ខេត្តព្រៃវែង៖ រឿងដ៏អយុត្តិធម៌មួយ កើតឡើងលើគ្រួសាររបស់ ក្មេងស្រីរងគ្រោះម្នាក់ ត្រូវបានមន្ត្រីនគរបាល ឋានន្តរស័ក្តិអនុសេនីយ៍ទោ បានចាប់រំលោភ រួចបង្ខាំងទុកបង្ខំឲ្យដេកជាមួយភ្ញៀវ ដើម្បីរកលុយឲ្យរូបគេ ទិញថ្នាំញៀន។ បន្ទាប់ពីមានការចុះផ្សាយ យ៉ាងព្រោងព្រាត ពីបណ្តាញសារព័ត៌មាន ក៏ដូចបណ្តាញសង្គមហ្វេសប៊ូករួចមក ព័ត៌មាននេះក៏បានដឹងដល់ ឯកឧត្តមនាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ។
លោកក៏បាន ដាក់បទបញ្ជាយ៉ាងម៉ឺងម៉ាត់ ដល់មន្ត្រីជំនាញចុះស្រាវជ្រាវ និងមានវិធានផ្លូវច្បាប់ ប្រសិនបើរកឃើញ បានប្រព្រឹត្តដូចអ្វី ដែលការចោទប្រកាន់ ដូចដែលសារព័ត៌មាន បានចុះផ្សាយនោះ ត្រូវចាប់ឃាត់ខ្លួនជាបន្ទាន់ផងដែរ ។
យោងតាមសម្តីរបស់ ស្នងការនគរបាលខេត្តព្រៃវែង លោកឧត្តសេនីយ៍ទោ ស្រេង ជា បានឱ្យដឹងថា បន្ទាប់ពីទទួលពាក្យបណ្តឹង ជនរងគ្រោះភ្លាម លោកបានសុំ គោល ការណ៍ថ្នាក់លើ នឹងបានចាត់កម្លាំងចុះស្រាវជ្រាវ ស៊ើបអង្កេតភ្លាមៗ រហូតឃាត់ខ្លួនជនសង្ស័យ នៅថ្ងៃទី១០ ខែឧសភា ឆ្នាំ២០១៨។ លោកបន្តថា ជនសង្ស័យឈ្មោះ ឌឹម មករា ភេទប្រុស អាយុ ៣៣ឆ្នាំ ជនជាតិខ្មែរ រស់នៅភូមិរោង ឃុំចាម ស្រុកកំពង់ត្របែក ខេត្តព្រៃវែង។
បន្ទាប់ពីឃាត់ខ្លួន កម្លាំងជំនាញបានកសាងសំណុំរឿង បញ្ជូនទៅសាលាដំបូងខេត្តព្រៃវែង កាលពីថ្ងៃទី១១ ខែឧសភា និងបន្តរហូត ដល់ព្រឹក ថ្ងៃទី១២ ខែឧសភា ឆ្នាំ២០១៨ នេះ ចៅក្រមស៊ើបសួរ នៃអយ្យការអមសាលាដំបូងខេត្ត បានចេញដីកាបង្គាប់ឱ្យឃុំខ្លួន ជនសង្ស័យ ពីបទៈ អំពើរំលោភសេពសន្ថវៈ ស្ថានទម្ងន់ទោស ដោយសារមធ្យោបាយប្រើប្រាស់បង្ខាំង ដោយខុសច្បាប់ និងសញ្ចារកម្មស្ថានទម្ងន់។
រំលឹករឿងរ៉ាវឡើងវិញ ៖ មានហេតុការណ៍ដ៏ភ្ញាក់ផ្អើលមួយ បានល្បីទូទាំងខេត្តព្រៃវែង ដោយមានមន្ត្រីនគរបាល ខេត្តព្រៃវែងម្នាក់ មានប្រពន្ធថែមទាំង មានកូន២នាក់ទៅហើយ បានរងបណ្តឹងចោទប្រកាន់ ពីជនរងគ្រោះមួយគ្រួសារ ប្តឹងពីបទគំរាមកំហែង បាញ់សម្លាប់មួយពូជ បន្ទាប់ពីមន្ត្រីនគរបាលខាងលើ បានចាប់រំលោភសេពសន្ថវៈ លើកូនរបស់គាត់ដែលមានអាយុ ទើបតែ១៦ឆ្នាំ រហូតបានសម្រេច។
