ប្រទេសថៃ ៖ នៅថ្ងៃទី៧ ខែធ្នូ ឆ្នាំ២០២៣ សារព័ត៌មានថៃឈ្មោះ MGR online បានចុះផ្សាយថា អ្នកជំនាញផ្នែកកសិកម្មថៃបានលើកឡើងអំពីលទ្ធផលការប្រកួតអង្ករល្អបំផុតនៅលើពិភពលោក ហើយអង្ករវៀតណាមជាប់ចំណាត់ថ្នាក់ជាអង្ករល្អបំផុត ដោយសារប្រទេសថៃមិនបានយកអង្ករក្រអូបថៃទៅប្រកួត ។ ប្រទេសថៃបានដកខ្លួនចេញពីសមាជិក The World’s Best Rice 2023 ដោយសារអ្នកពាក់ព័ន្ធមើលឃើញថា វាជាការធ្វើពាណិជ្ជកម្ម ឬនយោបាយច្រើនពេក ។

ស្ថាប័នមួយឈ្មោះថា The Rice Trader (TRT) បានប្រកាសលទ្ធផលប្រកួតអង្ករល្អបំផុតនៅលើពិភពលោក «The World’s Best Rice 2023» ក្នុងសនិ្នសីទអង្ករពិភពលោក (2023 International IWRC) នៅទីក្រុងសេប៊ូ ប្រទេសហ្វីលីពីន ។ លទ្ធផលបង្ហាញថា អង្ករពូជ ST25 របស់ប្រទេសវៀតណាម បានទទួលរង្វាន់ជាអង្ករល្អបំផុតលើពិភពលោក ប្រចាំឆ្នាំ២០២៣ ។

អង្កររបស់វៀតណាមបានឈ្នះអង្ករប្រមាណ៣០ប្រភេទទៀតដែលប្រទេសជាច្រើនយកមកប្រកួត ហើយក្នុងនោះមានអង្ករតែ៣ពូជប៉ុណ្ណោះ ដែលទទួលបានចំណាត់ថ្នាក់កំពូលចំនួន៣ គឺអង្កររបស់កម្ពុជា, អង្ករឥណ្ឌា និងអង្ករវៀតណាម ។ ហេតុនេះ ធ្វើឱ្យសារព័ត៌មានមួយចំនួនរិះគន់ថា អង្កររបស់ប្រទេសថៃមិនជាប់ចំណាត់ថ្នាក់ ។

លោក Sakda Sriniwet អ្នកជំនាញផ្នែកកសិកម្មថៃបានបង្ហោះសារក្នុងហ្វេសប៊ុករបស់លោកថា ៖ «សារព័ត៌មានមួយបានចុះផ្សាយពីលទ្ធផលការប្រកួតអង្ករល្អបំផុតលើពិភពលោក (The World’s Best Rice 2023) គឺនៅឆ្នាំ២០២៣ នេះ ប្រទេសថៃមិនបានយកអង្ករក្រអូបថៃទៅប្រកួតទេ ។ យើងបានដកខ្លួនចេញពីសមាជិក The World’s Best Rice 2023 ដោយសារអ្នកពាក់ព័ន្ធមើលឃើញថា វាជាការធ្វើពាណិជ្ជកម្ម ឬនយោបាយច្រើនពេក ។ មិនមែនប្រទេសថៃចុះចាញ់ ឬថ្នាក់ចំណាត់ថ្នាក់នោះទេ ។ រឿងនេះ មិត្តភក្តិរបស់ខ្ញុំ ដែលជាម្ចាស់អង្ករពូជ ST25 បានប្រាប់ខ្ញុំថា ប្រទេសថៃមិនបានយកអង្ករទៅប្រកួត» ៕ ប្រភព ៖ MGR online

្រទេសជប៉ុន ៖ នៅដើមខែធ្នូ ឆ្នាំ២០២៣ សារព័ត៌មានបរទេសបានចុះផ្សាយថា នៅប្រទេសជប៉ុន បើទោះជាអតិថិជនមានប្រាក់គ្រប់គ្រាន់ ឬមានទ្រព្យសម្បត្តិច្រើនកម្រិតណាក៏ដោយ ក៏ពួកគេមិនអាចទិញរថយន្តជិះបានដែរ ប្រសិនបើពួកគេគ្មានលិខិតធានាថា មានចំណតរថយន្តផ្ទាល់ខ្លួន ។ ហេតុនេះ អតិថិជនម្នាក់ៗត្រូវគូសផែនទីទីតាំងចំណតរថយន្តឱ្យបានលម្អិត និងច្បាស់លាស់នៅក្នុងលិខិតសុំទិញរថយន្ត ។

