បរទេស៖ ចំនួនអ្នកទេសចរចិនដែលធ្វើដំណើរកំឡុងបុណ្យចូលឆ្នាំនាពេលខាងមុខនេះ ត្រូវបានគេរំពឹងថានឹងបង្កើតកំណត់ត្រាថ្មីមួយជាមួយនឹងការធ្វើដំណើរចំនួន ៩ ពាន់លាននាក់នៅឆ្នាំ ២០២៤ ដែលជិតពីរដងកាលពីឆ្នាំមុន។

ប្រទេសចិនត្រូវបានគេចាត់ទុកថា មានប្រជាជនដែលធ្វើចំណាកស្រុកច្រើនជាងគេបំផុតនៅលើពិភពលោក ដូច្នេះនៅរដូវចូលឆ្នាំថ្មីនេះ ប្រទេសចិនរំពឹងថា ប្រជាជនរបស់ខ្លួននឹងត្រឡប់មកស្រុកកំណើតវិញដើម្បីជួបជុំគ្រួសារ និងមិត្តភក្តិ ដែលនេះនឹងធ្វើឱ្យតម្រូវការសម្រាប់ការជួបជុំគ្រួសារទេសចរណ៍កើនឡើង។ ពិធីបុណ្យចូលឆ្នាំថ្មីខាងមុខនេះ មានរយៈពេលចាប់ពីថ្ងៃទី ១០ ខែកុម្ភៈដល់ថ្ងៃទី ១៧ ខែកុម្ភៈដែលយូរជាងឆ្នាំ ២០២៣។

លោក Li Yang អនុរដ្ឋមន្ត្រីក្រសួងដឹកជញ្ជូនចិន បានប៉ាន់ប្រមាណថា អ្នកទេសចរនឹងមានការធ្វើដំណើរតាមរថយន្តប្រមាណ ៧.២ ពាន់លានដង រួមទាំងការធ្វើដំណើរតាមរថភ្លើងចំនួន ៤៨០ លានដងក្នុងអំឡុងពេលកំពូលនេះ កើនឡើង ៣៨% និង ១៨% រៀងគ្នាបើធៀបនឹងឆ្នាំ ២០១៩។ នៅថ្ងៃទី ២៦ ខែមករា ឆ្នាំ២០២៤ នេះអ្នកដំណើរប្រមាណ ១០.៦ លាននាក់បានធ្វើដំណើរតាមរថភ្លើង។

ការធ្វើដំណើរតាមអាកាសត្រូវបានគេព្យាករណ៍ថានឹងមានការធ្វើដំណើរប្រហែល ៨០ លានដង កើនឡើង ៩.៨% បើធៀបនឹងឆ្នាំ ២០១៩។ អាកាសយានដ្ឋានចំនួនពីរនៅទីក្រុងសៀងហៃបានប៉ាន់ប្រមាណថា ចរាចរណ៍អ្នកដំណើរកើនឡើង ៥៧.៦% បើធៀបនឹងឆ្នាំមុន ហើយជើងហោះហើរនៅទីក្រុងប៉េកាំងនឹងកើនឡើងជាង ៦០%។

រីឯចំនួនអ្នកទេសចរចិនដែលធ្វើដំណើរទៅក្រៅប្រទេសទំនងជាកើនឡើងបើធៀបនឹងឆ្នាំមុន ដោយសារក្រុមហ៊ុនអាកាសចរណ៍ចិនបានកើនឡើងជាង ២,៥០០ នៃជើងហោះហើរអន្តរជាតិក្នុងឱកាសបុណ្យចូលឆ្នាំថ្មី។ ក្រុមហ៊ុន Trip.com Group បាននិយាយថា ការកក់ការធ្វើដំណើរក្រៅប្រទេសរបស់ប្រទេសចិនក្នុងថ្ងៃឈប់សម្រាកនេះគឺខ្ពស់ជាងឆ្នាំ ២០២៣ ចំនួន ១០ ដង ដោយគោលដៅដែលលេចធ្លោជាងគេរួមមានប្រទេសថៃ ជប៉ុន និងកូរ៉េខាងត្បូង។

