
១០. Volkswagen Jetta មានតម្លៃជាមធ្យមប្រមាណ ២២.៥៨៥ ដុល្លារអាមេរិកប៉ុណ្ណោះ

ទោះជាយ៉ាងណាក៏ដោយ នេះគឺជាលើកទីមួយដែលរថយន្តថ្លៃបំផុត ស្ថិតក្នុងចំណោមរថយន្តថោកបំផុតទាំង ១០ នៅលើទីផ្សារសហរដ្ឋអាមេរិក។ ក្នុងនោះនៅបញ្ជីឆ្នាំ ២០២៣ បានកត់ត្រាថារថយន្តថោកជាងគេគឺរថយន្តម៉ាក Nissan Versa របស់ប្រទេសម៉ិកស៊ិក និងរថយន្តដែលថ្លៃបំផុតក្នុងចំណោមរថយន្តថោកបំផុតនោះគឺ Volkswagen Jetta របស់ប្រទេសម៉ិកស៊ិកដូចគ្នា៕

អង្គការសុខភាពពិភពលោក (WHO) បានស្នើទៅកាន់រដ្ឋាភិបាលប្រទេសនានានៅលើពិភពលោក ចេញវិធានការគ្រប់គ្រងបារីអេឡិចត្រូនិកឱ្យបានតឹងរ៉ឹងដូចការគ្រប់គ្រងបារីធម្មតាដែរ ។ បើតាមទិន្នន័យនាពេលបច្ចុប្បន្នបង្ហាញថា ចំនួនអ្នកជក់បារីអេឡិចត្រូនិកនៅទូទាំងពិភពលោក បានកើនឡើងខ្ពស់ជាបន្តបន្ទាប់ ជាពិសេស កុមារអាយុចាប់ពី១៣ឆ្នាំ ដល់១៥ឆ្នាំ បានជក់បារីអេឡិចត្រូនិកច្រើនជាងមនុស្សចាស់ ។

បើទោះជាអ្នកស្រាវជ្រាវ និងក្រុមមួយចំនួនបញ្ជាក់ថា បារីអេឡិចត្រូនិកមានចំណែកជួយឱ្យអ្នកជក់បារីធម្មតាអាចកាត់ផ្តាច់បារីបាន ឬជួយកាត់បន្ថយការស្លា.ប់របស់អ្នកជក់បារីធម្មតា ប៉ុន្តែការបញ្ជាក់ទាំងអស់នេះពុំទាន់មានភស្តុតាងគ្រប់គ្រាន់នៅឡើយទេ ។

អង្គការសុខភាពពិភពលោកបញ្ជាក់ថា ការជក់បារីអេឡិចត្រូនិកនឹងបណ្តាលឱ្យកើតជំងឺមហារីក, ប៉ះពាល់បេះដូង និងសួត ក៏ដូចជាប៉ះពាល់ដល់ការវិវឌ្ឍខួរក្បាលរបស់យុវវ័យទៀតផង ។ បារីអេឡិចត្រូនិកមិនត្រឹមតែបង្កគ្រោះថ្នាក់ដល់សុខភាពអ្នកជក់ប៉ុណ្ណោះទេ ប៉ុន្តែវានឹងបណ្តាលឱ្យក្រុមមនុស្សមិនជក់បារីញៀននឹងសារធាតុនីកូទីនផងដែរ ជាពិសេស កុមារ និងយុវវ័យ ។ ដូច្នេះ វាធ្វើឱ្យមនុស្សទូទៅប្រឈមនឹងបញ្ហាការញៀនសារធាតុនីកូទីននៅក្នុងខ្លួន បើទោះជាពួកគេពុំបានជក់បារីអេឡិចត្រូនិកក្តី ។

ហេតុនេះ អង្គការសុខភាពពិភពលោកចង់ឱ្យប្រទេសនីមួយៗអនុវត្តវិធានការរឹតបន្តឹងលើការគ្រប់គ្រងបារីអេឡិចត្រូនិក រួមទាំងហាមឃាត់ការប្រើប្រាស់សារធាតុបន្ថែមរសជាតិ និងក្លិនគ្រប់ប្រភេទ ដូចជា សារធាតុ Menthol ។ ប្រទេសនានាគួរតែអនុវត្តវិធានការផ្សេងៗផងដែរ ដូចជា ការរឹតបន្តឹងពន្ធ និងហាមជក់បារីអេឡិចត្រូនិកនៅទីសាធារណៈ ។