នៅពេលអតិថិជនយកលិខិតសុំទិញរថយន្តទៅប្រគល់ឱ្យសមត្ថកិច្ចរួចហើយ នឹងមានភ្នាក់ងារចុះមកត្រួតពិនិត្យចំណតរថយន្តជាក់ស្តែង មុននឹងពួកគេប្រគល់លិខិតអនុញ្ញាតឱ្យអតិថិជនទិញរថយន្ត ។ មូលហេតុដែលប្រទេសជប៉ុនត្រូវអនុវត្តបែបនេះ ដើម្បីឱ្យផ្លូវនានាក្លាយជាទីកន្លែងសាធារណៈសម្រាប់មនុស្សគ្រប់គ្នាមានសិទ្ធិប្រើប្រាស់ស្មើៗគ្នា ។

រីឯចំណតរថយន្តនៅប្រទេសជប៉ុន អតិថិជនត្រូវបង់ប្រាក់ប្រចាំខែសម្រាប់ថ្លៃចំណត ហើយតម្លៃនឹងខុសៗគ្នាទៅតាមទីកន្លែងនីមួយៗ ឬតាមទីក្រុងផ្សេងៗ ។ បើទោះជាកន្លែងខ្លះបានអនុញ្ញាតឱ្យចតរថយន្តបាន ប៉ុន្តែគេមានច្បាប់កំណត់ថា ហាមចតរថយន្តទុកចោលលើសពី១២ម៉ោងនៅពេលថ្ងៃ និងហាមចតរថយន្តលើសពី៨ម៉ោងនៅពេលយប់ ។

លើសពីនេះ ប្រទេសជប៉ុនក៏បានហាមឃាត់ការចតរថយន្តនៅទីកន្លែងសាធារណៈដដែលៗរៀងរាល់ថ្ងៃផងដែរ ពីព្រោះវាដូចគ្នានឹងការប្រើប្រាស់ទីកន្លែងសាធារណៈទាំងនេះជំនួសចំណតរថយន្ត ៕ ប្រភព ៖ Beartai BRIEF

បរទេស៖ ក្រុមហ៊ុន Prophetic របស់សហរដ្ឋអាមេរិកគ្រោងនឹងបង្កើតឧបករណ៍ថ្មីមួយដែលមានឈ្មោះថា “Halo” ដោយវាមានសមត្ថភាពគ្រប់គ្រងសុបិន្តពេលកំពុងគេង។

យោងតាមប្រភពព័ត៌មាន Business Insider ដែលបានរាយការណ៍កាលពីថ្ងៃទី២ ខែធ្នូថា ឧបករណ៍ពាក់ក្បាលដែលមានឈ្មោះថា “Halo” នឹងនាំមកនូវស្ថានភាពសុបិន្តដ៏ភ្លឺស្វាង ក៏ដូចជាមានសមត្ថភាពគ្រប់គ្រងសុបិន្តពេលកំពុងគេង ដែលវាប្រយោជន៍សម្រាប់ការងារនាពេលអនាគត។ ក្រុមហ៊ុន Prophetic បានឱ្យដឹងទៀតថា ផលិតផលនេះគ្រោងនឹងបង្កើតនៅក្នុងឆ្នាំ ២០២៤ ខាងមុខនេះ ហើយនឹងដាក់លក់ក្នុងតម្លៃ ១,៥០០ ទៅ ២,០០០ ដុល្លារអាមេរិក ជាមួយនឹងផែនការក្នុងការចែកចាយទិន្នន័យពីវិទ្យាស្ថាននៅនិទាឃរដូវឆ្នាំ ២០២៤ និងឧបករណ៍ដឹកជញ្ជូននៅនិទាឃរដូវឆ្នាំ ២០២៥។