សម្រាប់ទេសចរណ៍ក្នុងស្រុកវិញ គោលដៅរដូវរងាគឺជាជម្រើសកំពូលសម្រាប់ភ្ញៀវទេសចរនៅក្នុងប្រទេសនេះ។ ទិន្នន័យ Trip.com បានបង្ហាញថាការស្វែងរកផលិតផលធ្វើដំណើរក្នុងរដូវរងាបានកើនឡើង ១០ ដងក្នុងរយៈពេលដូចគ្នាកាលពីឆ្នាំមុន ជាពិសេសទីក្រុង Harbin ក្នុងខេត្ត Heilongjiang៕

ប្រទេសថៃ ៖ កាលពីថ្ងៃទី២៨ ខែមករា ឆ្នាំ២០២៤ ប្រទេសថៃ និងចិន បានចុះហត្ថលេខាលើវិធានការលើកលែងទិដ្ឋាការរវាងគ្នាទៅវិញទៅមក ហើយវិធានការនេះនឹងអនុវត្តចាប់ពីថ្ងៃទី១ ខែមីនា ឆ្នាំ២០២៤ តទៅ ។ រដ្ឋមន្ត្រីការបរទេសថៃ លោក Parnpree Bahiddha-Nukara លើកឡើងថា វាជាការមានទំនុកចិត្តលើគ្នាទៅវិញទៅមកគ្រប់ផ្នែករវាងប្រទេសថៃ និងចិន ខណៈលោក Wang Yi បានថ្លែងអំណរគុណប្រទេសថៃ ដែលជួយគាំទ្រគោលការណ៍ «ប្រទេសចិនតែមួយ» ។

កិច្ចសហការគ្នានេះ លោក Parnpree Bahiddha-Nukara ឧបនាយករដ្ឋមន្ត្រី និងរដ្ឋមន្ត្រីការបរទេសថៃ ព្រមទាំងលោក Wang Yi ជំនួយការគណៈកម្មការកណ្តាលផ្នែកការបរទេសនៃបក្សកុម្មុយនិស្តចិន និងជារដ្ឋមន្ត្រីការបរទេសចិន បានចុះហត្ថលេខាលើឯកសារសំខាន់រវាងប្រទេសថៃ និងចិន ។ វាជាវិធានការលើកលែងទិដ្ឋាការរវាងគ្នាទៅវិញទៅមកសម្រាប់ពលរដ្ឋទាំងពីរប្រទេសដែលកាន់លិខិតឆ្លងដែនធម្មតា និងលិខិតឆ្លងដែនរាជការ ដោយអនុវត្តចាប់ពីថ្ងៃទី១ ខែមីនា ឆ្នាំ២០២៤ តទៅ ។

លោក Parnpree Bahiddha-Nukara ឧបនាយករដ្ឋមន្ត្រី និងរដ្ឋមន្ត្រីការបរទេសថៃថ្លែងថា ការធ្វើដំណើរទៅមករកគ្នារបស់ពលរដ្ឋទាំងពីរប្រទេស, ការដើរកម្សាន្ត ឬការទំនាក់ទំនងផ្នែកអាជីវកម្មផ្សេងៗនឹងធ្វើឡើងប្រកបដោយលក្ខណៈងាយស្រួល ក្រោយប្រទេសទាំងពីរបានចុះហត្ថលេខាលើវិធានការលើកលែងទិដ្ឋាការជាមួយគ្នា ។ ហេតុនេះ វានឹងជំរុញដល់វិស័យទេសចរណ៍របស់ប្រទេសថៃ និងចិន យ៉ាងពិតប្រាកដ ។

លោករដ្ឋមន្ត្រីការបរទេសថៃបញ្ជាក់ថា ជាពិសេស នៅឆ្នាំ២០២៥ វានឹងក្លាយជាឱកាសពិសេសដែលប្រទេសថៃ នឹងចិន នឹងប្រារព្ធខួបលើកទី៥០ឆ្នាំ នៃទំនាក់ទំនងការទូតថៃ-ចិន ខណៈប្រទេសទាំងពីរបានសហការគ្នាយ៉ាងស្អិតរមួតស្រាប់ហើយ គឺប្រទេសថៃ និងចិន នឹងបង្កើនកិច្ចសហការគ្រប់ផ្នែក ។