មិនត្រឹមតែប៉ុណ្ណោះ មន្ត្រីនគរបាលខាងលើ បានយកក្មេងស្រីរងគ្រោះ ដែលខ្លួនចាប់រំលោភហើយនោះ ទៅចាក់សោរបង្ខាំងទុក ក្នុងផ្ទះជួលមួយនៅភ្នំពេញ បង្ខំឲ្យបម្រើសេវាផ្លូវភេទ ជាមួយភ្ញៀវប្រុសៗជាច្រើន ដើម្បីយកលុយ មកឲ្យខ្លួនគេទិញថ្នាំញៀន ដើម្បីជួញដូរ និងប្រើប្រាស់ទៀតផង ។ ក្មេងស្រីរងគ្រោះ ឈ្មោះល.ស.ហ អាយុ១៦ឆ្នាំ រស់នៅក្នុងបន្ទុក ជាមួយឪពុកឈ្មោះ ព្រំ សារិទ្ធ អាយុ៤៥ឆ្នាំ និងម្តាយឈ្មោះ ហែម តង អាយុ៣៦ឆ្នាំ មានទីលំនៅ ភូមិរោង ឃុំចាម ស្រុកកំពង់ត្របែក ខេត្តព្រៃវែង ។
យោងតាមសម្តីដ៏ឈឺចាប់ របស់ក្មេងស្រីរងគ្រោះ បានរៀបរាប់ទាំងទឹកភ្នែក ប្រាប់សារព័ត៌មានមួយថា អំឡុងខែ១១ ឆ្នាំ២០១៧ ដែលរូបនាងទើបតែ មានអាយុ១៥ឆ្នាំ ហើយនៅផ្ទះតែម្នាក់ឯង ដោយឪពុកម្តាយ បានចេញទៅផ្សារកអណ្តើក ទិញអីវ៉ាន់ រីឯប្អូនៗបីនាក់ទៅរៀនអស់ ស្រាប់តែមានបុរសម្នាក់ ឈ្មោះ ឌឹម មករា ភេទប្រុស អាយុ៣២ឆ្នាំ មុខងារជាមន្ត្រីនគរបាលខេត្តព្រៃវែង និងត្រូវជាកូនប្រុសបង្កើត របស់លោកឧត្តមសេនីយ៍ត្រី ឌឹម យ៉ារ៉ុម ស្នងការរងខេត្តព្រៃវែង ទទួលផ្នែកសេនាធិការខេត្ត ។
នាងបានយំបណ្តើរ ហើយរៀបរាប់បន្តថា លោក ឌឹម យ៉ារ៉ុម បានបញ្ជូនកូនប្រុស ឲ្យមកឈរជើងនៅព្រំដែន កម្ពុជា-វៀតណាម ច្រកស្វាយអាង៉ោង ថែមទាំងមានប្រពន្ធកូន២នាក់ទៅហើយ ជននោះបានដើរចូល មកក្នុងផ្ទះរបស់នាង រួចដកកាំភ្លើងខ្លីភ្ជង់គំរាមថា តែហ៊ានស្រែក និងប្រាប់គេឯងឲ្យដឹង គេនិងបាញ់សម្លាប់មួយពូជ ។
និយាយរួចជនឃោរឃៅរូបនេះ បានអូសដៃនាងឡើងទៅលើផ្ទះ ដោយកាន់កាំភ្លើង ភ្ជង់ក្បាលនាងជាប់ ហើយធ្វើសកម្មភាព រំលោភនាងរហូតបានសម្រេច ទើបប្អូនស្រីនាង មកពីរៀនវិញទាន់ ក៏ត្រូវជនល្មើស ឈ្មោះ ឌឹម មករា នេះគំរាមបាញ់សម្លាប់ដែរ ។ តែប្អូនស្រីនាង បានរត់ចេញទៅហៅយាយបង្កើត នៅផ្ទះកូនខាងមុខ ចម្ងាយប្រហែល២០០ម៉ែត្រ ពីផ្ទះរបស់ខ្លួន។ តែទំរាំយាយទៅដល់ ជននេះបានរត់គេចខ្លួន តាមទ្វារក្រោយ ទៅបាត់ដោយទុកទូរស័ព្ទធំ១គ្រឿង មិនចាំម៉ាក សម្រាប់ឲ្យទាក់ទងទៅគេ បើមិនដូច្នោះទេ គេនឹងមកបាញ់សម្លាប់ មួយគ្រួសារទាំងអស់ ។
នាងបានរៀបរាប់បន្ត ទាំងក្តុកក្តួលក្នុងចិត្តថា ដោយខ្លាចការគំរាមពីជននោះ ថានឹងបាញ់សម្លាប់ម៉ែឪ បងប្អូន ខ្លួនសុខចិត្តទ្រាំឈឺចាប់ លាក់បាំងមិនបានប្រាប់យាយ ឪពុកម្តាយថា ជននេះចាប់រំលោភខ្លួន បានសម្រេចនោះទេ ទោះបីជាពួកគាត់ឈ្លេចសួរ ជជីកសួរដេញដោលយ៉ាងណាក៏ដោយ ។
