ខេត្តបាត់ដំបង៖ យុវជនទំនើងម្នាក់បានលបលួចចូលផ្ទះអ្នកស្រុក យកកាំបិតភ្ជង់គំរាមក្មេងស្រីអាយុ១០ឆ្នាំម្នាក់ដែលកំពុងដេកលក់ ហើយប៉ុនប៉ងចាប់រំលោភសេពសន្ថវៈ តែអស់លក្ខណ៍ ត្រូវអ្នកភូមិមកទាន់ នាំគ្នាដេញចាប់ តាំងពីក្រុមទី១៣ ភូមិវត្តតាមិម ឃុំអូរដំបង១ ស្រុកសង្កែ រហូតដល់ភូមិរំចេក៤ សង្កាត់រតនៈ ក្រុងបាត់ដំបង ទើបចាប់បាន រួចនាំគ្នាវាយបែកមុខមាត់ មុននឹងប្រគល់ខ្លួនទៅឲ្យសមត្ថកិច្ច កាលពីវេលាម៉ោង១២ និង៣០នាទីរសៀល ថ្ងៃអង្គារ ១កើត ខែជេស្ឋ ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី១៥ ខែឧសភា ឆ្នាំ២០១៨។
ប្រភពព័ត៌មានពីកន្លែងកើតហេតុ បានឲ្យដឹងថា មុនពេលកើតមាននូវករណីចាប់រំលោភសេពសន្ថវៈនោះ ឪពុកម្ដាយរបស់ក្មេងស្រីរងគ្រោះ បានទៅធ្វើការងារអស់ ហើយនាងក៏បានដេកយ៉ាងលង់លក់ នៅក្នុងផ្ទះរបស់នាង។ លុះមកដល់វេលាម៉ោងជាង១២រសៀល ស្រាប់តែលេចមុខជនសង្ស័យ បើកទ្វារចូលទៅក្នុងផ្ទះរបស់នាង ហើយដកកាំបិតភ្ជង់ និងគំរាមចាប់រំលោភសេពសន្ថវៈ ដោយយកកាំបិតកាត់ខោអាវរបស់នាង បណ្ដាលឲ្យរហែកដោយអន្លើៗ។
ស្របពេលជនសង្ស័យកំពុងតែធ្វើសកម្មភាពនោះ អ្នកជិតខាងក៏បានចូលទៅដល់ ធ្វើឲ្យជនសង្ស័យមានអារម្មណ៍ភិតភ័យ ហើយរត់ឡើងលើម៉ូតូជិះគេចខ្លួន។ ភ្លាមៗនោះ អ្នកភូមិបានដេញចាប់ជនសង្ស័យ តាំងពីភូមិវត្តតាមឹម ឃុំអូរដំបង១ ស្រុកសង្កែ រហូតដល់ភូមិរំចេក៤ សង្កាត់រតនៈ ក្រុងបាត់ដំបង ខេត្តបាត់ដំបង ទើបព័ទ្ធចាប់បាន និងស្វាគមន៍ម្នាក់មួយដៃមួយជើង បណ្ដាលឲ្យរងរបួសធ្ងន់។
មន្ត្រីនគរបាលស្រុកសង្កែ បានឲ្យដឹងថា ជនសង្ស័យជាប់ពាក់ព័ន្ធនឹងករណីចាប់រំលោភសេពសន្ថវៈ ហើយត្រូវសមត្ថកិច្ចឃាត់ខ្លួននោះ ឈ្មោះ វ៉ាន់ គឹមស្រស់ អាយុ២៣ឆ្នាំ រស់នៅភូមិកម្មករ សង្កាត់ស្វាយប៉ោ ក្រុងបាត់ដំបង ខេត្តបាត់ដំបង។ រីឯក្មេងស្រីរងគ្រោះ ឈ្មោះ ល ស ល អាយុ១០ឆ្នាំ មានលំនៅក្នុងឃុំអូរដំបង១ ស្រុកសង្កែ។
ក្រោយពេលប្រជាពលរដ្ឋឃាត់ខ្លួនបាន សមត្ថកិច្ចបានចុះទៅនាំខ្លួនជនសង្ស័យមកសាកសួរ ហើយបញ្ជូនទៅកាន់អធិការដ្ឋាននគរបាលស្រុកសង្កែ ដែលជាកន្លែងកើតហេតុ ដើម្បីចាត់ការបន្តតាមនីតិវិធី៕