ចំណែកលោក Wang Yi បានសរសើរប្រទេសថៃ ដែលប្រកាន់យកគោលការណ៍ «ប្រទេសចិនតែមួយ» និងគាំទ្រគំនិតផ្តួចផ្តើមជាសកលរបស់លោកប្រធានាធិបតីចិន ស៊ី ជិនពីង ។ លោកជឿជាក់ថា វិធានការលើកលែងទិដ្ឋាការនេះ នឹងជំរុញដល់ការផ្លាស់ប្តូររវាងពលរដ្ឋទាំងពីរប្រទេស, ចំនួនភ្ញៀវទេសចរចិនមកប្រទេសថៃនឹងកើនឡើង ហើយប្រទេសចិនរីករាយទទួលស្វាគមន៍ពលរដ្ឋថៃទៅកម្សាន្តនៅចិនផងដែរ ។

ក្រៅពីនេះ ភាគីទាំងពីរនឹងចុះហត្ថលេខាលើការនាំចេញផលិតផលធ្វើពីសាច់សត្វ និងដើមស្រល់ពីប្រទេសថៃទៅចិន ។ ហេតុនេះ ប្រទេសចិនរីករាយឱ្យប្រទេសថៃនាំចេញទំនិញកសិកម្មកាន់តែច្រើនថែមទៀត និងគាំទ្រឱ្យក្រុមហ៊ុនចិនមកវិនិយោគនៅប្រទេសថៃ ដោយសហការលើផ្នែករថយន្តអគ្គិសនី, សេដ្ឋកិច្ចឌីជីថលផ្នែកបរិស្ថានពណ៌បៃតង និងសហការអនុវត្តច្បាប់បង្ក្រាបឧក្រិដ្ឋកម្មឆ្លងដែន, ការបោកប្រាស់តាមទូរស័ព្ទ, ការភ្នាល់តាមអនឡាញ និងបង្ក្រាបថ្នាំញៀនក្នុងប្រទេសទាំងពីរ ។

ការចុះហត្ថលេខាលើវិធានការលើកលែងទិដ្ឋាការនេះ ប្រទេសថៃសង្ឃឹមថា នឹងមានភ្ញៀវទេសចរចិនយ៉ាងហោចណាស់ ចំនួន៨លាននាក់ធ្វើដំណើរមកកម្សាន្តនៅប្រទេសថៃ ក្នុងឆ្នាំ២០២៤ ហើយប្រទេសថៃនឹងទទួលបានប្រាក់ចំណូលប្រមាណ៣២០ពាន់លានបាត ៕

«ពិធីបុណ្យពិព័ណ៌ព្រិលទឹកកកអន្តរជាតិហាប៊ីន» គឺជាពិធីមួយនៅក្នុងចំណោមការការពិព័ណ៌ព្រិលទឹកកកកំពូលៗទាំង៤របស់ពិភពលោក ដែលត្រូវបានគេប្រារព្ធឡើងជារៀងរាល់ឆ្នាំនៅឯទីក្រុងហាប៊ីន ប្រទេសចិន។

ពិធីបុណ្យនេះត្រូវបានប្រារព្ធឡើងតាំងពីឆ្នាំ ១៩៦៣ មកម្លេះ។ ប៉ុន្តែវាត្រូវបានផ្អាកមួយរយៈក្នុងអំឡុងពេលបដិវត្តន៍វប្បធម៌ ប៉ុន្តែក៏ត្រូវបានប្រារព្ធឡើងវិញនៅក្នុងឆ្នាំ ១៩៨៥ នឹងបន្តរហូតមកដល់បច្ចុប្បន្ន។ ជាប្រពៃណី ពិធីពិព័ណ៌ទឹកកកនិងព្រិលអន្តរជាតិហាប៊ីននេះ នឹងបើកឲ្យដំណើរការនៅចន្លោះថ្ងៃទី ២០ ខែធ្នូ រហូតដល់ចុងខែកុម្ភៈ ដែលការបើកជាផ្លូវការនៃពិធីនេះនឹងធ្វើឡើងនៅថ្ងៃទី ៥ ខែមករា ជារៀងរាល់ឆ្នាំ។