ចំណែកផ្នែកឧស្សាហកម្មបារីអេឡិចត្រូនិកនិយាយថា បារីអេឡិចត្រូនិកមានផលប៉ះពាល់ដល់សុខភាពតិចជាងបារីធម្មតា ។ វាអាចជួយកាត់បន្ថយគ្រោះថ្នាក់ដោយសារការជក់បារីធម្មតាបាន ថែមទាំងមានរសជាតិច្រើនឱ្យជ្រើសរើស និងមានតម្លៃថោកជាងបារីធម្មតាទៀតផង ។ ហេតុនេះ វាបានជំរុញឱ្យមនុស្សភាគច្រើនងាកមកជក់បារីអេឡិចត្រូនិក ៕ ប្រភព ៖ Mono News

កាលពីថ្ងៃទី១៤ ខែធ្នូ ឆ្នាំ២០២៣នេះ ភីលីពីនបានប្រកាសបណ្តេញជនជាតិចិនប្រមាណ១៨០នាក់ពីប្រទេសខ្លួន បន្ទាប់ពីបានឃុំខ្លួនពួកគេកាលពីខែមុន ដែលបានសង្ស័យថាជាប់ពាក់ព័ន្ធទៅនឹងករណីជួញដូរផ្លូវភេ.ទ និងប្រតិបត្តិការឆបោ.កតាមអ៊ីនធឺណែត។

ហេតុការណ៍នេះគឺបានកើតឡើងតាំងពីខែតុលាមកម្លេះ ដោយក្រុមមន្ត្រីប៉ូលីសបានរកឃើញ នៅម្តុំតំបន់មួយដែលមានមនុស្សរស់នៅប្រមាណ៦០០នាក់ ចម្រុះជាតិសាសន៍មានទាំងចិន កូរ៉េ វៀតណាម និងហ្វីលីពីន។ អាជ្ញាធរបានបន្តត្រួតពិនិត្យរហូតបានឃើញនូវវត្ថុតាងមួយចំនួនដូចជា Sex toy , ហាងម៉ាស្សា, បន្ទប់ខារ៉ាអូខេ , និងភោជនីដ្ឋាននៅក្នុងអគារមួយកន្លែង ដែលត្រូវបានគេរាយការណ៍ថាជាក្រុមហ៊ុនល្បែងតាមអនឡាញ។

នៅក្នុងប្រតិបត្តិការនេះ ក្រុមមន្ត្រីប៉ូលីសគឺបានជួយសង្គ្រោះស្រ្តីជនរងគ្រោះដោយការជួញដូរផ្លូវភេ.ទជាច្រើននាក់ ដោយជោគជ័យ។ នៅក្នុងប្រតិបត្តិការលើកនោះផងដែរ គឺជាសេចក្តីប្តេជ្ញាចិត្តនិងឆន្ទៈដ៏មុតមាំរបស់រដ្ឋាភិបាលភីលីពីននៅក្នុងការពង្រឹងនូវសុខមាលភាពសង្គម និងការពារសិទ្ធមនុស្សដែលប្រជារដ្ឋគ្រប់រូបគួរតែទទួលបាន។

គួរបញ្ជាក់ផងដែរថា តំបន់អាស៊ីប៉ាស៊ីហ្វីកយើងនាពេលបច្ចុប្បន្ននេះគឺកំពុងប្រឈមទៅនឹងការកើនឡើងនៃករណីឆ.បោ.កតាមប្រព័ន្ធអនឡាញ ដែលជារឿយៗជនរងគ្រោះត្រូវបានបោកបញ្ឆោតឲ្យមកក្រៅប្រទេសដើម្បីធ្វើការជួញដូរ ឬបញ្ឆោតនិងបង្ខំឲ្យធ្វើការវិនិយោគផ្សេងៗផងដែរ៕

