ខេត្តកណ្ដាល៖ បុរសម្នាក់ឃើញនារីវ័យក្មេងម្នាក់កំពុងចោមពង់ងូតទឹកតែម្នាក់ឯង ធ្វើឲ្យតណ្ហារបស់គេពុះកញ្ជ្រោលឡើង ចូលទៅចាប់បីត្រកង ប៉ុនប៉ងនាំរំលោភសេពសន្ថវៈ តែមិនសម្រេច ក៏ត្រូវសមត្ថកិច្ចចុះទៅឃាត់ខ្លួន កាលពីវេលាម៉ោង៨ និង៣០នាទីព្រឹក ថ្ងៃទី២២ ខែមេសា ឆ្នាំ២០១៨ នៅក្នុងភូមិពាម ឃុំរកាកោង១ ស្រុកមុខកំពូល។
មន្ដ្រីនគរបាលស្រុកមុខកំពូល បានឲ្យដឹងថា ជនសង្ស័យជាប់ពាក់ព័ន្ធនឹងករណីចាប់រំលោភសេពសន្ថវៈ ដែលសមត្ថកិច្ចឃាត់ខ្លួន ឈ្មោះ ហន ហាន អាយុ២៧ឆ្នាំ មុខរបរជាកម្មករសំណង់។ រីឯនារីរងគ្រោះ ឈ្មោះ ប រ អាយុ១៨ឆ្នាំ មុខរបរជាបុគ្គលិកក្រុមហ៊ុនអនឡាញ។ ជនសង្ស័យ និងនារីរងគ្រោះមានលំនៅក្នុងភូមិពាម ឃុំរកាកោង១ ស្រុកមុខកំពូល ខេត្កកណ្ដាល។ ក្រៅពីឃាត់ខ្លួនជនសង័្សយខាងលើនេះ សមត្ថកិច្ចដកហូតបានកន្សែសាដករបស់ព្រះសង្ឃ ពណ៌ស្លាទុំចំនួនមួយ។
មន្រ្ដីនគរបាលដដែល បានបន្តថា មុនពេលកើតមាននូវករណីចាប់រំលោភសេពសន្ថវៈនោះ នារីរងគ្រោះបានចោមពង់ទៅងូតទឹក នៅមុខតូបដូនជីម្នាក់ ឈ្មោះ មាច សាម៉ុន ស្ថិតក្នុងវត្ដពាមមង្គល ភូមិពាម ឃុំរកាកោង។ លុះមកដល់វេលាម៉ោង៦ និង៩នាទីព្រលប់ ថ្ងៃទី២១ ខែមេសា ឆ្នាំ២០១៨ ជនសង័្សយបានដើរទៅ ប្រទះឃើញនារីរងគ្រោះកំពុងចោមពង់ដុសធ្មេញតែម្នាក់ឯង។ ឃើញយប់ស្ងាត់ និងមិនមានអ្នកណាម្នាក់នៅជិតបែបនេះ ជនសង័្សយបានរត់លួចយកកន្សែសាដករបស់ព្រះសង្ឃ យកមកបត់ជាបួនផ្នត់ យកមកគ្របពីក្បាលនារីរងគ្រោះ ហើយយកដៃខ្ទប់មាត់ និងរឹតក អូសនាងប៉ុនប៉ងនាំទៅរំលោភសេពសន្ថវៈ។
មន្ត្រីនគរបាលដដែល បានបន្តថា ស្ថិតក្នងស្ថានភាពប្រកបដោយគ្រោះធ្នាក់បែបនេះ ជនរងគ្រោះបានខំប្រឹងរើបម្រះយ៉ាងខ្លាំង ក៏ត្រូវជនសង័្សយបោកទៅលើពាងទឹក បណ្ដាលឲ្យបែកអស់មួយ និងដួលទៅលើភក់ រងបួសស្នាមចំនួន២កន្លែង ស្នាមរបួសលើមេជើងស្តាំ១កន្លែង និងហើមបបូរមាត់ស្តាំ។ នៅពេលឮសំឡេងបែកពាងបែបនេះ ដូនជីឈ្មោះ មាច ម៉ុន ដែលត្រូវជាជីដូនរបស់ជនរងគ្រោះបានចេញមកឃើញជនសង្ស័យកំពុងធ្វើសកម្មភាពចាប់ជើង និងលើកបីនារីរងគ្រោះ នាំទៅរំលោភ។ ឃើញបែបនេះ គាត់បានស្រែកឆោឡោឡើង ធ្វើឲ្យជនសង្ស័យភ័យស្លនស្លោ ទម្លាក់នារីរងគ្រោះចុះ ហើយរត់គេចខ្លួនបាត់ស្រមោល។
ក្រោយពេលកើតហេតុ ដូនជីបាននាំនារីរងគ្រោះទៅដាក់ពាក្យបណ្ដឹង នៅក្នុងប៉ុស្ដិ៍នគរបាលរដ្ឋបាលរកាកោង១ ដើម្បីសុំឲ្យសមត្ថកិច្ចជួយអន្តរាគមន៍ស្វែងរកយុត្តិធម៌ឲ្យនាង។ យោងតាមពាក្យបណ្ដឹងខាងលើនេះ ទើបនៅថ្ងៃទី២២ ខែមេសា ឆ្នាំ២០១៨ សមត្ថកិច្ចមូលដ្ឋានចុះទៅឃាត់ខ្លួនជនសង័្សយ នាំមកសាកសួរ និងកសាងសំណុំរឿងបញ្ជូនទៅកាន់អធិការដ្ឋាននគរបាលស្រុក ដើម្បីចាត់ការបន្តតាមនីតិវិធី៕