ពិធីពិព័ណ៌ព្រិលទឹកកដ៏ធំរបស់ប្រទេសចិននេះ គឺរួមមានសកម្មភាពនិងព្រឹត្តិការណ៍គួរឱ្យចាប់អារម្មណ៍ជាច្រើនដូចជា ប្រារព្ធពិធីបុណ្យទឹកកកនិងព្រិលដ៏ចំណាស់ ការប្រកួតចម្លាក់ទឹកកកអន្តរជាតិ ការបង្ហាញគោមទឹកកក ការជិះទូកលើទឹកកក ការជិះស្គីលើទឹកកក ការជិះស្គីល្បឿនលឿន កីឡាបាល់ទាត់ទឹកកក ព្រមជាមួយនឹងការស្ទូចត្រី ការហែលទឹក ការបង្ហាញសិល្បៈភាពយន្តទឹកកកនិងព្រិល ការតាំងពិពណ៌គំនូរនិងរូបថត ចម្រៀងប្រជាប្រិយ និងការសម្តែងរបាំ ពិធីមង្គលការលើទឹកកក ពិព័រណ៍ពាណិជ្ជកម្ម និងព្រឹត្តិការណ៍កីឡាជាតិនិងអន្តរជាតិគ្រប់ប្រភេទ។ល។

រយៈពេលជាច្រើនឆ្នាំមកនេះ វិមានចម្លាក់ទឹកកកនិងព្រិលហាប៊ីនរបស់ប្រទេសចិននេះ បានក្លាយជាគោលដៅទេសចរណ៍រដូវរងាដ៏ពេញនិយមបំផុតរបស់ពិភពលោក និងឋានសួគ៌របស់អ្នកថតរូប។ ដោយនៅចន្លោះខែធ្នូ ដល់ ខែកុម្ភៈ អ្នកទេសចររាប់ពាន់នាក់បានសម្រុកទៅទីក្រុងនេះសម្រាប់វិស្សមកាលរដូវរងា ថ្ងៃឈប់សម្រាកគ្រួសារ ឬក្រេបទឹកឃ្មុំ។

គួរបញ្ជាក់ផងដែរថា ពិធីបុណ្យព្រិលទឹកកកំពូលទាំង ៤ នៅលើពិភពលោកនេះរួមាន៖ ១. ពិធីបុណ្យពិព័ណ៌ទឹកកកនិងព្រិលហាប៊ីន (ប្រទេសចិន) ២.ពិធីបុណ្យព្រិល Sapporo (ប្រទេសជប៉ុន) ៣.ពិធីបុណ្យរដូវរងាទីក្រុង Quebec (ប្រទេសកាណាដា) និង ៤.ពិធីបុណ្យជិះស្គីទឹកកករបស់(ប្រទេសន័រវេស)៕

បរទេស៖ ការនាំចេញផលិតផលកសិកម្មដូចជា គ្រាប់ធញ្ញជាតិ ទឹកដោះគោ ត្រី និងសាច់ បានធ្វើឱ្យប្រទេសរុស្ស៊ីរកចំណូលច្រើនជាង ៤៥ ពាន់លានដុល្លារអាមេរិកក្នុងឆ្នាំ ២០២៣ ដែលជាកម្រិតខ្ពស់បំផុតមិនធ្លាប់មាន នេះបើយោងតាមទិន្នន័យបឋមពីក្រសួងកសិកម្មរបស់ប្រទេសរុស្ស៊ី។កាលពីថ្ងៃទី២៦ ខែមករា ឆ្នាំ២០២៤ រដ្ឋមន្ត្រីក្រសួងកសិកម្មរុស្ស៊ី លោក Dmitry Patrushev បាននិយាយថា ការលក់ទំនិញកសិកម្មឆ្លងប្រទេសបាននាំឱ្យទីក្រុងម៉ូស្គូរកចំណូលបាន ៤៥ ពាន់លានដុល្លារអាមេរិកកាលពីឆ្នាំមុន។ លោកបានកត់សម្គាល់ថាតួលេខនេះទំនងជាកើនឡើងបន្ថែមទៀតនៅពេលដែលការគណនាចុងក្រោយត្រូវបានធ្វើឡើង។

ក្នុងរយៈពេលប៉ុន្មានឆ្នាំចុងក្រោយនេះ រុស្ស៊ីបានក្លាយជាប្រទេសនាំចេញគ្រាប់ធញ្ញជាតិដ៏ធំបំផុតរបស់ពិភពលោក ដោយសារការប្រមូលផល និងតម្លៃដ៏គួរឱ្យទាក់ទាញ បើទោះបីជាទណ្ឌកម្មរបស់លោកខាងលិចរារាំងពាណិជ្ជកម្មរបស់ប្រទេសនេះក៏ដោយ។ កាលពីឆ្នាំមុន ប្រទេសរុស្ស៊ីបាននាំចេញផលិតផលកសិកម្មទៅកាន់ប្រទេសចំនួន ១០០ ពួកគេក៏ផ្តល់គ្រាប់ធញ្ញជាតិដោយឥតគិតថ្លៃដល់ប្រទេសអាហ្វ្រិកមួយចំនួនដែលប្រឈមនឹងអសន្តិសុខស្បៀងផងដែរ។