បរទេស៖ ជនជាតិវៀតណាមមួយក្រុមមានគ្នា ៣ នាក់ត្រូវបានចោទប្រកាន់ពីបទបង្កើត និងលក់គណនី Microsoft ជាង ៧៥០ លាន រួមទាំងក្លែងបន្លំដោយខុសច្បាប់រកប្រាក់ចំណូលបានរាប់លានដុល្លារ។
យោងតាមគេហទំព័រអន្តរជាតិ Forbes ដែលបានចុះផ្សាយនៅថ្ងៃទី១៤ ខែធ្នូថា ក្រុមហ៊ុន Microsoft បានផ្ញើពាក្យបណ្តឹងទៅកាន់ភ្នាក់ងារអនុវត្តច្បាប់នៅក្នុងសហរដ្ឋអាមេរិកសម្រាប់បុគ្គល ៣ នាក់ដែលជាជនជាតិវៀតណាម ដោយគេជឿថាមនុស្សទាំងនេះរស់នៅក្នុងប្រទេសវៀតណាម និងនៅពីក្រោយអង្គការមួយដែលមានឈ្មោះថា Storm-1152។

Storm-1152 គឺជាអង្គការដែលមានជំនាញក្នុងការ Hacker ផ្តល់ធនធានសម្រាប់ការក្លែងបន្លំតាមអ៊ីនធឺណិត រួមទាំងទទួលបានគណនីរាប់ពាន់យ៉ាងឆាប់រហ័ស ជំនួសឱ្យការបង្កើតពួកវាដោយខ្លួនឯង។ នេះអនុញ្ញាតឱ្យឧក្រិដ្ឋជនផ្តោតលើគោលដៅចម្បងរបស់ពួកគេនៃការបន្លំ ការផ្ញើសារឥតបានការ និងទម្រង់ផ្សេងទៀតនៃការក្លែងបន្លំ ក៏ដូចជាការរំលោភបំពានជាដើម។ ក្រុមនេះដំណើរការគេហទំព័រដែលមានឯកទេសក្នុងការលក់គណនី លក់ឧបករណ៍ជាច្រើនដើម្បីជួយឧក្រិដ្ឋជនតាមអ៊ីនធឺណិតធ្វើការវាយប្រហារដោយស្វ័យប្រវត្តិ ខណៈពេលដែលវាធ្វើឱ្យមានការប្រកួតប្រជែងសម្រាប់វេទិកានានាក្នុងការស្វែងរក និងការពារគណនីមិនល្អ។

ហេតុនេះហើយ យោងតាមសេចក្តីប្រកាសរបស់ Microsoft បានសរសេរថា “រហូតមកដល់បច្ចុប្បន្ន Storm-1152 បានបង្កើត និងលក់គណនី Microsoft ប្រមាណ ៧៥០ លានគណនីសម្រាប់ការក្លែងបន្លំ ដែលនាំឱ្យក្រុមនេះទទួលបានប្រាក់ចំណូលខុសច្បាប់រាប់លានដុល្លារ”។ លើសពីនេះ សកម្មភាពរបស់ក្រុមនេះក៏បង្កការលំបាក និងចំណាយប្រាក់ច្រើនដល់ក្រុមហ៊ុន និងក្រុមហ៊ុនដទៃទៀត ក្នុងការប្រយុទ្ធប្រឆាំងនឹងឧក្រិដ្ឋកម្មតាមអ៊ីនធឺណិត។

បន្ទាប់ពីការរកឃើញ អ្នកជំនាញផ្នែកសន្តិសុខតាមអ៊ីនធឺណិតរបស់ Microsoft និងភាគីទីបីគឺ Arkose Labs បានធ្វើការវិភាគ សាកល្បងទិញសេវាកម្ម ក៏ដូចជាបច្ចេកទេសពិសេសមួយចំនួនដើម្បីស្វែងរកក្រុមនៅពីក្រោយវា និងហេដ្ឋារចនាសម្ព័ន្ធរបស់ក្រុម។ បន្ថែមពីលើបុគ្គលទាំង ៣នាក់នោះ គេហទំព័ររបស់ក្រុមនេះបច្ចុប្បន្នក៏ត្រូវបានរឹបអូសដោយក្រុមហ៊ុន Microsoft នេះបើយោងតាមបញ្ជាពីតុលាការសហរដ្ឋអាមេរិក។ រីឯប៉ុស្តិ៍ YouTube ដែលមានឯកទេសក្នុងការណែនាំសម្រាប់ការប្រើប្រាស់សេវាកម្មនៅលើ YouTube ក៏ត្រូវបានប្តូរឈ្មោះផងដែរ៕