Halo គឺជាឧបករណ៍ជំរុញតំបន់ពិសេសនៃខួរក្បាលដែលទាក់ទងនឹងការយល់សប្តិដែល ធ្វើឱ្យសកម្មផ្នែកនៃខួរក្បាល ក៏ដូចជាទទួលខុសត្រូវចំពោះការសម្រេចចិត្ត និងស្មារតី ដោយហេតុនេះបង្កើតភាពច្បាស់លាស់ក្នុងសុបិន្ត។ បច្ចុប្បន្នឧបករណ៍នេះត្រូវបានផ្អែកលើការស្រាវជ្រាវដែលកំពុងបន្តដោយវិទ្យាស្ថាន Donders ក្នុងប្រទេសហូឡង់ ដែលកំណត់គោលដៅលើតំបន់ខួរក្បាលជាក់លាក់ និងប្រេកង់អ៊ុលត្រាសោនសម្រាប់ការបង្កើតសុបិន្តដ៏ល្អឥតខ្ចោះ។

ក្រុមហ៊ុនបាននិយាយថា ការបង្កើតឧបករណ៍នេះក្នុងគោលបំណងបង្កើនសមត្ថភាពរបស់មនុស្សក្នុងការគ្រប់គ្រងសុបិន្ត ដើម្បីត្រៀមខ្លួនអភិវឌ្ឍការងារថ្មីៗនាពេលអនាគត ក៏ដូចជាអាចគ្រប់គ្រងគោលដៅបានកាន់តែល្អប្រសើរជាងមុន។ ក្រុមហ៊ុនក៏បានមើលឃើញការចាប់អារម្មណ៍យ៉ាងខ្លាំង ដោយបង្កើត “ប្រាក់ចំណូលរាប់សែនដុល្លារក្នុងការកក់” រយៈពេលពីរបីសប្តាហ៍ដំបូងកន្លងមកនៃការបើកការកក់ ដោយបង្ហាញអំពីមូលដ្ឋានអ្នកប្រើប្រាស់ដ៏មានសក្តានុពលដែលរំពឹងថានឹងចេញផ្សាយផលិតផលនេះក្នុងឆ្នាំ ២០២៤ ឬ ២០២៥៕

ប្រទេសជប៉ុន ៖ នៅថ្ងៃទី៧ ខែធ្នូ ឆ្នាំ២០២៣ សារព័ត៌មាន Straits Times រាយការណ៍ថា ប៉ូលិសជប៉ុនបានចាប់ខ្លួនបុរសបើកបររថយន្តតាក់ស៊ីម្នាក់នៅទីក្រុងតូក្យូ ដោយបុរសរូបនេះបើកបររថយន្តឆ្លងកាត់ហ្វូងព្រាបដោយចេតនា និងបណ្តាលឱ្យព្រាបងា.ប់១ក្បាល ។ បុរសអ្នកបើកបរតាក់ស៊ីប្រាប់ថា ដោយសារតែខ្លួនគេខឹងសម្បារសត្វព្រាបមកឈរលើផ្លូវ ហើយវាជាផ្លូវរបស់មនុស្សធ្វើដំណើរ ។

អ្នកនាំពាក្យស្ថានីយប៉ូលិសប្រចាំទីក្រុងតូក្យូលើកឡើងថា លោក Atsushi Ozawa អាយុ៥០ឆ្នាំ បានបើករថយន្តកិនព្រាប ខណៈប្រទេសជប៉ុនបានហាមឃាត់ពលរដ្ឋទាំងអស់មិនឱ្យសម្លា.ប់ព្រាបទេ ។ ហេតុនេះ ប៉ូលិសក៏បានចាប់ខ្លួនបុរសបើកបរតាក់ស៊ីរូបនេះ កាលពីថ្ងៃទី៣ ខែធ្នូ ឆ្នាំ២០២៣ ពីបទរំលោភច្បាប់គ្រប់គ្រងសត្វព្រៃ ។

បើតាមសារព័ត៌មានជប៉ុនបញ្ជាក់ថា លោក Atsushi Ozawa បានបើកបររថយន្តក្នុងល្បឿន៦០គីឡូម៉ែត្រក្នុង១ម៉ោង ។ នៅពេលភ្លើងសញ្ញាចរាចរណ៍ចេញពណ៌បៃតង ស្រាប់តែគាត់បើកបរឆ្លងកាត់ហ្វូងបក្សីយ៉ាងលឿន ហើយធ្វើឱ្យអ្នកដំណើរទូទៅភ្ញាក់ផ្អើលយ៉ាងខ្លាំងនាំគ្នាងាកមើល ដោយសារតែពួកគេឮសូរសំឡេងម៉ាស៊ីនរថយន្តខ្លាំងពេក ។

