ខេត្តពោធិ៍សាត់៖ យុវជនម្នាក់ ខឹងនឹងបងស្ដីប្រដៅ ពីរឿងដើរលេងយប់ ស្រាប់តែយកខ្សែមកចងកធ្វើអត្តឃាត បង្កឲ្យភ្ញាក់ផ្អើលឡើង កាលពីវេលាម៉ោង ១០ព្រឹក ថ្ងៃទី២២ ខែមេសា ឆ្នាំ២០១៨ នៅក្នុងភូមិព្រៃខ្លា ឃុំត្នោតជុំ ស្រុកក្រគរ។
ប្រភពព័ត៌មាន បានឱ្យដឹងថា មុនពេលកើតហេតុ ជនរងគ្រោះតែងតែដើរលេង រហូតយប់ជ្រៅ ទើបត្រឡប់មកផ្ទះវិញ ហើយគេគ្មានគិតគូរអំពីអ្វីទាំងអស់។ ឃើញដូច្នេះ បងប្រុសរបស់គេបានស្តីប្រដៅថា ឯងគិតតែពីដើរលេង រហូតដល់យប់ជ្រៅ ទើបត្រឡប់ចូលផ្ទះវិញ មិនខ្លាចឪពុកម្តាយអ្វីបន្តិចសោះ។ នៅពេលឮពាក្យបងប្អូនស្ដីបែបនេះ ជនរងគ្រោះក៏បានតបវិញ ទើបបង្កឲ្យមានការឈ្លោះប្រកែកគ្នា ហើយបងប្អូនបានទៅរកកន្លែងដេករៀងៗខ្លួន។ លុះមកវេលាម៉ោង១០ព្រឹកថ្ងៃដដែល ក្រុមគ្រួសារបានឃើញជនរងគ្រោះចងកសម្លាប់ខ្លួននៅលើផ្ទះ។
លោកវរសេនីយ៍ទោ ឯម រុន អធិការនគរបាលស្រុកក្រគរ បានឱ្យដឹងថា ជនរងគ្រោះ ឈ្មោះ ផេង សុខជា ភេទប្រុស អាយុ២៣ឆ្នាំ រស់នៅភូមិឃុំខាងលើ។ រីឯការសម្រេចចិត្តចងកសម្លាប់ខ្លួនរបស់ជនរងគ្រោះខាងលើ គឺព្រោះគាត់មិនបានគិតឱ្យវែងឆ្ងាយ ហើយគាត់ធ្វើឡើង ដោយសារតែយកកំហឹងមកដាក់ខ្លួន។ នេះគេហៅថា ខឹងខុស ខឹងខាត មិនស្តាប់តាមដំបូន្មានរបស់បងប្អូន ជនរងគ្រោះក៏សម្រេចចិត្តចងកសម្លាប់ខ្លួនតែម្តង។
ក្រោយពេលពិនិត្យ និងធ្វើកោសល្យវិច័យរួច សមត្ថកិច្ចបានបញ្ជាក់ថា ជនរងគ្រោះពិតជាបានចងកសម្លាប់ខ្លួនប្រាកដមែន ហើយសាកសពត្រូវសមត្ថកិច្ចប្រគល់ជូនក្រុមគ្រួសារ ចាត់ចែងរៀបចំ ធ្វើបុណ្យតាមប្រពៃណី៕