ប្រទេសថៃ ៖ លោក សេដ្ឋា ថាវីស៊ីន នាយករដ្ឋមន្ត្រី និងរដ្ឋមន្ត្រីក្រសួងហិរញ្ញវត្ថុប្រទេសថៃ បានជួបជាមួយវិនិយោគិនជប៉ុនប្រមាណជាង៥០០ក្រុមហ៊ុន ក្នុងគោលបំណងឱ្យក្រុមហ៊ុនទាំងនេះសហការជាមួយប្រទេសថៃ ដើម្បីលើកកម្ពស់ផ្នែកឧស្សាហកម្ម ។ លើសពីនេះ ប្រទេសថៃនឹងអាចឈានទៅរកសេដ្ឋកិច្ចថ្មី ព្រមទាំងឆ្លើយតបទៅនឹងការផ្លាស់ប្តូរនៅលើពិភពលោកផងដែរ ។

កាលពីថ្ងៃទី១៥ ខែធ្នូ ឆ្នាំ២០២៣ លោក សេដ្ឋា ថាវីស៊ីន នាយករដ្ឋមន្ត្រីថៃបានប្រជុំពិភាក្សាជាមួយផ្នែករដ្ឋ និងក្រុមហ៊ុនធំៗរបស់ជប៉ុន ជាពិសេស ជាមួយលោក សាយតូខេម រដ្ឋមន្ត្រីក្រសួងសេដ្ឋកិច្ច ពាណិជ្ជកម្ម និងឧស្សាហកម្មជប៉ុន ។ ប្រធានបទសំខាន់ដែលភាគីទាំងពីរលើកយកមកពិភាក្សា គឺការលើកកម្ពស់ឧស្សាហកម្មថាមពលឱ្យស្របតាមគោលដៅកាត់បន្ថយការបំភាយកាបូនឌីអុកស៊ីត ជាពិសេស ក្នុងប្រព័ន្ធដឹកជញ្ជូន ។

លោក សាយតូខេម រដ្ឋមន្ត្រីក្រសួងសេដ្ឋកិច្ច ពាណិជ្ជកម្ម និងឧស្សាហកម្មជប៉ុនលើកឡើងថា វិនិយោគិនជប៉ុនមកពីជាង៥០០ក្រុមហ៊ុន ដែលមកចូលរួមក្នុងសិក្ខាសាលា ស្តីពី «Thailand Japan Investment Forum 2023» រៀបចំឡើងដោយការិយាល័យលើកកម្ពស់ការវិនិយោគ ពួកគេនិយាយថា មានទំនុកចិត្តលើប្រទេសថៃក្នុងផ្នែកពាណិជ្ជកម្ម និងវិនិយោគ ។ ក្រៅពីនេះ ពួកគេចាប់អារម្មណ៍លើផ្នែកថាមពល, ការកាត់បន្ថយការបំភាយកាបូនឌីអុកស៊ីត និងការអភិវឌ្ឍយានយន្តប្រើប្រាស់ថាមពលចម្រុះ ដោយជប៉ុន និងថៃ នឹងសហការគ្នាលើផ្នែកទាំងនេះ ។ប្រទេសថៃ និងជប៉ុនមានសម្ព័ន្ធភាពល្អជាមួយគ្នាអស់ចំនួន១៣៦ឆ្នាំមកហើយ ហើយប្រទេសជប៉ុនគឺជាមិត្តដ៏ល្អរបស់ថៃ និងសហការជាមួយថៃស្ទើរគ្រប់ផ្នែក ។ នាយករដ្ឋមន្ត្រីថៃបញ្ជាក់ថា ជប៉ុនជាដៃគូពាណិជ្ជកម្មដ៏សំខាន់ ហើយថៃជឿថា ជប៉ុននឹងធ្វើដៃគូពាណិជ្ជកម្មជាមួយថៃបន្ថែមថា ដូចជា ផលិតផលកសិកម្ម, គ្រឿងបន្លាស់រថយន្ត និងផលិតផលអេឡិចត្រូនិក ។