ប៉ូលិសក្រុងតូក្យូនិយាយថា ពេទ្យសត្វបានបញ្ជាក់ពីមូលហេតុបណ្តាលឱ្យព្រាបងា.ប់ថា ដោយសារវារងរបួសខ្លាំងពេក ហើយពេទ្យសត្វមិនអាចជួយសង្គ្រោះជីវិតបាន ។ រីឯលោក Atsushi Ozawa បាននិយាយទៅកាន់ប៉ូលិសផ្នែកស៊ើបអង្កេតថា ផ្លូវនេះជារបស់មនុស្ស ហើយសត្វព្រាបមិនគួរឈរនៅលើផ្លូវទេ ។

ទូរទស្សន៍ Fuji ផ្សាយថា បើតាមការពិចារណារបស់ប៉ូលិស គឺអាកប្បកិរិយារបស់អ្នកបើករថយន្តតាក់ស៊ីនេះបានបង្កគ្រោះថ្នាក់យ៉ាងខ្លាំង ទើបប៉ូលិសសម្រេចចាប់ខ្លួនគាត់ ។ រីឯអ្នកលេងបណ្តាញសង្គមបានបញ្ចេញយោបល់ក្នុងបណ្តាញសង្គម X (ឬឈ្មោះ Twitter) ថា អ្នកបើកបរយានជំនិះទាំងអស់គួរតែចុចស៊ីប្លេ ឬធ្វើអ្វីម្យ៉ាង ជំនួសឱ្យការតាំងចិត្តសម្លាប់បក្សីបែបនេះ ព្រោះវាជាទង្វើមួយជ្រុលហួសហេតុពេក ៕ ប្រភព ៖ khaosod

Master Card និង NEC គឺជាក្រុមហ៊ុនបច្ចេកវិទ្យារបស់ប្រទេសជប៉ុន មានគម្រោងដំណើរការប្រព័ន្ធទូទាត់ប្រាក់នៅតាមហាងលក់ទំនិញផ្សេងៗលើពិភពលោក តាមរយៈការស្កេនផ្ទៃមុខអតិថិជន ។ ប្រព័ន្ធទូទាត់ប្រាក់នេះ នឹងចាប់ផ្តើមសាកល្បងប្រើប្រាស់នៅឆ្នាំ២០២៤ ក្នុងប្រទេសមួយចំនួននៅតំបន់អាស៊ី ដូចជា ៖ សិង្ហបុរី និងឥណ្ឌូណេស៊ី បន្ទាប់មក នឹងពង្រីកមកដល់ប្រទេសថៃ, អូស្ត្រាលី និងជប៉ុន ។

ក្រុមហ៊ុនទាំងពីរនេះយល់ឃើញថា អាស៊ី គឺជាតំបន់គោលដៅដំបូងគេសម្រាប់អនុវត្តប្រព័ន្ធទូទាត់ប្រាក់ថ្មី និងនាំមុខទីផ្សារនៅអាមេរិក និងតំបន់អឺរ៉ុប ។ នាយកគ្រប់គ្រងក្រុមហ៊ុនបានលើកឡើងពីភាពទាក់ទាញក្នុងតំបន់នេះ ទើបក្រុមហ៊ុនគ្រោងយកបច្ចេកវិទ្យាថ្មីមកប្រើប្រាស់ ។ ការប្រកបអាជីវកម្មរបស់ក្រុមហ៊ុន Master Card ជាង៨០% គឺជាការប្រើប្រាស់កាតឥណទាន និងទូរស័ព្ទស្មានហ្វូន ។

Karthik Ramanathan ជាអនុប្រធានជាន់ខ្ពស់ផ្នែកអនឡាញ និងគ្រប់គ្រងព័ត៌មានក្នុងទីផ្សារអាស៊ី-ប៉ាស៊ីហ្វិករបស់ក្រុមហ៊ុន Master Card លើកឡើងថា ក្រុមហ៊ុនទូទាត់ប្រាក់នៅអាមេរិកបានចាប់ដៃគូជាមួយក្រុមហ៊ុនលក់រាយ និងកំពុងស្វែងរកគម្រោងសាកល្បងនៅឆ្នាំ២០២៤ ។ អនុប្រធានជាន់ខ្ពស់ក្រុមហ៊ុនរូបនេះលើកឡើងថា ៖ «យើងជឿជាក់ថា តំបន់អាស៊ីនឹងទទួលបានបទពិសោធន៍ល្អក្នុងការទូទាត់ប្រាក់តាមបច្ចេកវិទ្យាថ្មី» ។

