ខេត្តបាត់ដំបង៖ បុរសម្នាក់កំពុងបើកគោយន្ត ទៅស្រែទាំងភ្លៀងកំពុងបង្អុរចុះ ស្រាប់តែរន្ទះបាញ់ឆាំងឡើង បណ្ដាលឲ្យរងរបួសធ្ងន់ បង្កឲ្យភ្ញាក់ផ្អើលឡើង កាលពីវេលាម៉ោង៣ និង១៥នាទីរសៀល ថ្ងៃទី០៦ ខែឧសភា ឆ្នាំ២០១៨ នៅកណ្ដាលវាលស្រែ ទួលរកា ស្ថិតក្នុងភូមិជ្រោយស្ដៅ ឃុំជ្រោយស្ដៅ ស្រុកថ្មគោល។
មន្ត្រីនគរបាលស្រុកថ្មគោល បានឲ្យដឹងថា ជនរងគ្រោះ ឈ្មោះ ម៉ៅ ម៉ារឌី ភេទប្រុស អាយុ៣១ឆ្នាំ មុខរបរជាកសិករ រស់នៅភូមិ-ឃុំខាងលេី។ មុនពេលកើតហេតុ គាត់បានបើកគោយន្តកាត់ភ្លៀងសំដៅទៅស្រែរបស់គាត់ លុះពេលគាត់បើកគោយន្តទៅដល់ចំណុចខាងលើ ស្រាប់តែរន្ទះបាញ់ឆាំងឡើង បណ្ដាលឲ្យរងរបួសធ្ងន់។ ក្រោយពេលកើតហេតុ សាច់ញាតិបានបញ្ជូនជនរងគ្រោះទៅសង្រ្គោះ នៅក្នុងមន្ទីរពេទ្យ៕