លោក សេដ្ឋា ថាវីស៊ីន នាយករដ្ឋមន្ត្រីថៃថ្លែងថា ៖ «រដ្ឋាភិបាលថៃបើកទូលាយសម្រាប់ការវិនិយោគមកពីគ្រប់ប្រទេស ជាពិសស វិនិយោគិនជប៉ុនចាស់ និងថ្មី ។ ប្រទេសថៃនឹងសហការជាមួយរដ្ឋាភិបាល និងក្រុមហ៊ុនឯកជនជប៉ុន ដើម្បីលើកកម្ពស់ឧស្សាហកម្មឈានទៅរកសេដ្ឋកិច្ចថ្មី និងឆ្លើយតបជាមួយការផ្លាស់ប្តូរលើពិភពលោក» ។

ចំណែកការពិភាក្សាជាមួយនាយកគ្រប់គ្រងក្រុមហ៊ុនជប៉ុនធំៗចំនួន៧ គឺដើម្បីផ្លាស់ប្តូរយោបល់, ជំរុញពាណិជ្ជកម្ម និងការវិនិយោគរួមគ្នា ជាពិសេស ក្រុមហ៊ុនយានយន្តជប៉ុនលំដាប់ពិភពលោក ។ រដ្ឋាភិបាលថៃបានស្នើឱ្យជប៉ុនយកប្រទេសថៃធ្វើជាទីតាំងផលិត និងនាំចេញទំនិញទៅលក់នៅតំបន់ផ្សេងៗលើពិភពលោក ដោយសារប្រទេសថៃមានធនធានមនុស្សមានជំនាញច្រើនផ្នែក ៕ ប្រភព ៖ Tna.mcot

ប្រទេសអ៊ីរ៉ង់បានប្រកាសធ្វើដំណើរដោយគ្មានទិដ្ឋាការសម្រាប់ប្រទេសកម្ពុជា និង ៣៣ ប្រទេសទៀត ដែលក្នុងនោះប្រទេសនូវអាស៊ីអាគ្នេយ៍មានចំនួន ៥ ប៉ុណ្ណោះគឺ កម្ពុជា វៀតណាម ឥណ្ឌូនេស៊ី សិង្ហបុរី និងម៉ាឡេស៊ី។

យោងតាមគេហទំព័រអន្តរជាតិ Adventure Iran ដែលបានចុះផ្សាយនៅថ្ងៃទី១៥ ខែធ្នូថា គោលនយោបាយទិដ្ឋាការថ្មីរបស់អ៊ីរ៉ង់មានគោលបំណងទាក់ទាញភ្ញៀវទេសចរអន្តរជាតិកាន់តែច្រើន បង្ហាញពីការប្តេជ្ញាចិត្តរបស់ទីក្រុងតេអេរ៉ង់ក្នុងដំណើរការធ្វើឱ្យទំនាក់ទំនងទ្វេភាគីមានលក្ខណៈធម្មតា និងពង្រឹងកិច្ចសហប្រតិបត្តិការជាមួយប្រទេសជុំវិញពិភពលោក។

ដូច្នេះប្រទេសចំនួន ៣៣ ដែលអ៊ីរ៉ង់បានលើកលែងទិដ្ឋាការរួមមាន៖ កម្ពុជា វៀតណាម ឥណ្ឌូនេស៊ី ម៉ាឡេស៊ី ឥណ្ឌា ជប៉ុន សិង្ហបុរី សហព័ន្ធអារ៉ាប់រួម អារ៉ាប៊ីសាអូឌីត និងប្រេស៊ីល…ជាដើម។ ទោះជាយ៉ាងណាក៏ដោយ កន្លងមកអ៊ីរ៉ង់បានអនុវត្តគោលនយោបាយចូលដោយគ្មានទិដ្ឋាការសម្រាប់តែភ្ញៀវទេសចរមកពីប្រទេសទួរគី អាហ្សែបៃហ្សង់ អូម៉ង់ ចិន អាមេនី លីបង់ និងស៊ីរីប៉ុណ្ណោះ។