ចំណែកវិធីប្រើប្រាស់វិញ អតិថិជនត្រូវចុះឈ្មោះក្នុង Profile និងថតផ្ទៃមុខរបស់ពួកគេតាមរយៈទូរស័ព្ទស្មាតហ្វូន ដើម្បីបង្ហាញទិន្នន័យផ្ទាល់ខ្លួនជាមុនសិន ។ បន្ទាប់មក ពួកគេត្រូវទៅស្កេនផ្ទៃមុខក្នុងកាមេរ៉ាថេតប្លេតរបស់ហាងលក់ទំនិញ ដោយពុំចាំបាច់ប្រើប្រាស់កាតឥណទាននាំឱ្យពិបាកទេ ។ លើសពីនេះ ហាងលក់ទំនិញអាចកាត់បន្ថយការចំណាយដើមទុនក្នុងការដំឡើងម៉ាស៊ីនឆូតកាតផងដែរ ។

ប្រព័ន្ធទូទាត់ប្រាក់តាមរយៈការស្កេនផ្ទៃមុខ នឹងប្រើប្រាស់ប្រព័ន្ធ Biometric ដែលអភិវឌ្ឍន៍ដោយក្រុមហ៊ុន NEC ។ ប្រព័ន្ធទូទាត់ថ្មីនេះមានភាពត្រឹមត្រូវបំផុត ព្រមទាំងអាចបញ្ជាក់នូវព័ត៌មានលម្អិតទៀតផង ។

ចំណែកការបារម្ភពីព័ត៌មានផ្ទាល់ខ្លួន និងសុវត្ថិភាពអតិថិជន នៅពេលពួកគេទូទាត់ប្រាក់តាមរយៈការស្កេនផ្ទៃមុខ ក្រុមហ៊ុន Master Card គ្រោងបង្កើតគោលការណ៍មួយចំនួនសម្រាប់ក្រុមហ៊ុនផ្សេងៗរួចហើយ ដូចជា ៖ ការលុបទិន្នន័យផ្ទាល់ខ្លួនភ្លាមៗ ដើម្បីកុំឱ្យមានការ Hack គណនី និងការពារកុំឱ្យប្រព័ន្ធ Biometric យកទិន្នន័យអតិថិជនទៅប្រើប្រាស់ក្នុងផ្លូវមិនល្អ ។ នេះបើតាមការលើកឡើងរបស់អនុប្រធានជាន់ខ្ពស់ផ្នែកអនឡាញរបស់ Master Card ៕ ប្រភព ៖ beartai BRIEF

នៅក្នុងរដ្ឋ Johor របស់ប្រទេសម៉ាឡេស៊ីគឺត្រង់តំបន់ព្រៃក្រាស់ក្រាល ដែលគេហៅថា Forest City បន្ទាប់ទទួលបាននូវការអភិវឌ្ឍពីចិន ក៏មានមតិលើកឡើងពីប្រជាជនមួយចំនួនដែលស្នាក់នៅទីនោះបាននិយាយថា ទីនោះគឺជាកន្លែងដែលស្ទើរតែគា្មនមនុស្សចូលមកស្នាក់នៅឬមកកម្សាន្តទាល់តែសោះ ខណៈបានធ្វើឲ្យតំបន់នោះមានសភាពស្ងាត់ជ្រងំ និងគួរឲ្យខ្លាច។

លោក Nazmi Hanafiah ដែលជាអ្នកស្នាក់នៅទីនោះបានប្រាប់សារព័ត៌មាន BBC អំពីការដែលគាត់បានជួលបន្ទប់ចំនួន១សម្រាប់ស្នាក់នៅទីនោះរយៈពេល៦ខែ ដែលជាប៉ម១នៃគម្រោងមេហ្គា ១០០ ពាន់លានដុល្លារនោះបាននិយាយថា «នៅទីនោះស្ងាត់ខ្លាំងណាស់ ខ្ញុំពិតជាតក់ស្លត់ខ្លាំង និងមានអារម្មណ៍ថាឯកោកណ្តោតកណ្តែង ខណៈនៅទីនោះមានតែម្នាក់ឯងព្រមជាមួយនឹងភាពភ័យខ្លាចតែប៉ុណ្ណោះ។