បន្ទាប់ពីរឿងនេះកើតឡើង ឪពុកម្តាយរបស់នាង បានគិតថាបើទុកនាង ឲ្យនៅផ្ទះនេះទៀត ខ្លាចមានបញ្ហាបន្ត ក៏រំដោះបញ្ជូនខ្លួននាង ឲ្យទៅធ្វើការងារ នៅកាស៊ីណូមួយនៅក្រុងបាវិត ខេត្តស្វាយរៀង បានរយៈពេល១ខែកន្លះ ស្រាប់តែជនឈ្មោះ ឌឹម មករា បានទូរស័ព្ទមកគំរាមនាង ឲ្យជិះរថយន្តឈ្នួល ទៅជួបគេនៅភ្នំពេញ បើមិនទៅទេ គេនឹងមកបាញ់សម្លាប់មួយគ្រួសារ ។
ក្មេងស្រីរងគ្រោះបញ្ជាក់ថា ដោយគិតពីសុខសុវត្ថភាពក្រុមគ្រួសារនាង នាងក៏សម្រេចចិត្ត ឡើងជិះរថយន្តឈ្នួល ទៅជួបជនឈ្មោះ ឌឹម មករា នៅរាជធានីភ្នំពេញ ដោយមិនបានប្រាប់ក្រុមគ្រួសារឲ្យដឹងនោះទេ ។
ក្មេងស្រីរងគ្រោះ បញ្ជាក់បន្ថែមថា ជនឈ្មោះ ឌឹម មករា នេះមានប្រពន្ធកូន២នាក់ ហើយប្រពន្ធត្រូវជាបងប្អូន ជីដូនមួយជាមួយក្រុមគ្រួសាររបស់នាងទៀត រស់នៅភូមិឃុំខាងលើជាមួយគ្នា (ផ្ទះក្បែរគ្នា) ។ ហើយខណៈដែលនាងឡើង ទៅដល់ភ្នំពេញ គឺឈ្មោះ ឌឹម មករា បាននាំនាងទៅដេកផ្ទះសំណាក់យីហោ ទន្លេមាស នៅជិតប៉ុស្តិ៍ទូរទស្សន៍ស៊ីធីអ៊ិន គីឡូលេខ៦ បានរយៈពេល៤ថ្ងៃ ក៏នាំទៅដេកផ្ទះបងពួកម៉ាកគេ នៅគីឡូលេខ៨ បាន២ថ្ងៃ ក៏បន្តទៅដេកផ្ទះមិត្តភក្តិ របស់គេម្នាក់ទៀត នៅទឹកថ្លាបានប្រហែល១សប្តាហ៍ ក៏ជួលបន្ទប់នៅក្បែរនោះ ស្នាក់នៅតែម្តង ។
សរុបទៅរយៈពេល០៣ខែ នៅភ្នំពេញ នាងគ្មានសេរីភាពទេ គឺឈ្មោះនេះ បានចាក់សោរបង្ខាំងនាង នៅក្នុងផ្ទះ ពេលទៅណាម្តងៗ គឺទៅជាមួយគេ ហើយគេបង្ខំឲ្យខ្លួនញញឹមរីករាយ។ មិនតែប៉ុណ្ណោះនាងចោទថា ជននេះបានបង្ខំឲ្យនាង ទៅដេកជាមួយប្រុសផ្សេង យកលុយមកឲ្យជននេះ ទិញថ្នាំញៀនយកមកប្រើប្រាស់ និងយកថ្នាំញៀនទៅជួញដូរ រហូតដល់ស្រុក កំពង់ត្របែកទៀតផង។ ហើយនៅពេលដែលនាង រកលុយមិនបានឲ្យគេទិញថ្នាំញៀន គេវាយបោចសក់ធ្វើបាបនាងទៀត ។
ក្មេងស្រីរងគ្រោះ បន្តថា សម្បីតែទូរស័ព្ទក៏ជននេះ មិនឲ្យប្រើដែរ ហើយទូរស័ព្ទដែលជននេះប្រើ គឺយកឈ្មោះនាង ដាក់អាខោនហ្វេសប៊ុករបស់គេ។ ហើយនៅថ្ងៃមួយ ពេលដែលជននេះចេញមកក្រៅមួយភ្លែត នាងក៏យកទូរស័ព្ទលួចតេ មកប្រាប់ឪពុកឲ្យទៅយកខ្លួនមកផ្ទះផង។ ហើយឪពុកនាង ក៏បានទូរស័ព្ទប្រើល្បិចទៅលួងលោម ឲ្យវាទន់ចិត្ត ហៅថាកូនឯងនាំប្អូនមកផ្ទះវិញមក ទើបជននេះ នាំនាងមកនៅថ្ងៃទី៨ ខែមេសា ឆ្នាំ២០១៨ វេលាម៉ោងប្រហែល៨យប់ ។