គួរបញ្ជាក់ដែរថា នៅក្នុងឆ្នាំ ២០២៣ នេះប្រទេសអ៊ីរ៉ង់បានស្វាគមន៍ភ្ញៀវបរទេសចំនួន ៤.៤ លាននាក់ក្នុងរយៈពេលប្រាំបីខែដំបូងនៃឆ្នាំសារពើពន្ធរបស់ប្រទេសនេះចាប់ពីថ្ងៃទី ២១ ខែមីនា កើនឡើង ៤៨.៥% ធៀបនឹងរយៈពេលដូចគ្នាកាលពីឆ្នាំមុន៕

ប្រទេសចិន ៖ ការផលិតកប៉ាល់ធំៗមិនប៉ះពាល់បរិស្ថាន គឺស្របតាមគោលដៅរបស់អង្គការដែនសមុទ្រអន្តរជាតិ (International Maritime Organization) ដែលអង្គការនេះបានដាក់គោលដៅឱ្យឧស្សាហកម្មផលិតកប៉ាល់ទាំងអស់ត្រូវកាត់បន្ថយការបំភាយកាបូនទាំងស្រុងនៅឆ្នាំ២០៥០ ។

ចិនត្រូវបានគេចាត់ទុកថា គឺជាប្រទេសផលិតកប៉ាល់ដ៏ធំមួយលើពិភពលោក ហើយនៅប្រទេសចិនមានក្រុមហ៊ុន China State Shipbuilding Corporation ដែលស្ថិតក្នុងចំណោមក្រុមហ៊ុនផលិតកប៉ាល់ធំលំដាប់ពិភពលោក ។ ក្រុមហ៊ុននេះបានផលិតកប៉ាល់កម្សាន្តមួយឈ្មោះ «Adora Magic City» ដែលប្រើប្រាស់ប្រព័ន្ធ AC ដំបូងគេ ។

ប្រព័ន្ធនេះបានបំលែងកាបូនឌីអុកស៊ីតទៅជាប្រព័ន្ធត្រជាក់ ។ ដូច្នេះ វាមិនប៉ះពាល់បរិស្ថានដូចការប្រើប្រាស់សារធាតុ Freon ដែលគេនិយមភាគច្រើនទេ ។ ក្រៅពីនេះ ក៏មានការបំពាក់បច្ចេកវិទ្យាថ្មីៗនៅលើកប៉ាល់ផងដែរ ហើយវាទទួលបានការចាប់អារម្មណ៍យ៉ាងខ្លាំងក្នុងកម្មវិធីតាំងពិព័រណ៍កប៉ាល់ធំៗលើពិភពលោក នៅទីក្រុងសៀងហៃ ។

គេបានព្យាយាមអភិវឌ្ឍន៍ប្រព័ន្ធចាប់យកកាបូនសម្រាប់កប៉ាល់ប្រើប្រាស់ម៉ាស៊ីនម៉ាស៊ូត ដើម្បីដោះស្រាយបញ្ហាការបំភាយកាបូនរបស់កប៉ាល់ ។ វានឹងមានប្រព័ន្ធស្រូប និងបំបែកកាបូនឌីអុកស៊ីតពីការបំភាយឧស្ម័នរបស់កប៉ាល់ ហើយបំលែងទៅជាវត្ថុរាវមុនពេលបញ្ជូនឡើងលើគោក ដើម្បីបំបែកឧស្ម័ន ឬយកវាមកប្រើប្រាស់ឡើងវិញ ។ នេះជាវិធីថ្មីក្នុងការកម្ចាត់កាបូន ដែលទទួលបានការចាប់អារម្មណ៍ពីក្រុមហ៊ុនជាច្រើនលើពិភពលោក ។

យោងតាមសមាគមផលិតកប៉ាល់របស់ចិនឱ្យដឹងថា ចាប់ពីខែមករា រហូតដល់ខែវិច្ឆិកា ឆ្នាំ២០២២ ការកុម្ម៉ង់កប៉ាល់ថ្មីជាង៤៥% គឺគេបានកុម្ម៉ង់ឱ្យផលិតកប៉ាល់មិនប៉ះពាល់បរិស្ថាន ហើយតម្រូវការនេះបានកើនឡើងជាបន្តបន្ទាប់ ៕ ប្រភព ៖ nation