យោងតាមទិន្នន័យរបស់ក្រសួងកសិកម្មរុស្សី ការផលិតទឹកដោះគោ និងសាច់បានកើនឡើងចំនួន ៥០០,០០០ តោន និង ៣០០,០០០ តោនក្នុងឆ្នាំ ២០២៣ រៀងគ្នា ហើយការផលិតត្រីឈានដល់កម្រិតខ្ពស់ក្នុងរយៈពេល ៣០ ឆ្នាំដែលមានចំនួន ៥,៣ លានតោន។ Patrushev បាននិយាយថា ក្នុងចំណោមនោះ ត្រី salmon តែមួយបានឈានដល់ ៦០០,០០០ តោនដែលធ្វើឱ្យប្រទេសរុស្ស៊ីក្លាយជាអ្នកផលិត ផលិតផលនេះច្រើនជាងគេនៅលើពិភពលោក។

នៅឆ្នាំនេះ ក្រសួងកសិកម្មរុស្ស៊ីបានប៉ាន់ប្រមាណថា ការនាំចេញគ្រាប់ធញ្ញជាតិនឹងឈានដល់ ៦០ លានតោន។ ដោយបច្ចុប្បន្នមិនមានការដាក់ទណ្ឌកម្មផ្ទាល់លើសកម្មភាពពាណិជ្ជកម្មនៃផលិតផលនេះទេ ខណៈដែលពួកគេអនុវត្តជាចម្បងចំពោះតែធនាគាររុស្ស៊ី អាជីវកម្ម បុគ្គល និងឧស្សាហកម្មថាមពលប៉ុណ្ណោះ។

ទោះជាយ៉ាងណាក៏ដោយ យោងតាមក្រសួងកសិកម្មរុស្ស៊ីមិនទាន់ប្រកាសទីផ្សារនាំចេញកំពូលរបស់ខ្លួនសម្រាប់ឆ្នាំ ២០២៣ នៅឡើយទេ។ គួរបញ្ជាក់ដែរថា កាលពីឆ្នាំមុន អ្នកទិញផលិតផលកសិកម្មរបស់រុស្ស៉ីច្រើនជាងគេគឺចិន ទួរគី កាហ្សាក់ស្ថាន បេឡារុស្ស កូរ៉េខាងត្បូង និងអេហ្ស៊ីប៕

ប្រទេសថៃ ៖ ការនាំចូលទុរេនរបស់ប្រទេសចិនទើបតែបានកើនឡើងកាលពីឆ្នាំ២០២៣ ប៉ុន្តែប្រទេសនាំមុខទីផ្សារដូចជាថៃ កំពុងតែបាត់បង់ចំណែកទីផ្សាររបស់ខ្លួន ក្រោយពីចិនអនុញ្ញាតឱ្យប្រទេសវៀតណាម និងហ្វីលីពីន នាំចេញទុរេនមកកាន់ប្រទេសចិនដែរ ។ នេះបើតាមការចុះផ្សាយរបស់សារព័ត៌មានបរទេស កាលពីថ្ងៃទី២៨ ខែមករា ឆ្នាំ២០២៤ ។

បើតាមទិន្នន័យរបស់ការិយាល័យគយចិនបញ្ជាក់ថា ប្រទេសចិនបាននាំចូលទុរេនចំនួន១លាន៤សែនតោន នៅឆ្នាំ២០២៣ កើនឡើង៦៩% បើធៀបនឹងឆ្នាំ២០២២ ។ ប្រទេសថៃដែលធ្លាប់កាន់កាប់ចំណែកការនាំចូលទុរេនខ្ពស់បំផុត ជិតស្មើនឹង១០០% នៅឆ្នាំ២០២១ បែរជាធ្លាក់ចុះនៅសល់ត្រឹមតែ៩៥,៣៦% នៅឆ្នាំ២០២២ និងនៅសល់ត្រឹមតែ៦៧,៩៨% នៅឆ្នាំ២០២៣ ។

