កណ្ដាល៖ បុរសម្នាក់ខឹងប្រពន្ធហាមណែនាំមិនឱ្យផឹកស្រា និងជក់បារី ក៏កើតជាទំនាស់ពាក្យសម្ដី រហូតក្លាយជាអំពើហិង្សាយកខ្នងកណ្តៀវទៅកាប់ក្បាលប្រពន្ធពីក្រោយបណ្ដាលឱ្យហូរឈាមដេរ ៣ថ្នេរ ព្រមទាំងវាយបំផ្លាញទ្រព្យសម្បត្តិ ដែលករណីនេះបានបង្កឱ្យមានការភ្ញាក់ផ្អើល ដល់ប្រជាពលរដ្ឋ និងសមត្ថកិច្ចចុះទៅឃាត់ខ្លួនកាលពីរសៀលថ្ងៃទី១១ ខែឧសភា ឆ្នាំ២០១៨ នៅក្នុងភូមិកណ្តាល ឃុំសណ្តារ ស្រុកលើកដែក ខេត្តកណ្តាល ។
ស្ត្រីរងគ្រោះជាប្រពន្ធមានឈ្មោះ ភ័ណ្ឌ ឌីណា ហៅរីណា អាយុ ១៩ឆ្នាំ ជនជាតិខ្មែរ មានមុខរបរធ្វើចំការ ស្នាក់នៅខាងប្តីផ្ទះកើតហេតុខាងលើ ចំណែកជនបង្កជាប្ដីមានឈ្មោះ សាត សុភ័ក្ត អាយុ ២៨ឆ្នាំ ជនជាតិខ្មែរ មានមុខរបរធ្វើចំការ រស់នៅជាមួយគ្នា ។
មុនកើតហេតុ គេបានឃើញទាំងពីរនាក់ប្ដីប្រពន្ធអង្គុយនៅផ្ទះបងជីដូនមួយឈ្មោះ ចាន់ ធី ដែលមានដីឡូត៍ជាប់គ្នា ហើយបុរសជាប្ដីបានផឹកស្រាស្រវឹង ព្រមទាំងទាញបារីមកជក់ ។ ឃើញដូចនេះ ប្រពន្ធមិនពេញចិត្ត ក៏បានក្រោកឡើងមកផ្ទះ ហើយប្ដីក៏ដើរតាមក្រោយមកជាមួយគ្នាដែរ ។
ពេលមកដល់ផ្ទះ បុរសជាប្ដីបានស្រែកបណ្ដេញប្រពន្ធឱ្យវេចខោអាវចុះចេញពីផ្ទះ ហើយភ្លាមនោះ ប្រពន្ធក៏វេចខោអាវដាក់លើម៉ូតូបម្រុងជិះចេញ តែត្រូវប្ដីស្រែកគំរាមថា ប្រសិនបើហ៊ានជិះចេញគេនឹងកាប់កម្ទេចចោល ព្រមទាំជេរប្រមាថប្រពន្ធថែមទៀតផង ។
ជាមួយគ្នានោះដែរ ស្ត្រីជាប្រពន្ធក៏បានតមាត់ ធ្វើឱ្យប្ដីផ្ទុះកំហឹងក៏ទាញបានកណ្តៀវមកកាប់ក្បាលប្រពន្ធពីក្រោយ បណ្ដាលឱ្យដាច់សាច់ហូរឈាម ។ ភ្លាមនោះ ប្រពន្ធក៏បានទាញកូនកាំបិតធ្វើត្រីគប់ទៅប្តីវិញដែរ តែគប់ពុំត្រូវឡើយ ។
ក្រោយកើតហេតុ ជនរងគ្រោះត្រូវបានឪពុកក្មេក និងបងថ្លៃជូនទៅពេទ្យក្អមសំណរ ចំណែកជនសង្ស័យ ត្រូវបាននគរបាលឃាត់ខ្លួនបញ្ជូនទៅកាន់ផ្នែកជំនាញចាត់ការតាមនីតិវិធី ៕