ពេលមកដល់ផ្ទះភ្លាម ជននេះនៅតែមករករឿងស្រែកឡូឡា គំរាមកំហែងទារយកនាង ឲ្យទៅជាមួយវាវិញ ហើយថែមទាំងវាយបំផ្លិចបំផ្លាញ ទ្រព្យសម្បត្តិក្នុងផ្ទះនាង ធ្វើឲ្យក្រុមគ្រួសារនាងភ័យរត់ទៅហៅប៉ូលិសប៉ុស្តិ៍ ឲ្យមកជួយអន្តរាគម៏ ក៏ប៉ុន្តែប៉ូលិសប៉ុស្តិ៍ទាំងនោះ គេមិនមកទេ។
ដោយសារខ្លាចការគំរាមកំហែង ញឹកញាប់ពេក គ្រួសាររបស់ក្មេងស្រីរងគ្រោះ ទៅដាក់ពាក្យបណ្តឹង នៅសាលាឃុំចាម តែមេឃុំក្រុមប្រឹក្សាឃុំ គេនិយាយថា រឿងកន្លងហួស ទុកជាអាសារបង់ទៅ ឪគេធ្វើការធំណាស់។ ឳពុកម្តាយនាងក៏មកផ្ទះវិញ រហូតដល់ថ្ងៃទី៩ ខែឧសភា ឆ្នាំ២០១៨ ម្សិលមិញនេះ ទើបគ្រួសារគាត់មកដាក់ពាក្យបណ្តឹង នៅអធិការដ្ឋាន នគរបាលស្រុកកំពង់ត្របែក ឲ្យជួយរកយុត្តិធម៌ ដោយសូមទារជំងឺចិត្តចំនួន៥,០០០ដុល្លារ និងសូមឲ្យសមត្ថកិច្ច អនុវត្តតាមនីតិវិធីច្បាប់ផង ។
ទោះយ៉ាងណា ក្រុមគ្រួសារក្មេងស្រីរងគ្រោះ សូមសំណូមពរដល់អង្កការ អាជ្ញាធរសមត្ថកិច្ចគ្រប់លំដាប់ថ្នាក់ ជាពិសេសប្រមុខរាជរដ្ឋាភិបាល មេត្តាជួយរកយុត្តិធ៌ម ឲ្យកូនស្រីគាត់ផង ព្រោះជននេះកាចសាហាវឃោរឃៅណាស់ អ្នកភូមិខ្លាចគ្រប់ៗគ្នា ។
ពាក់ពន្ធ័បញ្ហានេះ លោក ស្រេង ជា ស្នងការនគរបាលខេត្តព្រៃវែង បានឲ្យដឹងតាមទូរស័ព្ទ កាលពីរសៀលថ្ងៃទី៩ ខែឧសភា នេះថា លោកទើបទទួលបានពាក្យបណ្តឹង ពីក្រុមគ្រួសារជនរងគ្រោះ ហើយលោកក៏បានបញ្ជាឲ្យលោកអធិការ ធ្វើរឿងនេះហើយ ។
ទោះជាយ៉ាងណា លោកស្នងការបញ្ជាក់ថា ឈ្មោះ ឌឹម មករា នេះជានាយរងផ្នែកអគ្គិភ័យ ខេត្តព្រៃវែង ខូចណាស់ ត្រូវឳពុកបង្កើត គឺលោកឧត្ដមសេនីយ៍ត្រី ឌឹម យ៉ារ៉ុប ស្នងការរងខេត្តព្រៃវែង ទទួលផ្នែកសេនាធិការខេត្តព្រៃវែង ប្រដៅយ៉ាងណា ក៏វានៅតែមិនរាងចាលដែរ អាហ្នឹង(ជនជាប់ចោទ) ។
សូមជម្រាប់ថា វិន័យរបស់កងកម្លាំងនគរបាលជាតិ មិនមែនបណ្តែតបណ្តោយ ឲ្យអ្នកឯងធ្វើអ្វីខុសច្បាប់បែបនេះទេ បើធ្វើខុសវិន័យរបស់អង្គភាព ត្រូវតែទទួលកំហុស ចំពោះមុខច្បាប់ ទោះបីកូនអ្នកណាក៏ដោយ។ ជាក់ស្តែង អគ្គស្នងការនគរបាលជាតិ នឹងធ្វើការស្រាវជ្រាវ យ៉ាងយកចិត្តទុកដាក់ ចំពោះករណីនេះ ហើយក្នុងករណីរកឃើញថា ឈ្មោះ ឌឹម មករា ឋានន្តរស័ក្ដិអនុសេនីយ៍ទោ បានប្រព្រឹត្តបទល្មើស ដូចការចោទប្រកាន់មែននោះ អគ្គស្នងការនគរបាលជាតិ នឹងចាត់វិធានការទៅតាមផ្លូវច្បាប់ ៕