ចំណែកប្រទេសវៀតណាមបានចាប់ផ្តើមដណ្តើមចំណែកទីផ្សារទុរេនពីប្រទេសថៃ ក្រោយពីប្រទេសចិនអនុញ្ញាតឱ្យក្រុមហ៊ុននាំចេញរបស់វៀតណាមអាចនាំចេញទុរេនស្រស់ទៅកាន់ប្រទេសចិន នៅឆ្នាំ២០២១ ។ ការនាំចេញទុរេនរបស់វៀតណាមទៅប្រទេសចិន ចាប់ផ្តើមកើនឡើងស្មើនឹង៤,៦៣% នៅឆ្នាំ២០២២ និងកើនឡើងរហូតដល់៣១,៨២% នៅឆ្នាំ២០២៣ ។

ក្រៅពីនេះ ដើម្បីចាប់យកចំណែកទីផ្សារប្រទេសចិនឱ្យកាន់តែច្រើនថែមទៀត ប្រទេសវៀតណាមបានកំណត់គោលដៅលក់ទុរេនក្នុងបរិមាណខ្ពស់នៅឆ្នាំ២០២៤ នេះ គឺការលក់នឹងកើនឡើងរហូតដល់៥៥% បើធៀបនឹងឆ្នាំ២០២៣ ។

រីឯប្រទេសហ្វីលីពីន ក៏ទទួលបានចំណែកទីផ្សារទុរេនចិនបន្តិចបន្តួចដែរ គឺនៅខែមករា ឆ្នាំ២០២៣ ប្រទេសចិនបានអនុញ្ញាតឱ្យហ្វីលីពីននាំចូលទុរេនស្រស់របស់ហ្វីលីពីន ហើយការនាំចេញទុរេនរបស់ហ្វីលីពីនភាគច្រើនមានប្រភពពីដីភ្នំភ្លើង Mount Apo ដែលស្ថិតនៅភាគខាងត្បូងកោះ មិនដាណៅ (Mindanao) ។ ប្រទេសហ្វីលីពីនបាននាំចេញទុរេនមានសមាមាត្រប្រមាណ០,២% នៃការនាំចូលទុរេនរបស់ចិន កាលពីឆ្នាំ២០២៣ ។

ទោះយ៉ាងណា បច្ចុប្បន្ន ទុរេនបានក្លាយជាផ្លែឈើមួយប្រភេទដែលមានតម្លៃសម្រាប់អ្នកមានជីវភាពមធ្យមនៅប្រទេសចិន បើទោះជាមានមនុស្សមួយចំនួនមិនចូលចិត្តក្លិនរបស់វាក្តី ប៉ុន្តែផ្លែឈើដែលមានបន្លាមុតស្រួចនេះនៅតែមានតម្លៃថ្លៃ និងមានមនុស្សជាច្រើននាក់ចូលចិត្តបរិភោគ ។ លើសពីនេះ ទុរេនត្រូវបានគេដាក់ឈ្មោះថា «ស្តេចផ្លែឈើ» នៅប្រទេសចិនទៀតផង ៕

វៀតណាម៖ កាលពីថ្ងៃទី២៨ ខែមករា ឆ្នាំ២០២៤ អង្គការអន្តរជាតិ និងទីភ្នាក់ងារសារព័ត៌មានជាច្រើនបានព្យាករណ៍ថា សេដ្ឋកិច្ចរបស់ប្រទេសវៀតណាមនឹងកើនខ្លាំងក្នុងអត្រា ៦% នៅឆ្នាំនេះដែលជាកម្រិតខ្ពស់នៅក្នុងតំបន់អាស៊ីអាគ្នេយ៍។

បើយោងតាម Global Trade Review បានចាត់ទុកថា វៀតណាម និងហ្វីលីពីនជាប្រទេសដែលមានសមិទ្ធិផលលេចធ្លោ និងកំណើនខ្លាំង។ ទន្ទឹមនឹងនោះ វៀតណាម និងថៃក៏នាំមុខគេក្នុងតំបន់អាស៊ីផងដែរ ទាក់ទងនឹងកំណើនពាណិជ្ជកម្មក្នុងបរិបទនៃកំណើនពាណិជ្ជកម្មពិភពលោក។