គម្រោងក្រុមហ៊ុនអភិវឌ្ឍន៍អចលនទ្រព្យដ៏ធំបំផុតមួយរបស់ប្រទេសចិន Country Garden បានបង្ហាញខ្លួនកាលពីឆ្នាំ២០១៦ នៅឯប្រទេសម៉ាឡេស៊ី ត្រង់តំបន់ Forest City ដែលគម្រោងនេះត្រូវបានផ្សព្វផ្សាយថាជា “ឋានសួគ៌ានៃក្តីសុបិន” រូមជាមួយនឹងបរិយាកាសល្អនិងកន្លែងទំនើបៗរួមបញ្ចូលនៅចំណុចតែមួយ មានទាំងសួនទឹក ទីលានវាយកូនហ្គោល កន្លែងញ៉ាំអាហារ ហើយយ៉ាងហោចណាស់ក៏មានមនុស្សរស់នៅ១លាននាក់រស់នៅទីនោះ។

ប៉ុន្តែ៨ឆ្នាំក្រោយមក គម្រោងនោះបានបរាជ័យទាំងស្រុង មនុស្សម្នាក៏បានចាប់ផ្តើមបោះបង់ចោលផ្ទះរបស់ពួកគេនៅទៅនោះ ព្រោះតែភាពការដែលរស់នៅទីនោះគ្មានភាពសុខដុមរមនា និងភាពសោះកក្រោះនៃតំបន់ ហើយក៏បានដាក់ឈ្មោះទីនោះថាជាទីក្រុងខ្មោច។ជាការពិតណាស់ កម្រោងអភិវឌ្ឍនៅទីនោះទើបតែបាន១៥%ទេ ខណៈផ្ទះល្វែងត្រឹមតែ១%ប៉ុណ្ណោះដែលត្រូវបានជួល ហើយនៅទីបំផុតគម្រោងនេះទាំងមូលកំពុងតែប្រឈមនឹងបំណុលជិត ២០០ ពាន់លានដុល្លារ។

លោក Hanafiah ក៏បានបន្តទៀតថា ដំបូងគាត់ពិតជាមានការរំពឹងទុកខ្ពស់ណាស់ក្នុងការរស់នៅទីនេះ ប៉ុន្តែចុងក្រោយវាគ្រាន់តែជាបទពិសោធន៍ដ៏អាក្រក់មួយប៉ុណ្ណោះ។ Forest City បន្ទាប់ពីត្រូវបានបោះបង់ចោលហើយ ឥឡូវនេះសូម្បីតែគិតថានឹងវិលត្រឡប់ទៅលេងទីនោះវិញម្តងទៀតក៏ធ្វើឱ្យគាត់«ស្រៀវស្រើប»ដែរ។

ជាមួយគ្នានេះ លោកពិតជាមានអារម្មណ៍ថាសោកស្តាយចំពោះអ្នកដែលបានវិនិយោគ និងទិញផ្ទះនៅទីនោះជាពន់ពេក។ ខណៈ ម្ចាស់គម្រោងគួរតែដំណើរការគម្រោងនេះឲ្យបានល្អទៅតាមកិច្ចសន្យាជាមួយនឹងអតិថិជន ប៉ុន្តែនោះមិនបានដូចអ្វីដែលបានរំពឹងទុកទេ និងបានត្រឹមតែចាត់ទុកថាជាមេរៀនជីវិតមិនល្អទៅចុះ៕

បរទេស៖ ក្នុងចំណោមស្មាតហ្វូនដែលលក់ដាច់បំផុតទាំង ១០ នៅលើពិភពលោកក្នុង QIII/2023 នេះចាប់ពី iPhone 4 រហូតដល់ iPhone 14 សុទ្ធតែជាម៉ូដែលដែលលក់ដាច់ពីមួយជំនាន់ទៅមួយជំនាន់ ខណៈដែល iPhone 15 មិនមានវត្តមានក្នុងបញ្ជីស្មាតហ្វូនដែលលក់ដាច់ជាងគេនោះទេ។