បច្ចុប្បន្នវៀតណាម និងប្រទេសកំពុងរីកចម្រើនមួយចំនួនផ្សេងទៀត គឺជាចំណុចភ្លឺស្វាងទាក់ទងនឹងការវិនិយោគ និងកំណើន។ ដូច្នេះវៀតណាមទំនងនឹងក្លាយជាប្រទេសដែលមានកំណើនសេដ្ឋកិច្ចលឿនបំផុតនៅអាស៊ីអាគ្នេយ៍ក្នុងឆ្នាំ ២០២៤ និងឆ្នាំ ២០២៥។

លោកបណ្ឌិត Hoe Ee Khor ប្រធានសេដ្ឋវិទូនៃការិយាល័យស្រាវជ្រាវម៉ាក្រូសេដ្ឋកិច្ចអាស៊ាន+៣ បាននិយាយថា ទំនុកចិត្តអាជីវកម្មរបស់វៀតណាមបានស្ទុះងើបឡើងវិញ ខណៈដែលអ្នកវិនិយោគកាន់តែច្រើនឡើងមានសុទិដ្ឋិនិយមចំពោះស្ថានភាពម៉ាក្រូសេដ្ឋកិច្ចបច្ចុប្បន្ន និងអត្រានៃអាជីវកម្មដែលមានបំណងពង្រីកទំហំអាជីវកម្មរបស់ពួកគេទ្វេដង។

លោកបណ្ឌិត Hoe Ee Khor បានបន្តទៀតថា “យើងសង្ឃឹមថាកំណើននឹងបន្តងើបឡើងវិញនៅឆ្នាំនេះ ហើយយើងក៏បានព្យាករណ៍ដែរថាកំណើនរបស់វៀតណាមនៅត្រឹម ៦% នៅឆ្នាំនេះ ដោយមើលឃើញថាការនាំចេញនឹងការងើបឡើងវិញរបស់ប្រទេសនេះស្ថិតក្នុងកម្រិតមធ្យមប៉ុណ្ណោះ។ ទោះជាយ៉ាងណា កំណើន ៦% នៅតែជាកំណើនលឿនបើប្រៀបធៀបទៅនឹងសេដ្ឋកិច្ចជាច្រើននៅក្នុងតំបន់អាស៊ីអាគ្នេយ៍។

គួរបញ្ជាក់ដែរថា ក្នុងរយៈពេល ៣ សប្តាហ៍ដំបូងនៃខែមករា ឆ្នាំ២០២៤ ដើមទុនដែលបានចុះបញ្ជីថ្មីសរុបរបស់វៀតណាមដូចជា ការកែសម្រួល និងការរួមចំណែកដើមទុនពីវិនិយោគិនបរទេស ការទិញភាគហ៊ុន … បានកើនឡើងដល់ជាង ២.៣៦ ពាន់លានដុល្លារអាមេរិក កើនឡើងជាង ៤០% បើធៀបនឹងរយៈពេលដូចគ្នាកាលពីឆ្នាំមុន។
វិនិយោគិនបរទេសបានវិនិយោគក្នុងវិស័យសេដ្ឋកិច្ចចំនួន ១៥ ក្នុងចំណោមវិស័យសេដ្ឋកិច្ចចំនួន ២១។ ជាពិសេស ឧស្សាហកម្មអាជីវកម្មអចលនទ្រព្យនាំមុខគេជាមួយនឹងទុនវិនិយោគសរុបជាង ១.២៧ ពាន់លានដុល្លារអាមេរិក ក៏បានកើនឡើងទ្វេដងក្នុងរយៈពេលដូចគ្នានេះផងដែរ។ បន្ទាប់មកគឺឧស្សាហកម្មកែច្នៃ និងផលិតកម្ម ក៏ដូចជាសកម្មភាពវិជ្ជាជីវៈ វិទ្យាសាស្ត្រ និងបច្ចេកវិទ្យា រួមទាំងឧស្សាហកម្មលក់ដុំ និងរាយទៀតផង។

ការទាក់ទាញការវិនិយោគពីបរទេសបន្តជាកម្លាំងចលករដ៏អស្ចារ្យសម្រាប់សេដ្ឋកិច្ចរបស់ប្រទេសវៀតណាម។ ក្នុងបរិបទដែលសេដ្ឋកិច្ចពិភពលោកប្រឈមមុខនឹងបញ្ហាប្រឈមជាច្រើន សេដ្ឋកិច្ចវៀតណាមនៅតែទទួលបានការវាយតម្លៃជាវិជ្ជមានអំពីទស្សនវិស័យរបស់ខ្លួននៅឆ្នាំ ២០២៤ ៕