យោងតាមប្រភពព័ត៌មាន Phone Arena ដែលបានចុះផ្សាយកាលពីថ្ងៃទី៥ ខែធ្នូថា ទូរស័ព្ទ iPhone 14 នៅតែជាទូរស័ព្ទដែលពេញនិយមបំផុតក្នុងទីផ្សារពិភពលោកដោយទទួលបានចំណាត់ថ្នាក់លេខ១ បន្ទាប់មកគឺម៉ូដែល 14 Pro Max, 14 Pro និង iPhone 13 ។ រីឯSamsung វិញបានកាន់កាប់តំណែងចំនួន ៥ ដែលជាម៉ូដែលទាំងអស់របស់ Galaxy ស៊េរីរួមមាន A14, A14 5G, A54, A04e និង A34 ។ ចំណែកឯ Xiaomi របស់ចិនវិញជាប់ចំណាត់ថ្នាក់លេខ ៩ ជាមួយនឹងម៉ូដែល Redmi 12C ។

ក្នុងចំណោមស្មាតហ្វូនដែលលក់ដាច់ជាងគេតាំងពីពាក់កណ្ដាលខែកញ្ញាមក គ្មាន iPhone 15 នោះទេ។ ស៊េរី iPhone 15 ត្រូវបានគេចាត់ទុកថា មានកំហុសជាច្រើន និងប្រតិបត្តិការមិនស្ថិតស្ថេរដូច iPhone 14 ឡើយ។ ទោះជាយ៉ាងណាក៏ដោយ ស្ថានភាពរបស់ក្រុមហ៊ុន Apple គឺប្រសើរជាង Samsung ព្រោះថាឆ្នាំនេះ ម៉ូដែលលំដាប់ខ្ពស់របស់ក្រុមហ៊ុនកូរ៉េមិនបង្ហាញក្នុងបញ្ជីខ្ពស់ដូចកាលពីឆ្នាំមុននោះទេ។

កាលពីឆ្នាំ ២០២២ ទូរស័ព្ទ Samsung បានឈរនៅចំនាត់ថ្នាក់លេខ ១ ខណៈដែល iPhone ឈរត្រឹមលេខ ៨ និងលេខ៩។ ប៉ុន្តែនៅឆ្នាំ ២០២៣ នេះវិញ ម៉ូដែល iPhone 14 បានឈរនៅចំនាត់ថ្នាក់លេខ ១ ដោយម៉ូដែល Samsung វិញឈរត្រឹមលេខ ៥ ចុះក្រោមប៉ុណ្ណោះ។
ទោះជាយ៉ាងណាក៏ដោយក្រុមហ៊ុន Apple នៅតែដើរពីក្រោយ Samsung ក្នុងការលក់ស្មាតហ្វូន។ នៅក្នុងត្រីមាសចុងក្រោយនេះ Samsung មានចំណែកទីផ្សារ ២០% ធ្លាក់ចុះត្រឹមតែ ២% ប៉ុណ្ណោះ ខណៈពេលដែល Apple ឡើងដល់ ១៧% ធ្លាក់ចុះ ១% ធៀបនឹងរយៈពេលដូចគ្នាកាលពីឆ្នាំមុន។

ទន្ទឹមនឹងនេះដែរ ម៉ូដែលថោកបំផុតរបស់ Xiaomi បាននាំក្រុមហ៊ុនចិនត្រឡប់ទៅជាកំពូលស្មាតហ្វូនដែលលក់ដាច់បំផុតទាំង ១០ ក្នុងបញ្ជីទីផ្សាររបស់ពិភពលោកដែលក្រុមហ៊ុនបានបង្ហាញខ្លួនជាបន្តបន្ទាប់។ បច្ចុប្បន្ន Xiaomi គឺជាក្រុមហ៊ុនផលិតស្មាតហ្វូនធំជាងគេទី ៣ របស់ពិភពលោកដែលមានចំណែកទីផ្សារ ១៤% ខណៈដែលចំណាត់ថ្នាក់ទី ៤ ជារបស់ Oppo ដែលមានចំណែកទីផ្សារ ១០% ។ Oppo ក៏ជាក្រុមហ៊ុនផលិតធំតែមួយគត់ដែលមានការកើនឡើង បើទោះបីជាមានតែ ១% បើធៀបនឹងត្រីមាសមុនក៏ដោយ៕